भ्रष्टाचार रोक्न लाइसेन्स परीक्षामा नियम खुकुलो बनाइँदै

A+ A A-

सवारीसाधनको अनुमतिपत्र निकाल्नका लागि कडा नियम राखिएका कारण भ्रष्टाचार बढेको भन्दै यातायात व्यवस्था विभागले नियम नै परिवर्तन गर्नुपर्ने जनाएको छ ।

साविकको नियमअनुसार धेरै परीक्षार्थी पास हुन नसक्ने र पास हुन/गराउनका लागि घूस दिने/लिने परिपाटी बढेको निष्कर्ष निकाल्दै विभागले खुकुलो नीतिको प्रस्ताव अघि सारेको विभागका महानिर्देशक गोगन हमालले बताए ।

उनले भने, ‘हाम्रो व्यवस्था नै निकै कडा छ । दुई वर्ष सडकमा सवारी चलाएका चालकले पनि पहिलो पटक नै लाइसेन्सको परीक्षा पास गर्न सक्दैनन् । पटक-पटक परीक्षामा सामेल हुँदा पनि पास नहुँदा वैकल्पिक बाटोतर्फ लाग्छन् । यसैलाई रोक्ने प्रयास हो हाम्रो ।’

महानिर्देशक हमाल सो प्रस्तावअनुरुप सवारी लाइसेन्स परीक्षा खुकुलो पार्ने हो भने ८० प्रतिशत परीक्षार्थी पास हुने र यसले सडक दुर्घटनामा पनि कमी ल्याउने दाबी गर्छन् । जबकि २५ प्रतिशत पास हुने लाइसेन्स होल्डर सवारीचालकको पनि दुर्घटनाबाट मृत्युदर बढिरहेको छ ।

महानगरीय ट्राफिक महाशाखाका अनुसार पछिल्लो ६ वर्षमा उपत्यकामा मात्रै सडक दुर्घटनाको संख्या ६० प्रतिशतले बढेको छ । आर्थिक वर्ष २०७०/०७१ सालमा ४ हजार ६ सय ७२ वटा सवारी दुर्घटना उपत्यकामा मात्रै भएका थिए भने छ वर्षपछि आर्थिक वर्ष २०७६/७७ मा सो संख्या १० हजार ३८ वटामा पुगेको छ ।

दुर्घटना रोक्न र भ्रष्टाचार रोक्नका लागि परीक्षामा खुकुलो नीति लिने विभागको निर्णयप्रति सडक दुर्घटनाविज्ञ भने सरकारको निर्लज्जताकाे परिणाम भएको बताउँछन् । सडक दुर्घटनाविज्ञ गोविन्द भट्टराई भ्रष्टाचार रोक्ने भन्दै परीक्षा खुकुलो बनाइएको खण्डमा सडक असुरक्षा ८० प्रतिशतले बढेर जाने बताउँछन् ।

उनी भन्छन्, ‘भ्रष्टाचार रोक्न, परीक्षामा पास हुन सक्ने विद्यार्थी उत्पादन गर्न प्रयास गर्ने कि नियामक निकाय नै लाज पचाएर परीक्षालाई नै खुकुलो पार्ने ? ड्राइभिङ स्कुल, सडकको अवस्थामा सुधार गर्दै भौगोलिक अवस्थाअनुसार ड्राइभिङ शिक्षा दिनुको साटो परीक्षालाई सहज गरेर थप जोखिम निम्त्याएको छ ।’

भट्टराई नेपालमा ड्राइभिङ स्कुलमा सरकारले अनुगमन, निगरानी गरेर आवश्यक मापदण्डमा राख्ने काम नगर्दा उत्पादित विद्यार्थीमा गुणस्तर कम हुने बताउँछन् । सरकारले ड्राइभिङ शिक्षालाई थप गुणस्तीय बनाउँदै परीक्षालाई थप मर्यादित र कडा बनाउनुको साटो चालकलाई क्षणिक सहजता प्रदान गरेर दुर्घटनाको जोखिम बढाउँदै लगेको आरोप लगाए । विभागले समस्या सामाधान गर्न पहल गर्नुको साटो समस्या थप बढाएको उनको भनाइ छ ।

यस्तो छ परीक्षा खुकुलो बनाउने विभागको प्रस्ताव

प्रस्तावमा ट्रायलका विभिन्न चरणमा पाएको अंकका आधारमा पास/फेल निधो गरिनेछ । जसमा परीक्षार्थीले ट्रायल सुरुवातकै आठ (८)’ मा घुमाउन सुरु गरेर ट्रायल पूरा गरेर ननिस्किउञ्जेलसम्म विभिन्न प्यारामिटरका आधारमा अंक पाउनेछन् ।

यो ट्रायलको पूर्णाक १०० हुनेछ भने त्यसमा परीक्षार्थीले ट्रायलबाट ६० अंक पाएसँगै पास हुनेछन् । यसो गर्दा परीक्षार्थीले गरेको सामान्य गल्ती अब नजरअन्दाज हुनेछन् । अर्थात् हेलमेटको लक लगाए नलगाएका जस्ता कुराहरूकाे पनि मूल्याङ्कन हुनेछ । तर, प्रस्तावमा कुन प्यारामिटरमा कति नम्बर दिने भन्ने भने यकिन गरिएको छैन ।

त्यस्तै, लिखित परीक्षासमेत सहज हुनेगरी साइटमै लाइसेन्स परीक्षाका सम्भावित एक हजार प्रश्नहरू पनि राखिने जनाएको छ ।

प्रकाशित मिति: बुधबार, पुस २९, २०७७ १५:४१