नेकपा बझाङको पार्टी कार्यालयमा कार्यक्रम गर्न जिल्ला प्रशासनको रोक

A+ A A-

जिल्ला प्रशासन कार्यालय बझाङले नेकपाको पार्टी कार्यालयमा कार्यक्रम तथा भेला गर्न रोक लगाएको छ । नेकपा विभाजनको स्थितिमा पुगेपछि कार्यक्रम गर्दा झडपको स्थिति सिर्जना हुन सक्ने भन्दै सोमबार एक सूचना जारी गर्दै कानुनी रूपमा पार्टीको विवाद निरुपण नहुँदासम्मका लागि कार्यक्रम गर्न रोक लगाएको जनाएको हो ।

नेकपा अध्यक्ष तथा प्रधानमन्त्री केपी शर्मा ओली र पुष्पकमल दाहाल 'प्रचण्ड'-माधवकुमार नेपाल समूह विभाजनको अवस्थामा पुगेपछि अहिले जिल्लाभर कार्यकर्ता भेला तथा कार्यक्रम गरिरहेका छन् । दुवै पक्षले आफू आधिकारिक भएको भन्दै पार्टी कार्यालय आफ्नो भएको दाबी गर्दै आएका छन् । पार्टी कार्यालयमा दुवै समूह आफ्नो भएको भन्दै ताला लगाउने र फुटाउने गर्दै आएका थिए ।

कार्यक्रम गर्दा झडपको अवस्था सिर्जना हुने देखिएपछि स्थानीय ऐन २०२८ को दफा ६ को उपदफा ३ को (क) बमोजिम पार्टी कार्यालयभित्र पार्टीका भेला बैठक तथा अन्य कार्यक्रम संचालन नगर्न/नगराउन हुन सूचना जारी गरिएको प्रमुख जिल्ला अधिकारी कमलराज भण्डारीले बताए । नेकपाभित्रको विवादले उग्ररूप लिँदा शान्ति सुरक्षालाई ध्यानमा दिँदै कार्यालयमा हुने अप्रिय घटनाबाट बच्न यस्तो निर्णय गरिएको प्रजिअ भण्डारीको भनाइ छ । अहिले पार्टी कार्यालयमा नेपाल प्रहरी र सशस्त्र प्रहरी परिचालन गरिएको छ ।

जिल्ला प्रशासन कार्यालयले कार्यक्रम तथा भेला गर्न रोक लगाए पनि नेकपाका दुवै समूहबाट भने आधिकारिक रूपमा कुनै प्रतिक्रिया आएको छैन । यस विषयमा नेकपा बझाङ अध्यक्ष तथा प्रचण्ड-माधव समूहका नेता मीनबहादुर कुँवरसँग बुझ्दा प्रशासनले सुरक्षा सर्तकता अपनाएर रोक लगाएकाले प्रशासनको कदम सही भएको बताए ।

संविधानसभा सदस्य एवं नेकपा ओली समूहका केन्द्रीय कमिटी सदस्य अफिलाल ओखेडाले आफूहरूले पहिलेदेखि नै यस विषयमा प्रशासनलाई जानकारी गराएको भन्दै ढिलै भए पनि प्रशासनले जायज काम गरेको बताए । 'पार्टी धुव्रीकरणको चरणमा पुगेको बेला प्रचण्ड-माधव समूहका कार्यकर्ताले एकतर्फी ढंगले पार्टीको सम्पत्ति चलाउने सक्थे, पार्टी कार्यालयमा रोक लगाउने प्रशासनको कदम सही छ,' उनको भनाइ छ ।