उपेन्द्र यादवलाई उनकै कार्यकर्ताले दिए कालो झण्डा देखाउने चेतावनी

A+ A A-

जनता समाजवादी पार्टी (जसपा) भित्र फेरि मर्यादाक्रम विवाद चर्किएको छ । पूर्वराजपा र समाजवादी पार्टीबीच एकतापछि मर्यादाक्रमबारे सुरुदेखि नै विवाद रहँदै आएको थियो । संसद विघटनको विरोधमा सिरहामा आयोजना हुन लागेको कार्यक्रममा मर्यादाक्रम मिचेर नाम राखिएको भन्दै नेता राजकिशोर यादवले असन्तुष्टि जनाएपछि विवाद सतहमा आएको हो ।

शनिबार हुने जनप्रदर्शन एवम् विरोधसम्बन्धी कार्यक्रमका लागि जारी गरेको परिपत्रमा मर्यादाक्रम मिचेर नाम उल्लेख गरिएको भन्दै उनको समूहले कार्यक्रम नै बहिष्कार गर्ने चेतावनी दिएको छ । जसपाले जारी गरेको परिपत्रमा ३ माघमा सिरहामा हुने प्रदर्शन तथा सभामा रेणुकुमारी यादव, अनिल झा, विजय यादव र राजकिशोर यादव सहभागी हुने उल्लेख छ । त्यसमा आफ्नो नाम सबैभन्दा तल राखेकोमा नेता यादव रुष्ट छन् ।

उनी तत्कालीन राजपाका अध्यक्ष मण्डल सदस्य थिए । पार्टी एकतापछि उनी मर्यादाक्रममा रेणु यादवभन्दा अगाडि छन् । तर, परिपत्रमा नाम तल राखिएको भन्दै उनले कार्यक्रम नै बहिष्कार गर्ने आफ्नानिकट नेता तथा कार्यकर्तालाई बताउँदै आएका छन् ।

राजकिशोरनिकट नेता राजाराम यादव र जसपा अध्यक्ष उपेन्द्र यादवबीच फोनमा चर्काचर्की भएको अडियोसमेत बाहिरिएको छ । अध्यक्ष यादवसँगको कुराकानीमा राजारामले सिरहामा आए विरोध गर्दै कालो झण्डा देखाउने चेतावनीसमेत दिएका छन् । उनले मर्यादाक्रम नसच्याए राजकिशोर यादवको समूह कार्यक्रममा सहभागी नहुने पनि भनेका छन् ।

त्यसपछि उपेन्द्र यादवले रिसाएर ‘राजकिशोरको ग्रुप ओलीको कार्यक्रममा जान्छन् नि ? बकबास नगर । काम गर्न मन छ भने गर, नत्र भाग,’ भनेका छन् । ‘तपाईं डिक्टेटरसिप चलाउनुहुन्छ । अध्यक्ष हुनुहुन्छ भने के भयो ? तपाईं आउनुस् सिरहा, हामी पार्टीकै मान्छे कालो झण्डा देखाउँछौँ,’ राजाराम यादवले भनेका छन् ।

पार्टी एकीकरणअघि मन्त्री पद पाएपछि राजकिशोर नेकपामा प्रवेश गर्ने र पछिल्लो समयसमेत नेकपा नेताहरूसँग निकटता बढेको चर्चा छ । त्यसैले पनि अध्यक्ष यादवले उनलाई ओलीको कार्यक्रममा सहभागी हुनेबारे टेलिफोन संवादमा टिप्पणी गरेको बताइएको छ । तर, विभिन्न घटक मिलेर पार्टी निर्माण भएकाले वरीयताक्रम, वैचारिक असमानता समान्य कुरा रहेको र यसलाई अनौठो रूपमा लिन नहुने जसपा केन्द्रीय सदस्य तथा प्रदेश २ का भूमि व्यवस्था तथा सहकारी राज्यमन्त्री योगेन्द्र राय यादवले बताए ।

‘फरक विचार, मर्यादाक्रमको अन्तरद्वन्द्व, संगठनात्मक समायोजनको क्रममा नेतृत्वको सवाल, वर्चश्ववादी विचार र व्यक्तित्वको टकराव समान्य हो । यसलाई हामीले बुझेका छौँ । जसपामा पनि हदैसम्म छ ,’ उनले भने ।

प्रकाशित मिति: शुक्रबार, माघ २, २०७७ १४:१२