चार सूत्रमा बाँधिएको मारवाडी सेवा समितिले नेतृत्व छान्दै, चौधरी र खेतान भर्सेस गोल्यान र गोल्छा समूह

चार सूत्रमा बाँधिएको मारवाडी सेवा समितिले नेतृत्व छान्दै, चौधरी र खेतान भर्सेस गोल्यान र गोल्छा समूह

A+ A A-

देशका प्रतिष्ठित उद्योगीहरू वसन्तुकमार चौधरी, राजेन्द्रकुमार खेतान, मदनलाल अग्रवाल, कमलेश अग्रवालसहित ३० जनाको एउटा समूह र कैलाशचन्द्र गोयल, आकाश गोल्छा, अशोककुमार तोदी, सुरेन्द्रकुमार सारडालगायतको अर्को ३० जनाको समूह अहिले एक सामाजिक संस्थाको नेतृत्वका लागि चुनावी प्रतिस्पर्धा छन् ।

८५ वर्षदेखि अस्तित्वमा रहेको मारवाडी सेवा समितिको कार्यसमितिमा आउनु भनेकाे व्यापारिक घरानाको प्रतिष्ठाको विषय पनि हो ।

विगतका वर्षहरूमा समूहगत रूपमा कार्यसमितिमा जाने व्यक्ति छनोट गरी सहमतिका आधारमा पदाधिकारी तथा कार्यसमिति छनोट गर्ने गरिए पनि अहिले भने दुई समूहमा बाँडिएको छ । एउटा समूहको नेतृत्व व्यवसायी तथा साहित्यकार वसन्त चौधरीले गरेका छन् भने अर्को समूहको नेतृत्व व्यवसायी कैलाश चन्द्र गोयलले गरेका छन् । वसन्त चौधरीको समूहलाई खेतान समूहको पनि साथ छ ।

शुक्रबार बिहान ८ देखि बेलुका ५ बजेसम्म तोकिएको मतदानमा करिब ८० प्रतिशत मतदातले मतदान गरेका छन् । ‘यसरी निर्वाचन हुने गरेको थिएन, मारवाडी सेवा समितिमा सामाजिक रूपमा प्रतिष्ठा भएको र सामाजिक कार्यमा लागेको व्यक्ति मात्रै आउने हो’, व्यवसायी कमलेश अग्रवाल भन्छन्, ‘७० जना सामाजिक क्षेत्रमा लागेका व्यक्तिहरू निर्वाचनमा प्रतिस्पर्धा गर्दा रौनक अझ बढेको छ ।’

मतदाताले मुख्यतया चार सूत्रमा राम्रो एजेण्डा प्रस्तुत गर्नेलाई मतदान गर्ने बताउँछन् । अर्थात् उम्मेदवारहरूले आफ्ना एजेण्डा चार सूत्रमा राख्ने गर्छन् । त्यो हो- सेवा, सेवा, सेवा र सेवा नै । सामाजिक सेवा, सांस्कृतिक सेवा, धार्मिक सेवा तथा आर्थिक सेवा । मुख्य नारा नै ‘सेवा नै परम् धर्म’ ।

आर्थिक सेवाअन्तर्गत व्यवसाय सहज बनाउन नयाँ नीति नियम बनाउँदा खेल्नुपर्ने भूमिका हुन्छ । उनीहरूले प्रत्यक्ष सरकारलाई भन्दा पनि व्यवसायीहरूका छाता संगठनहरूलाई सुझाव दिने गर्छन् ।

त्यस्तै, व्यवसाय विस्तार, व्यवसाय सञ्चालन गर्नका लागि सहयोग गर्ने हुन्छ । सामाजिक कार्यअन्तर्गत विभिन्न प्रकारका महामारी तथा विपत्तिमा सहयोग पुर्‍याउने हुन्छ भने धार्मिक तथा सांस्कृतिक सेवाअन्तर्गत विभिन्न मेला तथा पर्वमा स्वयम्‌सेवकको काम गर्ने तथा नि:शुल्क प्रसाद वितरण तथा बासस्थानका व्यवस्था मिलाउने सेवा हुन्छ ।

१६ सय ४१ जना मतदाता रहेको साे समितिको नयाँ कार्यसमितिका लागि गरिएको निर्वाचनको परिणाम शनिबार दिउँसोसम्म आउने निर्वाचन समितिले जनाएको छ । समूहगत रूपमा जसले निर्वाचन जित्छ, त्यसकै आधारमा सामूहिक नेतृत्वमा पदाधिकारी छनोट गर्ने व्यवस्था गरिएको छ । त्यसमा पनि सहमति हुन नसकेको खण्डमा निर्वाचित सदस्यहरूमध्येबाट पदाधिकारीका लागि निर्वाचन हुनेछ ।

१९९१ सालको भूकम्पपछि कसरी स्वयम्‌ सेवा गर्ने भन्ने विषयमा छलफल चल्ने क्रममा सेवा समिति गठन गरेर कार्य गर्ने भन्दै समिति गठन भएको व्यवसायी अग्रवालको भनाइ छ । वैधानिक रूपमा भने २०१० सालमा यो समिति गठन भएको हाे ।

यो समितिमा प्रतिष्ठित व्यवसायीहरू राजेन्द्र खेताङ, हुलासचन्द्र गोल्छालगायतमा व्यवसायीले नेतृत्व गरेका छन् । अहिले पूर्वसांसद तथा व्यवसायी श्रवणकुमार अग्रवाल अध्यक्षमा छन् भने आगामी कार्यसमितिमा आउनका लागि निजीक्षेत्रका प्रतिनिधिमूलक छाता संगठन नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्सको कार्यसमितिमा रहेका दर्जन व्यवसायीले समितिको कार्यसमितिका लागि उम्मेदवाारी दिएका छन् ।

व्यसायीहरूले मारवाडी सेवा समिति, नेपाल विशुद्ध मानवीय सेवा कार्यमा समर्पित संस्था भएको दाबी गरेका छन् । ‘जबजब नेपाली समाजमा मानवीय सङ्कट आउँछ, तबतब समिति अग्रपङ्तिमा देखा पर्दै आएको छ’, अध्यक्ष श्रवण अग्रवाल भन्छन्, ‘२०७२ सालको विनाशकारी महाभूकम्पमा पनि जनताका घरघरमा पुगेर सेवा गरेको थियो । अहिलेको कोरोना भाइरस (कोभिड- १९) महामारिमा पनि निरन्तर मानव सेवामा लागिरहेको छ ।’

मारवाडी सेवा समिति नेपालले २०१० देखि निरन्तर निःशुल्क होमियोपेथिक चिकित्सालय सञ्चालन गरिरहेकाे छ । नेपालका व्यावसायिक घरानाहरूको भावनात्मक सम्बन्ध जोडिएका कारण पनि यसको कार्यसमितिमा रहनु व्यवसायीका लागि प्रतिष्ठाको विषय हो ।

फोटो : सुशील श्रेष्ठ

प्रकाशित मिति: शुक्रबार, पुस २४, २०७७ १७:४३