पोखरा अन्तर्राष्ट्रिय म्याराथन १ फागुनमा

सांकेतिक तस्वीर

A+ A A-

भूतपूर्व खेलाडी मञ्च नेपालले पोखरामा आयोजना गर्दै आएको ‘सफल पोखरा अन्तर्राष्ट्रिय म्याराथन’ को १५औँ संस्करण आगामी १ फागुनमा हुने भएको छ ।

म्याराथनको विजेताले २ लाख तथा द्वितीयले १ लाख, तृतीयले ७५ हजार र सान्त्वनाले २५ हजार रुपैयाँ पुरस्कार प्राप्त गर्ने मञ्चले जनाएको छ ।

आयोजकका अनुसार सुन्दर पर्यटकीय नगरी पोखरालाई खेलकुदको विश्व मानचित्रमा स्थापित गराई खेलकुद पर्यटन प्रवर्द्धनका लागि म्याराथनलाई यस वर्ष पनि निरन्तरता दिइएको छ ।

यो वर्षदेखि महिलाका लागि २१ किलोमिटर (हाफ म्याराथन) पोखरा म्याराथनमा समावेश गरिएको मञ्चका अध्यक्ष तेजबहादुर गुरुङले जानकारी दिए । हाफ म्याराथनमा प्रथम, द्वितीय, तृतीय र सान्त्वनाले क्रमशः १ लाख, ७५ हजार, ५० हजार र १५ हजार रुपैयाँ नगद पुरस्कार प्राप्त गर्नेछन् ।

नेपाली खेलकुदमा महिला खेलाडीको भूमिकासँगै महिलालाई खेलतर्फ आकर्षण गर्न र उनीहरूको प्रतिभालाई उजागर गर्न हाफ म्याराथनले महत्वपूर्ण भूमिका खेल्ने उनको भनाइ छ । गण्डकी प्रदेश सरकार तथा पोखरा महानगरसँग भगिनी सम्बन्ध कायम भएका चीन, जापान, बेलायतलगायत विश्वका अन्य मुलुकका खेलाडीलाई म्याराथनमा सहभागिता गराउनका लागि प्रयास भइरहेको अध्यक्ष गुरुङले जानकारी दिए ।

कोरोना संक्रमणको सम्भावित जोखिमलाई मध्यनजर गरी अन्य विभिन्न इभेन्टलाई फरकफरक मितिमा आयोजना गरिने भएको छ । जसअन्तर्गत ह्विलचियर दौड महिला र पुरुष तथा दृष्टिविहीन दौड २२ फागुनमा हुनेछ ।

यसैगरी १० किलोमिटर महिला/पुरुष दौड आगामी १४ चैतमा र पाँच किलोमिटर छात्र/छात्रा दौड आगामी ४ वैशाखमा सञ्चालन गरिने आयोजकले जनाएको छ । १० किमि महिला/पुरुष दौडमा विजेता १५ हजार तथा द्वितीय र तृतीयले १० हजार र ५ हजार रुपैयाँ पुरस्कार प्रदान गरिने मञ्चका महासचिव खेम गुरुङले जानकारी दिए ।

ह्लिचियर र दृृष्टिविहीनतर्फका दुवै इभेन्टमा विजेताले ७ हजार, द्वितीयले ५ हजार र तृतीयले ३ हजार पुरस्कार पाउनेछन् । यसैगरी छात्र/छात्रा दौडमा प्रथमले १० हजार द्वितीयले ७ हजार र तृतीय हुनेले ४ हजार रुपैयाँ पुरस्कार प्राप्त गर्नेछन् ।

म्याराथनका लागि ५० लाख ६० हजार रुपैयाँ खर्च लाग्ने प्रारम्भिक अनुमान रहेकोमा प्रदेश सरकार, पोखरा महानगरपालिकालगायत सरकारी तथा निजी संघसंस्थाबाट सहयोग संकलन गरिने आयोजकले जनाएको छ ।

प्रकाशित मिति: मंगलबार, पुस २८, २०७७ १३:३३