डीएसपी र जेलभित्रका गुन्डा नाइकेबीच साठगाँठ, प्रहरीमा तरंग

A+ A A-

बिहीबार निलम्बनमा परेका इलाका प्रहरी कार्यालय चन्द्रनिगाहापुरका प्रमुख प्रहरी नायब उपरीक्षक (डीएसपी) कुमोद ढुंगेलले गुन्डा नाइके सुजन पौडेल (रमेश बाहुन)सँग नियमित सम्पर्क हुने गरेको खुलेको छ ।

हत्या, ज्यान मार्ने उद्योग, लागूऔषध कारोबार र हातहतियार खरजाना मुद्दामा जेल परेका बाहुनसँग ढुंगेलको नियमित टेलिफोन सम्पर्क हुने गरेको पाइएको हो । बाहुन हाल पुर्पक्षका लागि केन्द्रीय कारागार सुन्धारामा थुनामा छन् ।

गत २६ चैतमा रानीबारीका लालेन्द्र शेरचनको घर डकैती तथा लुटपाट घटनाका अभियुक्त विक्रम श्रेष्ठसँग घटना भएको भोलिपल्टै ढंगेलले भेट गरेको तथ्य खुलेपछि उनी निलम्बित भए ।

चन्द्रनिगाहापुरमा रहेका ढंगेल सिमरा विमानस्थल हुँदै २२ चैतमा बुद्ध एयरबाट काठमाडाैं आएका थिए ।

गुन्डा नाइके विक्रम (प्रहरीको भाषामा टोले गुन्डा)सँग साठगाँठ रहेको थाहा भएपछि अनुसन्धानको घेरामा रहेका ढुंगेलको जेलमा रहेका अर्का गुन्डा नाइके बाहुनसँग नियमित फोन सम्पर्क हुने गरेको प्रमाण फेला परेको हो ।

ढुंगेलले शेरचनको घरमा डकैती गर्ने विक्रम श्रेष्ठलाई महाराजगन्जको भेनस रेस्टुरेन्टमा भेटेका थिए । त्यसपछि पनि उनीहरुबीच निरन्तर फोन सम्पर्क हुने गरेको पाइएपछि डीएसपी ढुंगेल निलम्बनमा परेका थिए ।

प्रहरी प्रधान कार्यालयको सिफारिसमा ढुंगेललाई गृह मन्त्रालयले निलम्बन गरेको हो । ढुंगेलमाथि अनुसन्धान गुर्नपर्ने देखिएकाले उनलाई निलम्बन गरिएको प्रहरी प्रवक्तामा प्रहरी वरिष्ठ उपरीक्षक (एसएसपी) उत्तमराज सुवेदीले जानकारी दिए ।

लालेन्द्र शेरचनको घरमा डकैती गर्ने तीनजनालाई अपराध महाशाखाको टोलीले ६ वैशाखमै पक्राउ गरिसकेको छ । पक्राउ पर्नेमा चन्द्रागिरि नगरपालिका–८ का ३८ वर्षीय नवराज तामाङ, नुवाकोट बेलकोटगढी नगरपालिका–४ घर भई नैकाप बस्ने २८ वर्षीय
‘दीपेश’ भन्ने सन्तबहादुर तामाङ र नैकापकै विक्रम श्रेष्ठ छन् ।

विक्रम श्रेष्ठको बयान र मोबाइलमा भेटिएका म्यासेजका आधारमा डीएसपी ढुंगेल उनीसँग सम्पर्कमा रहेको खुलेको थियो । आपराधिक समूहसँगको साठगाँठ देखिएपछि प्रहरीले उनीमाथि थप अनुसन्धान गर्दा बाहुनसँगको सम्बन्धसमेत खुलेको हो ।

श्रेष्ठ समूहले शेरचन, उनकी श्रीमती र घरमा काम गर्न आएकी मिठु थकालीलाई धारिलो हतियार देखाउँदै हातखुट्टा बाँधेर मुखमा टेपसमेत टाँसी घरबाट ५ लाख ६० हजारबराबरको धनमाल लुटेका थिए ।

शेरचनको घरमा ३ करोड रुपैयाँ रहेको सूचना पाएपछि श्रेष्ठ समूह त्यहाँ लुट्न गएका थिए । तर, शेरचन परिवारले घर किन्न पोखरा पैसा पठाएका कारण लुटिनबाट जोगिएको थियो । लुटपाटको घटनाबारे डीएसपी ढुंगेललाई पूर्वजानकारी थियो भन्ने प्रहरीको शंका छ ।

श्रेष्ठले सन्तकुमार तामाङको नम्बरसमेत घटना हुनुभन्दा केही दिनअघि सामाजिक सञ्जाल ह्वाट्स एप्स मार्फत डीएसपी ढुंगेललाई पठाएको देखिएपछि ढुंगेल थप शंकाको घेरामा परेका थिए ।

जेलभित्रैबाट बाहुनले किन गर्छन् डीएसपीलाई बारम्बार फोन ?

पूर्वपरिचित डीएसपी ढुंगेल र बाहुनबीच कारागारभित्रैबाट समेत नियमित टेलिफोन सम्पर्क हुने गरेको प्रमाण फेला परेको छ ।

केन्द्रीय कारागारमा रहेका रमेशले जेलले उपलब्ध गराएको समयमा जेलभित्रकै नम्बरबाट ढुंगेललार्ई सम्पर्क गरेको भेटिएको हो ।

(हेर्नुहोस्, ढुंगेल र रमेश बाहुनबीचको टेलिफोन सम्पर्कको विवरण)जेलमा रहेका कैदीले सातामा तीनपटक फोन गर्न पाउँछन् । यस्तो फोन एकपटकमा तीनजनालाई गर्न पाइन्छ । बाहुनले पाउने फोन सेवाका दिन प्रायः ढुंगेललाई सम्पर्क गरेको पाइएको छ ।

महानगरीय प्रहरी परिसर काठमाडौंले बाहुनलाई लागूऔषध खैरो हेरोइन र नल कटुवा पेस्तोलसहित कलंकीबाट ११ असार २०७१ मा पक्राउ गरेको थियो । पक्राउपछि केन्द्रीय कारागार सुन्धारामा पुर्पक्षका लागि जेल चलान भएका बाहुनसँग ढुंगेलको नियमित सम्र्पक हुने गरेको पाइएको हो ।

दुई वर्षअघि २३ असोज २०७४ मा तत्कालीन निर्माण व्यवसायी संघका अध्यक्ष शरदकुमार गौचनको हत्याको केही महिनामै उनीहरुबीच निरन्तर सम्पर्क भएको माथिको विवरणबाट देखिन्छ ।

गौचनको हत्या समीरमानसिंह बस्नेत समूहले गरेको थियो । बाहुनसमेत त्यही समूहका हुन् । प्रहरी स्रोतका अनुुसार गौचन हत्यामा संलग्न बोका भनिने गंगा लिङ्देन रमेशका विश्वास पात्र हुन् । उनी अझै फरार छन् ।

गौचन हत्यामा संलग्न समीरमानसिंह समूहका अन्य सदस्य लोप्साङ लामा, श्याम गुम्बे, अमर राना र रोशन बुढाथोकी पक्राउ परिसकेका छन् । मनोज र सोम आले प्रहरीको इन्काउन्टरमा मारिएका थिए ।

गौचन हत्याको केही महिनादेखि रमेशले डीएसपी ढुंगेलका ९८५१२९९९७७, ९८५११८००००, ९८५४०५५५५५, ९८०११८१०००, ९८०८२३७०८२ नम्बरमा सम्पर्क गरेको पाइएको छ । अपराध अनुसन्धानका क्रममा फरार अभियुक्तसँग प्रहरीको सम्पर्क हुनुलाई सामान्य मानिए पनि जघन्य अपराधमा जेल चलान भएका व्यक्तिसँग कारागारभित्रबाटै सम्पर्क हुनलाई सामान्य तरिकाले हेर्न नमिल्ने प्रहरी अधिकारीको भनाइ छ ।

प्रहरी प्रवक्ता एसएसपी उत्तम सुवेदी पनि अपराधीसँगको सूचना संकलनका लागि सम्पर्क हुनलाई जायज मानिने बताउँछन् । उनी भन्छन्, ‘सर्पको खुट्टा सर्पले नै देख्छ भनेझैं अपराधीको सूचना अपराधीसँग मात्र हुन्छ । त्यो प्रयोजनका लागि सम्पर्क भएको हो भने राम्रै हो । तर, अन्य उद्देश्यले सम्पर्क भएको हो भने त्यो अपराध हो, अनुसन्धान हुन्छ ।’

बाहुनसँगको सम्पर्कबारे ढुंगेलसँग प्रतिक्रिया लिन खोज्दा उनले पछिल्लो समय बोक्दै आएका ९८५११८०००० र ९८०८२३७०८२ को नम्बरमा सम्पर्क हुन सकेन ।

यसरी भयो डीएसपी ढुंगेल र रमेश बाहुनको भेट

गुन्डा नाइके भनेर चिनिएका रामेछाप दुरागाउँ–७ का हुन्, रमेश बाहुन । नेपाली सेनाको जागिर छाडेर अपराध कर्ममा लागेका रमेश छोटो समयमै गुन्डागर्दी सर्कलमा चर्चामा आएका थिए ।

सेनामा हुँदा नै हतियारबारे ज्ञान पाएका कारण पनि उनी छोटो समयमै चर्चामा आएको प्रहरी अधिकारीको भनाइ छ ।
‘उनी अपराध कर्ममा लाग्दा सुरुमा एक्लै थिए, आफैं गोली चलाउँथे,’ एक प्रहरी अधिकारीले भने । गुन्डा सर्कलका खास नाइके भन्न मिल्ने नै रमेश भएको प्रहरी अधिकारी नै बताउँछन् ।

निर्माण व्यवसायीबाट चन्दा असुल्दै आएका उनले ललितपुरका मीनकृष्ण महर्जनलाई समेत गोली हानी घाइते बनाएका थिए । त्यसपछि फरार बाहुनको भेट अर्का चर्चित गुन्डा नाइके काठमाडौं बाफलका समीरमानसिंह बस्नेतसँग भएपछि उनीहरुको सन्जाल झन् बलियो बनेको प्रहरीको भनाइ छ ।

त्यतिखेर समीर अर्का गुन्डा नाइके कुमार घैंटेसँग मिलेर काम गर्दै थिए । घैंटे ३ भदौ २०७२ मा प्रहरीको इन्कान्टरमा मारिसकेका छन् ।

समीरकै समूहमा हुँदा बाहुनले डीएसपी कुमोद ढुंगललाई चिनेका हुन् । प्रहरी स्रोतका अनुसार डीएसपी ढुंगेल र समीरमानसिंह नाताले दाजुभाइ भएका कारण पनि समीरमानको कार्ड प्रयोग गरेर ढुंगेलसँग बाहुन नजिक हुन पुगेको कतिपय प्रहरी अधिकारीको बुझाइ छ । यसपछि उनीहरुको सम्पर्क बढेको हो ।

समीरमानले गुन्डा सर्कलको सूचना ढुंगेललाई दिँदै आएका थिए ।

प्रकाशित मिति: आइतबार, वैशाख २२, २०७६ २३:२७