हिटलरले फासीवाद लादे, ओली पनि त्यही बाटोमा छन् : बाबुराम भट्टराई

A+ A A-

जनता समाजवादी पार्टी (जसपा)का संघीय परिषद् अध्यक्ष बाबुराम भट्टराईले प्रधानमन्त्री केपी शर्मा ओलीको तुलना जर्मनीका तानाशाही नेता एडल्फ हिटलरसँग गरेका छन् । हिटलरले चुनाव जितेपछि सबै संस्था भत्काएको भन्दै ओली पनि त्यही बाटोमा लागेको उनले बताएका हुन् ।

‘हिटलरले न्यायालय, शिक्षा, विश्वविद्यालय सबैतिर कब्जा गरेर फासीवाद लादे । जर्मन त तहसनहस भयो । ओलीले पनि त्यही गर्छन्, हेर्नुहोला । उनले छोड्नेवाला छैनन्,’ बुधबार पोखरामा आयोजित विरोध कार्यक्रमलाई सम्बोधन गर्दै उनले भने ।

हिटलरले अन्तिमसम्म पनि आत्मसमर्पण नगरेको प्रसंग झिक्दै ओलीले पनि त्यस्तै गर्ने भट्टराईले दाबी गरे । ‘ओलीको हिटलर प्रवृत्ति’विरुद्ध जनसमुदाय लड्न आवश्यक रहेको उनले बताए । ओलीलाई नफाल्दासम्म संविधानको रक्षा नहुने उनको जिकिर छ । ‘जसरी पञ्चायती व्यवस्था र राजतन्त्र फाल्यौँ । त्यसरी नै हिटलर प्रवृत्ति नफाल्दासम्म लोकतन्त्र, संघीयता, धर्म निरपेक्षता र संविधानको रक्षा हुँदैन,’ उनले भने ।

बाह्य शक्तिसँग मिलेर प्रधानमन्त्री ओलीले प्रतिनिधिसभा भंग गरेको आरोप भट्टराईले लगाए । नाम नलिए पनि उनले भारततर्फ इंगित गर्दै उनीहरूसँग मिलेर वर्तमान कदम चालेको आरोप लगाएका हुन् । कांग्रेसको पनि साथ नपाउने देखेपछि ओलीले अरु शक्तिसँग मिलेर संसद भंग गरेको उनले बताएका हुन् ।

‘महान राष्ट्रवादी भएका मान्छे हेनुस् त । को-को आए हेर्नुस् त । किन आए होलान् ती मान्छे, मलाई त लाग्याथ्यो उसलाई फकाउन फुलाउन आए,’ उनले भने, ‘...शेरबहादुरसँग भागबन्डा गरेर जान्छु भन्ने थियो । रामचन्द्र खेमाले विरोध गर्‍यो । कसैले साथ नदिएपछि उसले तिनै शक्ति जोसँग लडें भनेर हाम्रो आँखामा खुर्सानी हाले तिनै शक्तिसँग आत्मसमर्पण गरेर यो कदम चाले । यथार्थ यही हो ।’

परराष्ट्रमन्त्री प्रदीप ज्ञवाली भारत जाने तयारीमा रहेको प्रसंग निकाल्दै भट्टराईले सरकारले घात मात्रै गरिरहेको बताए । प्रधानमन्त्री ओलीले वैशाखमा कुनै चुनाव नगर्नेमा ढुक्क हुन उनले आग्रह गरे ।

ओलीसँग बहुमत ल्याउने कुनै आधार नरहेको र अब पत्तासाफ हुने दाबी उनको छ । संविधानमा कतै पनि प्रधानमन्त्रीसँग संसद भंगको अधिकारबारे उल्लेख नभएकाले यो असंवैधानिक कदम भएको उनले दोहोर्‍याए । ‘बाउबाजेको पालोमा के थियो भन्ने हेर्ने होइन, अहिले के छ भन्ने हेर्ने हो,’ उनले भने । ओलीले वैशाखमा चुनाव नगर्ने र संकटकाल घोषणा गर्ने नेता भट्टराईको भनाइ छ ।

जसपा वरिष्ठ नेता अशोक राईले प्रधानमन्त्रीको नामलाई लिएर व्यंग्य गरे । उनले संसदको गरिममाथि ओलीले खड्ग (तरबार) प्रहार गरेको बताए । ‘उहाँको नाममै खड्ग छ । त्यो लुकाएर केपी ओली भन्नुहुन्थ्यो । आज त्यही खड्ग झिकेर तनक्क तन्काएर संसदको गरिमामाथि प्रहार गर्नुभयो,’ नेता राईले भने ।

संविधानमै नभएको ‘उट्पट्याङ धारा’ प्रयोग गरेर संसद विघटन गर्न ओलीले राष्ट्रपतिको साथ लिएको उनले सुनाए । उनले कांग्रेसमा केटाकेटी प्रवृत्ति देखिएको टिप्पणी गरे । उनले भने, ‘संसद भंग हुँदा दसैँ आएजसरी कांग्रेस रमाएको देखिन्छ । ७० वर्षमा थुप्रै घुम्ती पार गरेको पार्टीका नेता केटाकेटीजस्ता भए ।’

पुष्पकमल दाहाल 'प्रचण्ड' र माधवकुमार नेपालको सही ठाउँ सडक नै भएको नेता राईले टिप्पणी गरे । चुनावताका आफ्नो फाइदा हेरेर ओलीसँग लागेकाहरूको सही ठाउँ सडक नै भएको उनले बताएका हुन् ।

'एकथरीले हामी यहाँ छौँ भनेर टाँस्नुभयो । तपाईंहरू त्यहीँ हुन लायक हुनुहुन्छ’, नेता राईले भने । उनले प्रचण्डप्रति कटाक्ष गरे, 'किन रोइस् मंगले आफ्नै ढंगले !’ नेता राईले प्रधानमन्त्री ओलीलाई चुनाव हार्ने निश्चित भएकाले बालुवाटार छोड्ने तयारी गर्न सुझाए ।

पार्टीका केन्द्रीय कार्यकारी सदस्य शरदसिंह भण्डारीले प्रतिनिधिसभाको विघटनपछि जसपाको आवश्यकता र महत्त्व बढेको बताए । नेकपाले लोकतन्त्रको रक्षा गर्न नसकेको, कांग्रेसप्रति जनताको विश्वास नभएको दाबी गर्दै उनले आफ्नो पार्टीले लोकतन्त्रको रक्षा गर्ने दाबी गरे ।

‘दुईतिहाइको बहुमत पाएको नेकपाले जिम्मेवारी पूरा गरेन । ओलीले जनमतको कदर गर्नुपर्ने हो तर अपमान गर्दै मुलुकलाई अस्थिरतातर्फ धकेले,’ नेता भण्डारीले आरोप लगाए । उनले प्रधानमन्त्री ओलीले संविधानमाथि 'कू' गरेर जनप्रतिनिधिमूलक संस्था संसद विघटन गरेको बताए ।

प्रकाशित मिति: बुधबार, पुस २९, २०७७ १९:२७