मुख्यमन्त्रीलाई 'मेरो ठाउँमा मान्छे खोज' भन्ने मन्त्री भन्छन् : चुनाव हुने विश्वास दिलाउन बोलेँ

मुख्यमन्त्रीलाई 'मेरो ठाउँमा मान्छे खोज' भन्ने मन्त्री भन्छन् : चुनाव हुने विश्वास दिलाउन बोलेँ

A+ A A-

गण्डकी प्रदेशका उद्योगमन्त्री विकास लम्सालले आजभन्दा ठीक एक वर्षअघि पोखराको एउटा जुत्ता पसल उद्घाटन गरेका थिए । केही काम नपाएर जुत्ता पसल उद्घाटन गर्न हिँडेको भन्दै उनको आलोचना भयो । त्योभन्दा अगाडि उनले दिएको एउटा अभिव्यक्ति 'भाइरल' बन्यो ।

उनले २०७६ वैशाख २५ मा आयोजित एउटा पत्रकार सम्मेलनमा भनेका थिए, 'फेवातालमा कफी सप खोल्छौँ । एक कपलाई एक सय डलरमा बेच्छौँ ।' बेलाबखत यस्तै उट्पट्याङ अभिव्यक्ति दिने मन्त्री लम्सालले मंगलबार संसदको मर्यादा विपरीत बोले ।

प्रदेशसभाको विशेष अधिवेशनमा जरुरी सार्वजनिक महत्त्वको प्रस्तावअन्तर्गत मूल्यवृद्धि र अनुगमनबारे छलफल थियो । यस्तो प्रस्तावमा जुन विषय हो, त्यसबारे बोल्नुपर्छ । तर, उनले आफू संघमा जाने अभिव्यक्ति दिए, प्रधानमन्त्रीको गुनगान गाए । संसदमा उठेका प्रश्नलाई जिम्मेवार भएर जवाफ नफर्काइ ३० मिनेट सके ।

उनले मंगलबारको बैठकमा मुख्यमन्त्री पृथ्वीसुब्बा गुरुङलाई भनेका थिए, ‘मेरो ठाउँमा मन्त्री खोज्नुस्, म वैशाखमा चुनाव लडेर संघमा जाने हो ।’ मूल्यवृद्धि र अनुगमनबारे जवाफ दिन रोष्टममा पुगेका मन्त्री लम्सालले मुख्यमन्त्रीसँग चुनाव लड्न टिकट नै मागे ।

मुख्यमन्त्रीले पदमुक्त गर्दिने डरले उनै मन्त्री लम्साल आफ्नो बचाउमा लागेका छन् । उनले आफ्नो सचिवालयलाई विज्ञप्ति निकाल्न लगाएर ‘वैशाखमा चुनाव हुन्छ भन्ने आश्वस्त पार्न’ सो अभिव्यक्ति दिएको बताएका छन् । सचिवालयले मंगलबार राति विज्ञप्ति निकालेर मन्त्रीको बचाउ गरेको हो ।

उनले जोसमा होस गुमाएर र प्रधानमन्त्री केपी शर्मा ओलीको गुनगान गाउँदागाउँदै सो अभिव्यक्ति दिएको प्रष्ट छ । एक पाना लामो विज्ञप्ति निकालेको मन्त्री लम्सालको सचिवालयले अन्तिममा भनेको छ, ‘प्रदेशसभामा बोल्ने क्रममा केही माननीय सदस्यज्यूहरूले वैशाखमा हुने गरी सरकारले घोषणा गरेको निर्वाचन हुन सक्दैन भनेपछि एउटा जिम्मेवार मन्त्रीले सोही सभालाई सम्बोधन गर्ने क्रममा तोकिएकै मितिमा निर्वाचन हुन्छ, हामी सबै तयार हौँ भन्नु स्वभाविक नै हो ।’

प्रदेश सरकारलाई कमजोर बनाउन, आफू मन्त्रिपरिषदबाट बाहिरिन नभई प्रतिनिधिसभाको मध्यावधि निर्वाचन तोकिएकै समयमा हुन्छ भन्ने विश्वस्त पार्न मन्त्री लम्सालले उक्त अभिव्यक्ति दिएको उनको सचिवालयले निकालेको विज्ञप्तिमा उल्लेख छ ।

मन्त्री लम्सालले मंगलबार संसदको विशेष अधिवेशनलाई सम्बोधन गर्दै आफू संघमा जाने भएकाले प्रदेशमा आफ्नो विकल्प खोज्न भनेका थिए । ‘माननीय मुख्यमन्त्रीज्यू, वैशाखमा चुनाव लड्ने इच्छा छ, म संघमा जाने हो । हिजो पनि संघमै थिएँ । यहाँ कसलाई ल्याएर राख्ने हो, कसलाई ल्याएर मन्त्रालय चलाउने हो मन्त्री खोज्नुस्,’ लम्सालले भनेका थिए, ‘तपाईं मेरो पार्टीको इन्चार्ज पनि हो, टिकट दिनुस् । म आजदेखि यो संसदमा आउँछु कि आउँदिनँ, चुनाव जितें भने माथि नै जाउँला । म गइनँ भने पनि केपी ओलीले सही गरेको मान्छे त्यहाँ जान्छ, हामीले जिताउनुपर्छ ।’

मन्त्री लम्सालले पहिला ९० सिट ल्याएको नेकपाले अब १ सय २० सिट जित्ने दाबी गरे । ‘जनताका बीचमा जाँदा फेरि पनि केपी ओलीले जित्ने निश्चित छ । पहिला ९० सिट हो, अब १ सय २० सिट आउँछ,’ उनले भने, ‘पहिला ३३ लाख भोट हो, अब ५० लाख आउँछ ।’

गण्डकी प्रदेश सरकार पुनर्गठन गर्ने चर्चा भए पनि अहिलेसम्म मुख्यमन्त्री त्यता लागेका छैनन् । मुख्यमन्त्रीले गत भदौमा मन्त्रालय थपेर मन्त्रीहरू थप्ने र मन्त्रालयसमेत हेरफेर हुने बताएका थिए । तर नेकपामा विवाद आएपछि यो विषय अहिले ओझेलमा परेको छ । पुनर्गठन गरेको भए उनी पहिलो नम्बरमै ‘किक आउट’ हुने मुख्यमन्त्री गुरुङनिकट नेताहरू बताउँछन् । मुख्यमन्त्री गुरुङ पनि उनलाई रचाउँदैनन् । उनले आफ्ना अभिव्यक्तिमार्फत प्रदेश सरकारलाई नै विवादमा ल्याउने गरेका छन् ।