एनसेल-बाह्रखरी गल्फ प्रतियाेगिता २४ माघमा पोखरामा हुँदै

A+ A A-

नियमित रूपमा सञ्चालन हुँदै आएको एनसेल-बाह्रखरी गल्फ प्रतियाेगिता यस वर्ष पोखरामा आयोजना गरिने भएको छ ।

एनसेलसँगको विशेष सहकार्यमा २३ माघदेखि २५ सम्म पोखरामा सम्पन्न हुने जानकारी दिइयो ।नेपालको आन्तरिक पर्यटन क्षेत्रमा विशेष योगदान पुर्‍याउने उद्देश्यअनुरुप हरेक वर्ष साे प्रतियोगिताकाे आयाेजना गरिँदै आएकाे छ । याे ‘आमन्त्रण गल्फ प्रतियोगिता’को चौथो संस्करण हाे ।

बाह्रखरी मिडियाका प्रधानसम्पादक प्रतीक प्रधानले पोखराको पर्यटन प्रवर्द्धनका लागि यस वर्ष पोखरामा प्रतियोगिता आयोजना गर्न लागिएको जानकारी दिए ।

कोभिड–१९ ले संसारभरकै पर्यटनक्षेत्रलाई आक्रान्त पारेको वर्तमान अवस्थामा नेपालको पर्यटन क्षेत्र पनि अछुतो नरहेको र नेपालको पर्यटकीय राजधानी पोखराको पर्यटनमा नवीन ऊर्जा सञ्चार गराउन सके यसले सम्पूर्ण पर्यटन क्षेत्रलाई नै उत्साहित र सकारात्मक गति दिने विश्वासका साथ यो वर्ष पोखरालाई ‘एनसेल बाह्रखरी गल्फ’को केन्द्रबिन्दु बनाइएको उनले जानकारी दिए ।

पोखरामा हुने यस प्रतियोगितामा काठमाडौं, पोखरा, विराटनगर, वीरगञ्ज, चितवन, भैरहवा, नेपालगञ्ज र धनगढीका कर्पोरेट लिडर तथा गल्फ खेलाडीलाई प्रतिस्पर्धा गराउनुका अतिरिक्त उल्लेखित सहरहरूबाट विशेष पाहुनाहरूलाई पनि निमन्त्रणा गरिनेछ ।

आयाेजकका अनुसार खेलाडी र विशेष पाहुनालाई २३ माघदेखि २५ सम्म पोखराका विभिन्न स्थानको भ्रमण गराउने र साहसिक खेलमा सहभागी गराउने कार्यक्रम पनि समावेश छ । साथै, पोखरामा आन्तरिक पर्यटन र पर्यटनको पुनरुत्थानप्रति विशेष जागरुकता फैलाउने उद्देश्यले २३ माघमा साइकल र्‍याली गरिने कार्यक्रम छ ।

गल्फ प्रतियोगिता हिमालयन गल्फ कोर्समा २४ माघमा हुनेछ । जहाँ ७२ जना कर्पोरेट गल्फरले १८ होलमा स्टेबल फोर्ड फर्म्याटमा प्रतिस्पर्धा गर्नेछन् । प्रतियोगिताका अल–राउण्ड विजयीले सुनको गल्फ बल अर्थात् बाह्रखरी गोल्डेन बल पुरस्कारस्वरुप प्राप्त गर्नेछन् । साथै, अन्य विजयीले ट्रफी तथा प्रमाणपत्र प्राप्त गर्नेछन् ।

एनसेल प्रमुख प्रायोजक रहेको गल्फ प्रतियोगितामा गल्फ खेलाडीसहित करिब दुई सय पाहुना सम्मिलित हुनेछन् । पोखराका प्रतिष्ठित उद्यमी, व्यवसायी तथा गण्यमान्य गरी करिब ३ सय पाहुना गल्फको पुरस्कार वितरण समारोहमा विशेष आमन्त्रित हुनेछन् ।

गल्फरबाहेकका पाहुनाका लागि अल्ट्रालाइट, प्याराग्लाइडिङ, जीप फ्लाइङ, बन्जी जम्पिङ्, र्‍याफ्टिङ, क्यानोनिङ र डुंगा सयरको व्यवस्था गरिएको छ । प्रतियोगितामा उपस्थित पाहुनाका लागि १६ वटाभन्दा बढी होटलमा बस्ने व्यवस्था गरिएको छ भने रेष्टुरेन्ट एवम् बार एसाेसिएसन पोखरासँग आवद्ध २५ भन्दा बढी रेष्टुरेन्टमा बाह्रखरीका पाहुनाका लागि तीन दिन विशेष छुटको व्यवस्था हुनेछ ।

साथै पोखरा आइपुगेका पाहुनाले आफ्नै खर्चमा यस क्षेत्रको मनोरम दृश्य अवलोकन गर्न चाहेमा कैलाश हेलिकाेप्टर्स, अल्टिच्युड हेलिकाेप्टर्स तथा प्रभु हेलिकाेप्टर्सले विशेष छुटमा पोखरा र यसवरिपरिका हिमालयहरूको दृश्यावलोकन गराउनेछन् ।

एनसेल प्रमुख प्रायोजक रहेको बाह्रखरी गल्फको यो प्रतियोगितामा नेपाल टुरिज्म बोर्ड, गण्डकी प्रदेश सरकार तथा पोखरा महानगरपालिकाको पनि सहकार्य छ । अन्य प्रायोजकमा डिसहोम, भाटभटेनी सुपरमार्केटस्, नेपाल इन्भेस्टमेन्ट बैंक, कार्ल्सबर्ग, सिभास रिगल, हुन्डाई मोटर्स र आईएमई छन् ।

प्रमुख आयोजक बाह्रखरी मिडिया रहेको साे प्रतियाेगिता अघिल्लो वर्ष सगरमाथा क्षेत्रमा आयोजना भएकाे थियो । यो प्रतियोगिता विश्वकै सबैभन्दा बढी उचाइ (४२५० मिटर) मा गरिएको पहिलो प्रतियोगिता थियो, जसको समाचार विश्वका २ सयभन्दा बढी अन्तर्राष्ट्रिय सञ्चारमाध्यमले सम्प्रेषण गरेका थिए ।

प्रकाशित मिति: मंगलबार, पुस २८, २०७७ १८:३६