कोरोनाको असर चाकु बजारमा, व्यवसायी भन्छन्- उत्पादनकाे आधा पनि बिकेन

A+ A A-

४० वर्षदेखि चाकु व्यापार गर्दै आएका ललितपुर मंगलबजारका दीप जोशीले माघे सङ्क्रान्तिका लागि गत वर्ष तीन सय किलोभन्दा बढी चाकु बेचेका थिए । त्यसअघिका वर्ष पनि चाकु व्यापार राम्रै थियो । त्यसैले उनले यस वर्षका लागि अढाइ सय किलाे चाकु बनाए । तर, यसपल्ट एक सय किलो पनि बिकेन ।

माघे सङ्क्रान्तिकै लागि उनले सबै काम छाडेर चाकु बनाएका थिए । तर, कोरोना त्रासका कारण बजारमा चहलपहल कम हुँदा चाकु व्यापार घटेको जोशी बताउँछन् । भन्छन्, ‘एकातिर कोरोनाको डर, अर्कातिर चाकु उद्योग थपिएकाले होला यसपालि व्यापार चित्तबुझ्दो भएन । यस्तै पारा हो भने अब चाकुको व्यापार छोडिदिने हाे ।’

मंगलबजारकै निरोज महर्जन पनि चाकु व्यापारलाई लिएर निराश छन् । ‘परारभन्दा पोहोर अलिक कम व्यापार भएको थियो । अहिले त चाकु नै किन बनाइएछ भनेर पछुताउनुपर्ने स्थिति छ’, उनी भन्छन् ।

महर्जनका अनुसार कोभिड त्रासबाहेक चाकु व्यापारमा गिरावट आउनुको अर्को कारण गुणस्तरहीन उत्पादन हो । ‘उद्योगहरू बढे, प्रतिस्पर्धा पनि बढ्यो । तर, यही मेसोमा गुणस्तरहीन चाकु बनाएर सस्तोमा बेच्ने होडबाजीसमेत चलिरहेको छ । त्यसैले पनि चाकुप्रति मानिसहरूको रुचि घट्दै गएको हो कि !’, उनी भन्छन् ।

दीप जोशी र निरोज महर्जन मात्र होइन, वर्षौंदेखि चाकु व्यापार गर्दै आएका मंगलबजारका अधिकांश व्यवसायी यसपल्ट निराश छन् । किनकि, माघे सङ्क्रान्ति पर्वमा प्रयोग हुने चाकुको व्यापार यस वर्ष निकै घटेको छ ।

टोखा, असन, मरु, लगनखेल, भक्तपुर, बनेपा र नेवारहरूको बसोबास भएको क्षेत्रमा चाकुको व्यापार हुने गरेको छ । काठमाडौंकाे टोखा पनि बढी मात्रामा चाकु उत्पादन हुने क्षेत्र हो । टोखा परम्परागत चाकु संरक्षण समाजका अध्यक्ष कृष्णबहादुर श्रेष्ठले अघिल्लो वर्ष ३५ हजार किलो चाकु खपत भएकोमा यस वर्ष ३० हजार किलो पनि खपत नभएको बताए ।

व्यवसायीले प्रतिकेजी १ सय १० रुपैयाँका दरले चाकु बिक्री गर्दै आएका छन् ।

प्रकाशित मिति: बिहीबार, माघ १, २०७७ १७:००