सांसदले मूल्यवृद्धिबारे सोधे, मन्त्री लम्सालले गुनगानमै समय सके

A+ A A-

खाने तेल, केराउ, अन्डा, गहुँको आँटा, सिमेन्ट, फलामको छडलगायतमा सामग्रीको मूल्य ५ देखि १५० रुपैयाँसम्म बढेको छ । यही कुरा गण्डकी प्रदेशका सांसदले मंगलबार प्रदेशसभाको विशेष अधिवेशनमा राखे । प्रदेशसभामा प्रस्तुत जरुरी सार्वजनिक महत्त्वको प्रस्तावअन्तर्गत महँगी र बजार अनुगमनको विषयमा सांसद बोलेका हुन् ।

सांसदको प्रश्‍नको जवाफ उद्योग, पर्यटन, वन तथा वातावरणमन्त्री विकास लम्सालले दिने कार्यसूची थियो । केही सांसद महँगीमा केन्द्रित भए, केही वर्तमान राजनीतिक परिस्थितिमा । महँगी नियन्त्रण र अनुगमनमा प्रदेश सरकारले गरेका काम सुनाउन गएका मन्त्री लम्सालले पनि प्रधानमन्त्री केपी शर्मा ओलीको गुनगानमै समय सके ।

प्रतिपक्षी सांसद कांग्रेसकी ओमकला गौतम र जसपाकी धनमाया लामा पोखरेलले कुन वस्तुको मूल्य कति बढ्यो भन्ने फेहरिस्त संसदमा सुनाए । कांग्रेस सांसद गौतमले मन्त्रीहरू मूल्यवृद्धि नियन्त्रण गर्नुको सट्टा वडाध्यक्षले अस्वीकार गरेको उद्घाटन कार्यक्रममा मन्त्रीहरू पुग्ने गरेको बताइन् । ‘कालोबजारियाको दयामा नागरिकलाई छोडेर प्रदेश सरकारका मन्त्रीहरू वडाध्यक्षले अस्वीकार गरेको कार्यक्रममा पकेटमै कैँची बोकेर हिँडिरहनुभएको छ,’ उनले लिखित भाषण संसदमा सुनाइन् ।

मन्त्रीहरू आमा समूह, टोल सुधार र कपाल काट्ने पसल उद्घाटनमा हिँडेको यथार्थ नभए पनि केही काम नगरको तर्फ उनले इंगित गरेकी थिइन् । सांसद गौतमले अन्डाको मूल्य महिना दिनमै २८० बाट ४५० रुपैयाँ पुगेको, तेलको मूल्य १५० बाट २ सयभन्दा बढी भएको, गिट्टी १ टिपरको मूल्य २२ हजारबाट ३० हजार रुपैयाँ पुगेको बताइन् । उनले प्रदेश उद्योगमन्त्रीको संयोजकत्वमा बनेको बजार अनुगमन समितिले केही काम नगर्दा जनताले समिति भएको अनुभव गर्न नपाएको बताइन् ।

जसपा सांसद धनमाया लामाले प्रदेश सरकारको बजेटमा सुपथ मूल्य कार्डबारे उल्लेख भए पनि अहिले त्यसको प्रक्रिया कहाँ पुग्यो भनेर मुख्यमन्त्रीलाई प्रश्‍न गरिन् । उनले पनि कुन वस्तुको मूल्य कति बढ्यो भन्ने सुनाइन् । ‘सरकारलाई चाहिन्छ भने म यो मूल्यवृद्धिको तथ्यांक दिन तयार छु । हैन भने जनता मारमा परेको अवस्थामा सरकारले तेल हालेर बस्न हुँदैन,’ सांसद लामाले सुनाइन् ।

जनमोर्चा सांसद कृष्ण थापाले कोभिड- १९ सुरु हुनुभन्दा पहिल्यैदेखि जनताले मूल्यवृद्धि भोगिरहेको बताए । विचौलियाका कारण मूल्यवृद्धि बढेकाले त्यसलाई नियन्त्रणमा ध्यान दिनुपर्ने आवश्यक रहेकोमा जोड दिए । ‘पाँच दिन पहिला गाउँबाट सुन्तला बेचेँ । उता ४५ रुपैयाँमा बेचेको सुन्तला बजारमा १२०/१३० रुपैयाँ रहेछ,’ उनले भने, ‘यसको कारण विचौलिया हुन् । त्यसलाई नियन्त्रण गर्नेतर्फ सरकारले ध्यान दिनुपर्छ ।’

गुनगानमै जवाफ दिने समय सकियो

सभामा उठेको प्रश्नको जवाफ दिन सभामुख नेत्रनाथ अधिकारीले मन्त्री लम्साललाई समय दिए । उनले संसदमा जुन विषयमा छलफल सुरु भएको हो त्यसको जवाफ दिन समय खर्चिएनन् । मन्त्री लम्साल संसदमा ३० मिनेट बोले । करिब २५ मिनेट प्रधानमन्त्री केपी शर्मा ओलीको संसद विघटन गर्ने निर्णयको समर्थन, प्रदेश सरकारको काम, भारतीय पार्टीको चर्चा र केही ठट्टा गरेर समय खर्चिए ।

सम्बोधनका क्रममा मन्त्री लम्सालले मिडियाले बिहानदेखि बेलुकासम्मै नकारात्मक समाचार लेख्ने गरेको आरोप लगाए । गण्डकी सरकारले ‘गानो जाने गरेर’ काम गरेको र छोटो अवधिमै धेरै कानुन बनाएको उनले जिकिर गरे ।

‘हजुरबाले धेरै उचाले गानो जान्छ, नगरनगर सानै छस् भन्नुहुन्थ्यो । हजुरबाले भनेजस्तै प्रदेश सरकारले गानो जाने गरी काम गरेको छ,’ सभामा बाल्यकाल स्मरण गर्दै उनले सुनाए, ‘काम गरेको कसले भन्दिने, पार्टी विवादमा छ । भने त्यही मन्त्री स्थापित हुन्छ । किन भन्ने अर्कोचोटी उसैलाई फालेर आउनपर्छ । गुटबन्दी छ ।’

संविधानले स्थिरता दिँदैन भनेर संविधानसभा अध्यक्ष सुवास नेम्वाङलाई सोध्दा दुई सय वर्षलाई हुने गरी संविधान बनेको जवाफ आफूले पाएको मन्त्री लम्सालले सुनाए । प्रदेशसभामा पनि प्रधानमन्त्रीको कदम असंवैधानिक हो र प्रतिगामी कदम भनेको भन्दै आपत्ति जनाए । भारतमा प्रधानमन्त्रीलाई कुनै पार्टीले रोकतोक नगर्ने गरेको भन्दै उनले भने, ‘एउटा कार्यकारीले नियुक्तिका लागि बैठक बोलाउँदा सभामुख जानुहुन्न ।’

मूल्यवृद्धि र प्रदेश सरकारले गरेका अनुगमनबारे जवाफ दिन रोष्टममा पुगेका मन्त्री लम्सालले सांसदले भनेजस्तो महँगी नबढेको दाबी गरे । ‘२०७६/७७ र २०७७/७८ मा मानीनय सदस्यहरूले भनेजस्तो महँगी वृद्धि भएको छैन । केमा कति वृद्धि भएको छ एक/एक सामानको पनि भन्दिन्छु,’ मन्त्री लम्सालले संसदमा भने ।

आफूले स्थानीय सरकारलाई किसानको हातमा पैसा जाने गरि काम गर्न भनेको तर नगरेको भनेर पन्छिए । कोभिडको बेलामा गण्डकी प्रदेशका उद्योगीले इमान्दारिता देखाएको भन्दै प्रशंसा गरे । उनले 'एक/एक सामानको पनि भन्दिन्छु' भने पनि जवाफ दिने समय सकिँदासम्म केही बोलेनन् ।

उनी बोल्दा सभामुखले दुईपल्ट समयलाई ख्याल गर्न भने । पहिलोपटक सभामुखले भन्दा उनले वास्ता गरेनन् । दोस्रोपटक समयलाई ध्यान दिन भनेपछि मन्त्री लम्सालले भने, ‘मन्त्रीलाई कुनै समय हुँदैन, सभामुख महोदयलाई राजनीतिक कुरा सुन्न गाह्रो भए मेरो भनाइ यहीँ टुंग्याउँछु ।’

प्रकाशित मिति: मंगलबार, पुस २८, २०७७ २२:०२