सडक सञ्जालमा जोडिँदै सुदूरपश्चिम र कर्णाली प्रदेश

A+ A A-

सुदूरपश्चिम र कर्णाली प्रदेश अब छोटो दूरीको सडक सञ्जालमा जोडिने भएको छ । कैलालीको कुइनेस्थित कर्णाली नदीमा पुल निर्माण कार्य सुरु भएसँगै सुदूरपश्चिम र कर्णाली प्रदेश छोटो दूरीको सडक सञ्जालमा जोडिने भएको हो ।

दशकौंदेखि साविक सुदूर र मध्यपश्चिमका पहाडी जिल्लाका बासिन्दाले पैदल यात्रा गर्दै आएको परम्परागत चिसापानी कुइने सुर्खेत बाटो सडक सञ्जालसँग जोडिने भएको छ । कैलाली र सुर्खेतको कुइनेमा निर्माणाधीन कर्णाली नदीको पुलले उक्त बाटोलाई पूर्व–पश्चिम राजमार्गको चिसापानीसम्म सडक सञ्जालसँग जोड्ने भएको हो । सडक सञ्जालसँग जोडिएसँगै यो बाटो सुदूरपश्चिम र कर्णाली प्रदेशलाई जोड्ने छोटो दूरीको बाटो हुनेछ ।

पुल निर्माणसँगै साविक सुदूर र मध्यपश्चिमका सुर्खेत, कालीकोट, दैलेख, जुम्ला, हुम्ला, डोल्पा, मुगु, बाजुरा, अछामलगायत जिल्लाका बासिन्दाले छोटो दूरीको यात्रा गर्न पाउनेछन् । हाल सुदूरपश्चिम र कर्णालीका स्थानीय पूर्व–पश्चिम राजमार्गसम्म आउन हाल सुर्खेत–कोहलपुर–चिसापानी वा डोटी–डडेल्धुरा–अत्तरियाको लामो तथा घुमाउरो बाटो प्रयोग गर्न बाध्य छन् ।

कुइनेस्थित कर्णाली नदीमा पुल निर्माण पछि सुर्खेतको बड्डीचौर हुँदै कोहलपुर–चिसापानीसम्मको झन्डै २ सय किलोमिटर सडक यात्रा ५२ किलोमिटरमा छोटिनेछ । सुर्खेतको बड्डीचौर हुँदै कुइनेबाट ५२ किलोमिटरको यात्रामै पूर्व–पश्चिम राजमार्गअन्तर्गतको चिसापानी पुगिनेछ ।

कुइनेस्थित कर्णाली नदीमा अनत/लुम्बिनी जेभीले पुल निर्माण गरिरहेको छ । पुल निर्माणका लागि २०७२ सालमा ठेक्का सम्झौता भएको थियो । सडक विभागले दुई वर्षसम्म डिजाइन स्वीकृत नगरेका कारण पुल निर्माणको काम ढिलो गरी सुरु भएको निर्माण कम्पनीले जनाएको छ ।

निर्माण कम्पनीका साइड इन्चार्ज दिनेशकुमार श्रेष्ठले २०७४ फागुनमा डिजाइन स्वीकृत भएपछि पुल निर्माणको काम सुरु भएको बताए । ‘नदीले बर्सेनि धार परिवर्तन गरेकोले डिजाइन स्वीकृत गर्नमा ढिलाइ भएको हुन सक्छ,’ श्रेष्ठले भने, ‘भौगोलिक अवस्थितिका कारण पनि केही ढिलाइ भएको हो ।’

यसै आर्थिक वर्षको वर्षा यामअघि पुलका दुईवटा पिल्लर तयार भइसक्ने निर्माण कम्पनीले जानकारी दिएको छ । थप दुईवटा पिल्लर पुलका दुवैतर्फ निर्माण गरिनेछ । पुल निर्माणको काम सुरु भएसँगै त्यस क्षेत्रका स्थानीय निकै खुसी देखिएका छन् । स्थानीयले कुइनेस्थित कर्णाली नदीमा पुल निर्माण गर्नुपर्ने दशकौंदेखि माग गर्दै आएका थिए ।

लक्ष्मण शाहीले पुलले कर्णाली प्रदेशलाई भारतसँगको छोटो दूरीमा पर्ने नाकाका रुपमा जोड्ने बताए । ‘पुल बनेपछि टीकापुरस्थित सत्ती भन्सार कार्यालय भौगोलिक रुपमा निकै नजिक छ,’ शाहीले भने, ‘भारतसँग सिधै सम्पर्क नभएको कर्णाली प्रदेश र यहाँका जनताका लागि राम्रो अवसरको कुरा हो ।’

त्यस्तै, पुल निर्माण सुरु भएसँगै स्थानीयले आफ्ना उत्पादनले बजार पाउने अपेक्षा गरेका छन् । जिल्ला समन्वय समितिका संयोजक सूर्यबहादुर थापाले राज्यले उपेक्षा गरेका कारण छोटो दूरीको बाटो निर्माण हुन वर्षौं लागेको बताए ।

साविक सुदूर तथा मध्यपश्चिमका अधिकांश बासिन्दा रोजगारीका लागि भारत जाने गर्छन् । उनीहरु भारतका विभिन्न सहरमा जानका लागि बाँके, कैलाली र कञ्चनपुर जिल्लाका सीमा नाका प्रयोग गर्छन् ।
पुल निर्माण पछि यो सडक पहाडी जिल्लामा सामग्री ढुवानीको छोटो विकल्पसमेत बन्नेछ ।

प्रकाशित मिति: सोमबार, वैशाख २३, २०७६ २२:१८