१८ औँ आहा रारा गोल्ड कपबाट १९ लाख बचत

फाइल तस्वीर

A+ A A-

सहारा क्लब पोखराको आयोजनामा गत वर्ष सम्पन्न १८औँ संस्करणको राष्ट्रिय तथा अन्तर्राष्ट्रिय आमन्त्रित आहा रारा गोल्डकप फुटबल प्रतियोगिताबाट १८ लाख ९७ हजार ६ सय ५७ बचत भएको छ ।

गत वर्ष २१ फागुनदेखि १ चैतसम्म पोखरा रङ्गालामा सञ्चालन भएको प्रतियोगिताबाट ८८ लाख १० हजार ३ सय ६६ रुपैयाँ आम्दानी भएकोमा प्रतियोगिता सम्पन्न गर्न ६९ लाख १२ हजार ७ सय ९ रुपैयाँ खर्च भएर सो रकम बचत भएको क्लबले आज विज्ञप्तिमार्फत जनाएकोे हो ।

प्रतियोगिताबाट बचत रकम पोखरा महानगरपालिका-१७ दोविल्लामा क्लबद्वारा सञ्चालित फुटबल एकेडेमीका बालकको आवास तथा शिक्षादिक्षामा खर्च गरिने क्लबका अध्यक्ष केशवबहादुर थापाले बताए । सहाराले एक दशकभन्दा अघिदेखि एकेडेमी सञ्चालन गरेर देशका लागि आवश्यक राष्ट्रिय तथा अन्तरराष्ट्रिय फुटबल खेलाडी उत्पादन गर्दै आएको छ ।

प्रतियोगिताको प्रवेश टिकटबाट २८ लाख ७ हजार ४ सय ७०, व्यानर तथा आर्थिक सहयोगबाट १६ लाख ६८ हजार ७ सय ७२ रुपैयाँ, सिजनल टिकटबाट ३६ हजार, बैंक व्याज आम्दानीबाट ४२ हजार १ सय ४५ रुपैयाँ आम्दानी भएको प्रतियोगिताका आर्थिक संयोजक सुनिल गुरुङले जानकारी दिए ।

प्रतियोगिताको मुख्य प्रायोजक हिमश्री फुड्सबाट १२ लाख ५१ हजार, गण्डकी प्रदेश सरकारबाट १० लाख, राष्ट्रिय खेलकूद परिषद्लगायतका संस्था लगायतबाट सहयोग प्राप्त भएको क्लबले जनाएको छ ।

प्रतियोगितामा खेलाडी दैनिक भ्रमण खर्चबापत २५ लाख सात हजार १ सय ६८, प्रोत्साहन खर्च रु १६ लाख १२ हजार, प्रतियोगिता सञ्चालन तथा व्यव्स्थापनमा रु छ लाख ८२ हजार ७ सय ५० रुपैयाँ लगायतका शीर्षकमा खर्च भएकोे क्लबका कोषाध्यक्ष राजु लालचनले जानकारी दिए । उनका अनुसार कोरोनाका कारणले गर्दा अझै पनि केही रकम सङ्कलन हुन बाँकी रहेकाले आयव्यय सार्वजनिक गर्न ढिलाइ भएको हो ।

प्रकाशित मिति: बुधबार, पुस २२, २०७७ १९:३८