प्रभु बैंकः आगामी वर्ष लाभांश बढाउने सम्भावना

A+ A A-

प्रभु बैंकले चालू आर्थिक वर्षको तेस्रो त्रयमास (चैतमसान्त)सम्मको आयव्यय विवरण सार्वजनिक गरेको छ ।

निक्षेप र कर्जा

बैंकले चालू अवधि (चैत मसान्त)सम्ममा १ खर्ब ७ अर्ब रुपैयाँ निक्षेप संकलन गरेर ८६ अर्ब १६ करोड रुपैयाँ कर्जा लगानी गरेको छ । निक्षेप र कर्जा क्रमशः १० र १६ प्रतिशत बढेको छ ।

ब्याज, ब्याज खर्च र खुद ब्याज आम्दानी

कर्जा लगानीबाट ८ अर्ब १ करोड रुपैयाँ ब्याज आम्दानी गरेको छ । निक्षेपको ब्याज खर्च रकम ४ अर्ब ६४ करोड रुपैयाँपछि ३ अर्ब ३७ करोड रुपैयाँ खुद ब्याज आम्दानी गरेको छ । ब्याज आम्दानी ३५ प्रतिशत, ब्याज खर्च १७ प्रतिशत र खुद ब्याज आम्दानी ७३ प्रतिशत बढेको छ ।

अन्य र खुद आम्दानी

शुल्क तथा कमिसनबाट ४८ करोड ४० लाख रुपैयाँ खुद आम्दानी गरेको छ । यस्तो आम्दानी अघिल्लो वर्षभन्दा २० प्रतिशत बढेको छ ।

नोक्सानी व्यवस्थाअघिको कुल सञ्चालन आम्दानी ४ अर्ब २५ करोड रुपैयाँ छ । यस्तो आम्दानी अघिल्लो वर्षभन्दा ५६ प्रतिशत बढेको छ ।

नोक्सानी व्यवस्थापछिको खुद सञ्चालन आम्दानी ४ अर्ब ५ करोड रुपैयाँ छ । यस्तो आम्दानी अघिल्लो वर्षभन्दा २१ प्रतिशत बढी छ ।

कर्मचारी खर्च, सञ्चालन खर्च र ह्रास कट्टी व्यवस्थापछिको सञ्चालन आम्दानी २ अर्ब ९ करोड रुपैयाँ छ । यस्तो आम्दानी अघिल्लो वर्षभन्दा २५ प्रतिशत बढी हो ।

गैरसञ्चालन आम्दानी तथा खर्च र आयकरपछि १ अर्ब ४५ लाख रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा ६० प्रतिशत बढेको छ ।

नाफा–नोक्सान बाँडफाँट

चालू अवधि (चैत मसान्त)सम्मको खुद नाफाअनुसार विभिन्न कोषमा नियमकीय प्रावधानअनुसार रकम व्यवस्था गरेपछि बैंकको सञ्चित नाफा रकम १ अर्ब १४ करोड रुपैयाँ कायम हुनेछ । यो रकम पूर्ण रूपमा लाभांशको रुपमा बाँडफाँट हुन सक्दैन । हुनलाई यो रकम सम्पूर्ण खर्च, कर दायित्व र नियमकीय प्रबन्धपछिको भए पनि सबै रकम लाभांशमा बाँडिने सुनिश्चित हुन्न ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम १ अर्ब ५२ करोड रुपैयाँ हुने अनुमान गर्न सकिन्छ ।

पुँजी र कोषहरु

बैंकको पुँजी ८ अर्ब २३ करोड रुपैयाँ छ । बैंकसँग १५ करोड १९ लाख रुपैयाँ प्रिमियम रकम देखिएको छ । चैत मसान्तसम्मको नाफा बाँडफाँटपछिको वितरणयोग्य हुन सक्ने रकमसहित १ अर्ब ९० रुपैयाँ सञ्चित नाफा देखिन्छ । वैधानिक जगेडा, अन्य जगेडा र सम्भवत सम्पत्ति पुनर्मूल्यांकनबाट सिर्जित रकमसमेत जोड्दा बैंकको जगेडा कोष ३ अर्ब ७० करोड रुपैयाँ देखिन्छ । सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । चुक्ता पुँजी विभिन्न कोषहरुसहित सेयरधनीको कोष १४ अर्ब पुगेको छ । पुँजीकोष अनुपात ११.४४ प्रतिशत छ ।

अन्य महत्त्वपूर्ण सूचक

खराब कर्जा २.४२ प्रतिशत, कोषको लागत ६.१८ प्रतिशत, कर्जा निक्षेप अनुपात ७६ प्रतिशत, आधार दर ९.१६प्रतिशत, ब्याज अन्तर ४.८८ प्रतिशत, प्रतिशेयर आम्दानी २३ रुपैयाँ ३४ पैसा (वार्षिकीकरण गरिएको) र नेटवर्थ १७० रुपैयाँ छ ।

विशेष टिप्पणी

बैंकले वित्तीय प्रतिवेदन सार्वजनिक गर्दा केही सामान्य त्रुटि गरेको छ । आव २०७४–७५ को वार्षिक साधारणसभा सम्पन्न गरेको र उक्त सभामा पेस गरिएको ८ प्रतिशत बोनस सेयर पारित भएर चुक्ता पुँजी बढेको रकम वित्तीय विवरणमा देखाएको छैन । ८ प्रतिशत बढेको पुँजी बढेकाले बैंकको चुक्ता पुँजी ८ अर्ब ८८ करोड रुपैयाँ हुन्छ । पूँजी बढेको हुँदा प्रतिसेयर आम्दानी सोहीअनुरुप समायोजन गरिएको छैन । समायोजित प्रतिसेयर आम्दानी करिब २२ रुपैयाँ हुन्छ । त्यस्तै, नेटवर्थ पनि समायोजन भएर करिब १५८ रुपैयाँ हुन्छ ।

प्रकाशित मिति: सोमबार, वैशाख २३, २०७६ ०२:१७