सरकारविरुद्ध निर्णायक विद्रोह गर्ने लक्ष्मण थारूको चेतावनी

A+ A A-

थरूहट र थारूवान राष्ट्रिय मोर्चाका संयोजक लक्ष्मण थारूले सरकारविरुद्ध निर्णायक विद्रोह गर्ने चेतावनी दिएका छन् ।

शनिबार अज्ञात ठाउँमा पत्रकार सम्मेलन गरेर उनले यस्तो चेतावनी दिएका हुन् । उच्च अदालत दिपायलले टीकापुर घटनाको मुद्दामा दोषी ठहर गर्दै उनलाई जन्मकैद सजायको फैसला सुनाएपछि अर्धभूमिगत बनेका उनले सो विद्रोह अदालतको फैसलाविरुद्ध पनि रहने जिकिर गरेका छन् ।

‘सरकारले हाम्रो आन्दोलनलाई सुनेन, न त गम्भीर भयो’, पत्रकार सम्मेलन गरी उनले भने, ‘अब निर्णायक विद्रोहको विकल्प नरहेको हाम्रो ठहर छ । र, हामी त्यसको तयारी गर्दैछौँ ।’ उनले आफूहरूको विद्रोह शान्तिपूर्ण रहनेसमेत बताए ।

नेता थारूले विद्रोहको लागि तयारी गरिरहेको र १०१ सदस्यीय केन्द्रीय आन्दोलन परिचालन समितिसमेत गठन गरेको बताए । आगामी १५ र १६ फागुनमा धनगढीमा ५० हजारको संख्यामा मान्छे उतारेर जनप्रदनर्शन गर्ने बताएका छन् ।

धनगढीको आमसभामा प्रधानमन्त्री केपी ओलीले नक्कली मान्छेले टीकापुर घटना घटाएको अभिव्यक्ति दिएकाले टीकापुर घटना घटाउने मान्छेका बारेमा प्रधानमन्त्री ओलीलाई थाहा रहेको नेता थारूले बताए । उनले प्रधानमन्त्रीलाई टीकापुर घटना कसले घटाएको भन्ने थाहा भए उनीहरूलाई किन जेल नहालेको भनेर प्रश्न गरे ।

यसैगरी, नेता थारूले उच्च अदालतले सिंहदरबारको निर्देशनमा टीकापुर घटनाको मुद्दाको फैसला गरेको बताए । उनले अदालतको फैसला राजनीतिक पूर्वाग्रह राखेर गरिएको जिकिर गर्दै अदालतको फैसला नमान्ने बताए ।

प्रकाशित मिति: शनिबार, माघ ३, २०७७ २०:०३