वामदेवतिर लागे दीपक मनाङे, अप्ठेरोमा ओली पक्ष

A+ A A-

गण्डकी प्रदेशसभा सदस्य राजीव गुरुङ (दीपक मनाङे)नेकपा नेता वामदेव गौतमको पक्षमा लागेका छन् । मनाङ ‘ख’ मा स्वतन्त्र उम्मेदवार बनेर चुनाव जितेका उनी पोहोर साल १९ असारमा नेकपामा प्रवेश गरेका थिए ।

आफूलाई पार्टीविभाजन चित्त नबुझेको भन्दै उनले गौतमको राष्ट्रिय एकता अभियानलाई साथ दिएका बताएका छन् । ‘यो विभाजनले कसैलाई फाइदा गर्दैन, त्यसैले पार्टी एक बनाउन प्रयास गर्दैछु,’ उनले भने ।

नेता गौतमले आफूलाई शुक्रबार बिहान फोन गरेर एकता अभियानमा जोडिन आग्रह गरेको सांसद मनाङले सुनाए । पार्टी जुटाउनुपर्ने नेता गौतमको कुरा चित्त बुझेपछि हुन्छ भनेर जवाफ दिएको उनले बताए ।

ओली गुटलाई समस्या

अहिलेको नेकपा विवादमा नेता गौतम ओली र माधव–प्रचण्ड दुवै समूहमा खुलेका छैनन् । सांसद मनाङे गौतमकै पक्षमा लागेपछि ओली पक्षलाई समस्या परेको छ ।

६० सदस्यीय गण्डकी प्रदेशसभामा अहिलेसम्म २७ जना ओली पक्षमा रहेकोमा सांसद मनाङेले बाटो फेरेसँगै २६ सांसद भएका छन् । प्रदेशसभामा ४० जना नेकपाका सांसद छन् । साविक एमालेबाट २८ जना रहेकोमा एक जना बाग्लुङका सांसद इन्द्रलाल सापकोटा माधव नेपाल पक्षधर छन् ।

मनाङेले पनि तटष्थ रहँदा ओली पक्षधर सांसद २६ मात्रै हुन्छन् । साविक माओवादीका १२ सांसद छन् । जनमोर्चाका ३ सांसदले ओली पक्षधर नेता पृथ्वीसुब्बा गुरुङ नेतृत्वको सरकारलाई समर्थन दिएका छन् ।

त्यसबाहेक प्रदेशसभामा कांग्रेसका १५, राष्ट्रिय जनमोर्चाका तीन र जनता समाजवादीका दुई सांसद छन् । केन्द्र विवादले प्रदेशमा विश्वासको मत लिनुपरे मुख्यमन्त्री गुरुङको पक्षमा २९ सांसद (राजमोका तीनसहित) हुनेछन् ।

विश्वासको मत ल्याउन मुख्यमन्त्री गुरुङलाई ३१ सांसद चाहिन्छ । कांग्रेस र जसपाका सांसदले साथ नदिएमा सरकार ढल्नेछ । मुख्यमन्त्री गुरुङले आफूलाई टिकाइ राख्न कांग्रेस, जसपा वा माधव–प्रचण्ड पक्षका दुई सांसदको साथ लिनुपर्ने छ ।

प्रकाशित मिति: शुक्रबार, माघ २, २०७७ २०:४९