तरकारी खेतीमा दलित महिला, भन्छन्, ‘अब गिट्टी कुट्न पर्दैन, इँटा पनि बोक्न पर्दैन’

तरकारी खेतीमा दलित महिला, भन्छन्, ‘अब गिट्टी कुट्न पर्दैन, इँटा पनि बोक्न पर्दैन’

राधाकृष्ण कृषक समूहकी सदस्य विनिता राम

A+ A A-

सप्तरीको सुरुङ्गा नगरपालिकामा दलित समुदायका महिलाले सामूहिक तरकारी खेतीबाट मनग्य आम्दानी गर्न थालेका छन् । यसअघि चुलोचौकामा सीमित वडा नम्बर ७, चकदहका दलित महिला तरकारी खेतीबाट आत्मनिर्भर बनेका हुन् ।

खेतमा लटरम्म फलेका घिरौला, भिन्डी, करेला बेचेर आएको आम्दानीबाट उनीहरूले घर गर्जो टार्नेदेखि छोराछोरीको शिक्षामा लगानीसमेत गर्न थालेका छन् ।

गैरसरकारी संस्थाहरूको सहयोगमा राधाकृष्ण कृषक समूह गठन गरी चकदहका महिलाहरू तरकारी खेतीमा जुटेका हुन् । समूहमा १८ महिला रहेका र उनीहरू सबै आत्मनिर्भर बनेकाे समूहकी अध्यक्ष राजबत्तीदेवी कामैतले बताइन् ।

राधाकृष्ण कृषक समूहकी अध्यक्ष राजबत्तीदेवी कामैत

‘गैरसकारी संस्थाहरूको सहयोगमा सञ्चालित समुन्नति परियोजनाबाट हामीलाई सहायता छ । अहिले हाम्रो गाउँका महिला साथीहरूले आफ्नो खर्चका लागि श्रीमान्‌को आस गर्नै पर्दैन’, उनले भनिन्, ‘अब हामीले गिट्टी कुट्नु पर्दैन, इँटाभट्टामा काम पनि गर्नु पर्दैन ।’

उनका अनुसार अहिले एक महिलाले मासिक २० हजार रुपैयाँसम्म आम्दानी गर्न थालेका छन् । ‘जबकि पहिला चुलोचौकोमै महिलाहरूको दिन बित्थ्यो’, उनले भनिन् ।

आफूले उत्पादन गरेको तरकारी लहान , कदमाहा, कुसाहालगायत बजारमा बिक्री गर्ने गरेका छन् ।

समूहकी अध्यक्ष राजबत्तीदेवीका अनुसार गाउँका दलित महिलालाई पहिला कसैले सय रुपैयाँ ऋण पनि पत्याउँदैन थिए ।

राधाकृष्ण कृषक समूहकी सदस्य फूलमतीया राम

तरकारी खेती गर्न थालेपछि भने सरकारी तथा गैरसरकारी संस्थाहरूले पनि सहयोग गर्न थालेका छन् । ‘तरकारी खेतीलाई व्यावसायिक बनाउन महिला साथीहरूलाई विभिन्न संस्थाले बिउबिजन, उपकरण, सिँचाइ सुविधामा सहयोग गर्न थालेका छन्’, उनले भनिन् ।