प्रतिनिधिसभा विघटनविरुद्धको मुद्दा : एमिकस क्युरीबाट बद्रीबहादुर कार्की बहसमा

प्रतिनिधिसभा विघटनविरुद्धको मुद्दा : एमिकस क्युरीबाट बद्रीबहादुर कार्की बहसमा

A+ A A-

प्रतिनिधिसभा विघटनविरुद्धको मुद्दाकाे सुनुवाइ सर्वोच्च अदालतको संवैधानिक इजलासमा जारी छ । शुक्रबारकाे सुनुवाइमा सरकार पक्षका कानुन व्यवसायीले बहस गरेका छन् ।

सरकारी पक्षका कानुन व्यवसायीहरू विष्णु भट्टराई, ईश्वरी भट्टराई, रमेश वडाल, विजय मिश्र, सुरेन्द्र भण्डारी र पदमप्रसाद पाण्डेले बहस गरे ।

निवेदकतर्फका श्याम खरेलकाे जवाफी बहसपछि एमिकस क्युरीबाट बद्रीबहादुर कार्कीले बहस गरिरहेका छन् ।

यसअघि सरकार पक्षका कानुन व्यवसायीले प्रतिनिधिसभा विघटनसम्बन्धी मुद्दाकाे सुनुवाइ संवैधानिक इजलासमै गर्नुपर्नेमा जोड दिए । वरिष्ठ अधिवक्ता विष्णु भट्टराईले संवैधानिक इजलासबाटै निचाेडमा पुग्नुपर्ने बताए । नयाँ संविधानबारे नजिर नभएकोले पुरानैअनुसार व्याख्या गर्नुपर्नेमा उनकाे जाेड छ ।

वरिष्ठ अधिवक्ता ईश्वरी भट्टराईले पनि प्रतिनिधिसभा विघटनसम्बन्धी मुद्दामाथि संवैधानिक इजलासमै छलफल हुनुपर्ने तर्क गरे । विगतमा संसद विघटनसम्बन्धी मुद्दा बृहत् पूर्ण इजलासले हाेइन, विशेष अदालतले हेरेकाे हाे', उनले भने, 'संविधानले अहिले विशेष इजलासकाे व्यवस्था गरेकाे छ, त्यसैले अहिलेकै इजलासबाट निष्कर्षमा पुग्नुपर्छ ।'

वरिष्ठ अधिवक्ता सुरेन्द्र भण्डारीले प्रधानमन्त्रीकाे कदम संवैधानिक वा असंवैधानिक भन्ने कुरा सामान्य भए पनि संविधानकाे गम्भीर व्याख्या भन्ने विषय मुख्य रहेकाे बताए । 'संविधानले नै परिकल्पना गरेको, संविधानमै उल्लेख गरेका विषयमा न्यायाधीशको संख्याभन्दा याे इजलासलाई संविधानले दिएको अधिकारको कुरा ठूलो हो', उनले तर्क गरे ।

वरिष्ठ अधिवक्ता रमेश बडालले पनि विगतको संविधानको व्यवस्थाका आधारमा ११ जनाले फैसला गरे पनि अहिले त्यो सान्दर्भिक नहुने तर्क गरे । संविधानले नै संवैधानिक इजलासको व्यवस्था गरेकाले पुरानाे संविधानका सन्दर्भमा कुनै धाराको व्याख्या गरिएकाे हुन सक्ने बताए ।

शुक्रबारकाे बहस पनि संसद विघटनविरुद्धको मुद्दा पूर्ण इजलासमै सुनुवाइ गर्ने वा बृहत् इजलासमा लैजाने भन्नेमै बहस केन्द्रित छ ।

प्रकाशित मिति: शुक्रबार, माघ २, २०७७ १३:३९