बाजुराको बूढीनन्दामा पाँच महिनादेखि विद्युत् अवरुद्ध

फाइल तस्वीर

A+ A A-

बाजुराको बूढीनन्दा नगरपालिकाको कोल्टीमा रहेको बड्डीगाड लघु जलविद्युतको नहर पहिराले भत्काएपछि पाँच महिनादेखि विद्युत् सेवा अवरुद्ध भएको छ ।

पूर्वी उत्तरी भेगको बूढीनन्दा नगरपालिकाका-१, २, ३, र ५ मा सञ्चालन भएको बड्डीगाड लघु जलविद्युत् २५ भदौको राति गएको पहिराले नहर भत्किएपछि विद्युत् अवरोध भएको पाँच महिना बितिसक्दा मर्मत नहुँदा स्थानीयवासी अँध्यारोमा बस्न बाध्य छन् ।

पहिराले विद्युतको नहर बगाएको पाँच महिना बितिसक्दा पनि नगरपालिका र विद्युत् सञ्चालक समितिले कुनै चासो नदेखाएको सेवाग्राहीले गुनासो गरेका छन् ।

विद्युत् सेवा उपयोग गर्दै आएका स्थानीयवासी अँध्यारोबाट छुटकारा कहिले पाउने भन्नेबारेमा अन्योलमा छन् । अहिले पहिराले नहर नै बगाएको लामो समय भइसक्दा पनि निर्माण नगर्नु विद्युत् सञ्चालक समिति गैरजिम्मेवार बनेको वडा नं ३ का शुकवीर खड्काले बताए ।

विद्युतको नहर भन्दामाथि नगरपालिकाले काटेको सडकका कारण पटकपटक अवरुद्ध हुँदै आएको विद्युत् सेवा नहरमा माटो जमेर बगाएपछि हालसम्म नहर निर्माण नगर्नु सञ्चालकको लापरबाही भएको खड्काको भनाइ छ ।

सडकले गर्दा अहिले हामीले विद्युत् बाल्न नपाएको विद्युत् सञ्चालक समितिले जनाएको छ । पहिराले नहर नै बगाएपछि कुनै सम्भावना नभएपछि विद्युत् सेवा सुचारु गर्न नसकेको बड्डीगाड लघु जलविद्युतका व्यवस्थापक ध्रुव रेग्मीले बताए । आर्थिक अभावका कारणले विद्युतको नहर बनाउन समस्या भएको व्यवस्थापक रेग्मीले जनाए ।