भाेलिदेखि अनलाइनबाटै नयाँ श्रम स्वीकृति, विभाग भन्छ : अब ठगी नियन्त्रण हुन्छ

भाेलिदेखि अनलाइनबाटै नयाँ श्रम स्वीकृति, विभाग भन्छ : अब ठगी नियन्त्रण हुन्छ

A+ A A-

१ माघदेखि अनलाइन प्रणालीमार्फत नयाँ श्रम स्वीकृति लिन सकिने भएको छ । अनलाइनबाट नयाँ श्रम स्वीकृति दिनका लागि सम्पूर्ण तयारी सकिएको जानकारी वैदेशिक रोजगार विभागले दिएको छ । विभागले यसअघि नै पुनः श्रम स्वीकृति अनलाइन प्रणालीबाट दिँदै आएको थियाे ।

पूर्व र नयाँ श्रमस्वीकृति अनलाइन प्रणालीबाट जारी गर्न थालेपछि सेवा लिन म्यानपावर व्यवसायी र श्रम प्रतिनिधि फाइल बोकेर ताहाचल धाउनुपर्ने बाध्यता हट्ने वैदेशिक रोजगार विभागका महानिर्देशक कुमारप्रसाद दहालले बताए ।

‘ताहाचलबाट हुने सबै काम डिजिटल प्रविधिबाट सेवाग्राहीले पाउँछन् । डिजिटल प्रणालीमा गएसँगै ताहाचल कार्यालयमा श्रम प्रतिनिधिको उपस्थिति शून्य हुन्छ,’ उनले भने, 'नेपालबाट मात्र होइन, विदेशमा रहेका कामदारले समेत श्रमस्वीकृतिको सेवा अनलाइनबाट लिन सक्छन् ।' विदेशमा रहेका कामदारले करारअवधि सकिएपछि तत्काल अनलाइन प्रणालीबाट पुनः श्रम स्वीकृति लिन सक्ने महानिर्देशक दहालले बताए ।

विगतमा देखिएका कमीकमजोरी नदोहोरिने गरी काम भइरहेको उनको भनाइ छ । संस्थागत र व्यक्तिगत माध्यमबाट विदेशिने कामदारका समस्या पनि अनलाइन प्रणालीबाट सम्बोधन गर्ने गरी काम गरिरहेको उनले बताए ।

‘सरकारले वैदेशिक रोजगारी क्षेत्रका समस्या समाधान गर्नका लागि प्रयास र सुधार गरिरहेको छ । संस्थागत मात्र होइन, व्यक्तिगत तवरबाट विदेशिने कामदारका समस्या पनि अनलाइन प्रणालीबाट समाधान गर्न प्रयास हुँदै छ,’ उनले भने ।

वैदेशिक रोजगार सूचना प्रणालीअन्तर्गत अनलाइन प्रणाली पूर्ण रूपमा कार्यान्वयनमा नहुँदा म्यानपावर कम्पनी र उनीहरूका प्रतिनिधिले डिमाण्डको पूर्व र नयाँ श्रम स्वीकृति लिन फाइल लिएर ताहाचल कार्यालय पुग्नुपर्ने बाध्यता थियो ।

सम्पूर्ण प्रक्रिया अनलाइनबाट हुन थालेपछि वैदेशिक रोजगारीमा जाने कामदारले रोजगारदाता कम्पनी, आफू जाने उडान र कामका बारेमा विदेशिनुअघि नै अनलाइनबाट जानकारी लिन सक्ने विभागले जनाएको छ ।

अनलाइनबाट रोजगारदाता कम्पनीले दिने तलब, नेपालमा म्यानपावरलाई तिर्नुपर्ने सेवा शुल्क, वैदेशिक रोजगारी म्यादी बीमा, करारअवधि सकिने मितिलगायतबारे थाहा पाउन सकिने विभागले जनाएकाे छ ।

कामदार ठगिने क्रम अन्त्य

अनलाइन प्रणाली सेवा सुरु भएपछि अब श्रम कार्यालय ताहाचलमा श्रम स्वीकृतिका लागि पुगेका कामदारमाथि बिचौलियाबाट हुने ठगी रोकिने विभागको विश्वास छ ।

वैदेशिक रोजगारीमा जाने कामदार म्यानपावरका श्रम प्रतिनिधि र दलालमार्फत श्रम स्वीकृतिसँगै वैदेशिक रोजगार म्यादी बीमाका नाममा ठगिने गरेका थिए । त्यस्तै, ताहाचल आसपासमा बीमा, फोटोकपी सेन्टर र अन्य कागतजागत मिलाउन कार्यालय खोलेर बसेका बिचौलियाले विभिन्न बहानामा कामदारलाई ठग्दै आएका थिए ।

वैदेशिक रोजगारीमा जानका लागि दैनिक ३ हजारभन्दा धेरै पुनः श्रम स्वीकृति र नयाँ श्रम स्वीकृतिका फाइल आउने गरेको श्रम कार्यालय ताहाचलले जनाएको छ ।

प्रकाशित मिति: बुधबार, पुस २९, २०७७ १४:५२