त्रिलोचनप्रति मन्त्री लेखराजको आक्रोश : मुख्यमन्त्रीमा राजनीतिक आचरण र संस्कार देखिएन

त्रिलोचनप्रति मन्त्री लेखराजको आक्रोश : मुख्यमन्त्रीमा राजनीतिक आचरण र संस्कार देखिएन

A+ A A-

उद्योग वाणिज्य तथा आपूर्तिमन्त्री लेखराज भट्ट सुदूरपश्चिम प्रदेशका मुख्यमन्त्रीप्रति आक्रोशित बनेका छन् । पार्टी विभाजनअघि मन्त्री भट्टका विशेष पात्र मानिने मुख्यमन्त्री त्रिलोचन भट्ट पार्टी फुटपश्चात् प्रचण्ड–माधव नेपाल समूहमा लागेपछि उनी आक्रोशित बनेका हुन् ।

मुख्यमन्त्री भट्टलाई राजनीतिक संस्कार नभएको बताउँदै उनले राजनीतिक आचरण र संस्कार नभएकाले समूहमा लागेको बताए । मुख्यमन्त्री भट्टले भौतिक पूर्वाधार विकासमन्त्री पठानसिंह बोहरालाई बर्खास्त गरेर राजनीतिक संस्कारविपरीत काम गरेको उनले बताए ।

सोमबार धनगढीमा आयोजित पत्रकार सम्मेलनमा बोल्दै मन्त्री भट्टले तत्कालै प्रदेश सरकार फेरवदलको कसरत नहुने पनि बताए । संस्थापनले कसैलाई बदलिहाल्ने र कसैसँग गठबन्धन गरिहाल्नेबारे नसोचेको बताउँदै प्रचण्ड-नेपाल समूहले के कस्ता क्रियाकलप गर्छन् त्यसैमा भर पर्ने बताए ।

प्रचण्ड-नेपाललाई गम्भीरतापूर्वक संघीय सरकार र पार्टी नेतृत्वले हेरिरहेको पनि उनले उल्लेख गरे । छिट्टै स्थायी कमिटी बैठक बस्ने बताउँदै उनले उनीहरूविरुद्ध कस्तो कदम चाल्नेबारे निर्णय गर्ने बताए ।

नेकपा प्रदेश कमिटी अध्यक्ष कर्ण थापाले अध्यक्षविना गरिएका सम्पूर्ण निर्णय आफूलाई अमान्य रहेको भन्दै खारेज गर्ने बताए । केही दिनअघि नेकपा प्रचण्ड-माधव समूहको प्रदेश समिति बैठकको निर्णयलाई लक्षित गर्दै अध्यक्ष थापाले आफूलाई मान्य नभएको भन्दै आपत्ति जनाएका हुन् ।

अध्यक्ष थापाले प्रदेश समितिको खाताबाट निकालिएको रकमप्रति पनि कडा आपत्ति व्यक्त गरे । खातामा रहेको रकम ३० लाख रुपैयाँ नेता भीम रावलको योजनामा निकालिएको जुन विधि पद्धति र नैतिक आचरणविपरीत रहेको पनि उनको भनाइ छ ।

प्रकाशित मिति: सोमबार, पुस २०, २०७७ १९:३४