वरिष्ठ उपाध्यक्ष ढकाल गृह जिल्लामा सम्मानित

A+ A A-

नेपाल उद्योग वाणिज्य महासंघका वरिष्ठ उपाध्यक्ष एवम् आईएमई ग्रुपका अध्यक्ष चन्द्रप्रसाद ढकाल बागलुङ जिल्लाका विभिन्न संघसंस्थाबाट सम्मानित भएका छन् ।

ग्रुपका विभिन्न कम्पनीले आयोजना गरेका व्यावसायिक कार्यक्रमलाई सम्बोधन गर्न गृह जिल्ला बागलुङ पुगेका ढकाललाई त्यहाँका स्थानीय संघ-संस्थाले छुट्टाछुट्टै कार्यक्रमको आयोजना गरी सम्मान गरेका हुन् ।

बागलुङ जिल्लाकै पुरानो विद्यालय विद्या मन्दिर माध्यमिक विद्यालयले एक कार्यक्रमकाे आयोजना गरी स्वस्तिवाचनसहित ढकाललाई सम्मान गरेको छ ।

सर्वोच्च अदालतका पूर्वप्रधानन्यायाधीश कल्याण श्रेष्ठको प्रमुख आतिथ्यमा सम्पन्न उक्त कार्यक्रमलाई सम्बोधन गर्दै वरिष्ठ उपाध्यक्ष ढकालले विद्यालय समुदायसँग नजोडिँदा गुणस्तर र विद्यार्थीको शैक्षिक चरित्रमा असर परेको बताए । सामुदायिक विद्यालयमा गुणस्तरीय शिक्षा अहिलेको आवश्यकता रहेको उनको भनाइ थियो ।

जिल्लाको गहनाकाे रूपमा रहेको विद्या मन्दिर माविका विद्यार्थीलाई भविष्यमा आउने हरेक चुनौतीसँग जुध्न सक्ने बनाउने र उनीहरूको शैक्षिक क्षमता बलियो बनाइदिने महान् कार्य शिक्षकहरूको हातमा रहेको उनकाे धारणा थियाे । यसका लागि गुणस्तरीय शिक्षामा जोड दिँदै त्यसलाई अझ प्रभावकारी बनाउने दायित्व विद्यालयको भएको उनले बताए ।

त्यस्तै, वरिष्ठ उपाध्यक्ष ढकाललाई बैंकर्स बागलुङले पनि सम्मान गरेको छ । साे कार्यक्रममा ढकालले पेसागत हकहितको पक्षमा काम गर्ने प्रतिवद्धता व्यक्त गरे । सम्मान कार्यक्रम बैंकर्स बागलुङका अध्यक्ष दीपक शर्माको अध्यक्षता, सचिव ओमप्रकाश पौडेलको सञ्चालान, सदस्य सुदीप राजभण्डारीको स्वागत मन्तव्यमा सम्पन्न भएको थियो ।

नेपाल उद्योग वाणिज्य महासंघको वरिष्ठ उपाध्यक्षमा निर्वाचित भएपछि ढकाल पहिलो पटक गृह जिल्लामा पुगेका हुन् । साे अवसरमा बागलुङआसपासमा क्रियाशील विभिन्न संघ–संस्थाले सम्मान कार्यक्रमको आयोजना गरी स्थानीय क्षेत्रको आर्थिक विकासमा देखिने गरी लगानी गर्न ढकाललाई अनुरोध गरे ।

प्रकाशित मिति: सोमबार, पुस २०, २०७७ १७:२१