इन्धनमा गाउँपालिकाकाे अचाक्ली खर्च, अध्यक्षकाे जवाफ, 'कर्मचारीले गरे कि !'

A+ A A-

सप्तरीकाे छिन्नमस्ता गाउँपालिकाले एक वर्षमा इन्धन र सवारी साधन मर्मतमा ३७ लाखभन्दा बढी रकम खर्च गरेकाे छ । शिलापत्रलाई प्राप्त विवरणअनुसार गाउँपालिकाले इन्धन र सवारी साधन मर्मतसम्भार शीर्षकमा कुल ३७ लाख ५४ हजार १ सय ४४ रुपैयाँ खर्च गरेकाे हाे ।

चालू आर्थिक वर्षकाे बजेट नै ल्याउन नसकेकाे गाउँपालिकाले खर्च भने मनलाग्दी गरेकाे देखिन्छ ।

इन्धनमा यति बिघ्न खर्च कसरी भयाे ?

गाउँपालिका अध्यक्ष सूर्यनारायण मण्डल (कुरुड) काे जवाफ अनाैठाे छ, 'कर्मचारीहरूले भ्रष्टाचार गरेको हुन सक्छ । तर, मैलेचाहिँ एक रुपैयाँ पनि हिनामिना गरेकाे छैन ।'

पालिकामा भ्रष्टाचार गर्ने जाेकाेही भए पनि कारबाही हुनुपर्ने उनी बताउँछन् । तर, उनले इन्धनमा भएकाे ३७ लाख खर्चबारे चित्तबुझ्दाे तर्क गर्न सकेनन् ।

वडा अध्यक्षकाे अर्कै कुरा

गाउँपालिकामा मनलाग्दी खर्च भइरहेकाे स्वीकार गर्छन्, वडा नम्बर ३ का अध्यक्ष दीपेन्द्रकुमार यादव । भन्छन्, 'असार १० गतेभित्र नै गाउँसभामा वार्षिक बजेटसहितको नीति तथा कार्यक्रम ल्याउनुपर्ने थियाे । तर, अहिलेसम्म ल्याइएकाे छैन । खर्चचाहिँ मनलाग्दी भइरहेकाे छ । गाउँसभा त कहिले हाे कुनै टुंगाे छैन । असारे बजेट सिध्याएर हिँडेका प्रमुख प्रशासकीय अधिकृत फर्केर आएका छैनन् ।’

उनका अनुसार प्रमुख प्रशासकीय अधिकृत खेमराज थापा लामाे समयदेखि कार्यालय आएका छैनन् । 'उहाँले आफू नहुँदा काम गर्ने अख्तियारी पनि कसैलाई दिनुभएकाे छैन ।यसले कार्यालयको दैनिक कामकाजमा पनि अप्ठेराे भएकाे छ । बेथिति यसबाट पनि पुष्टि हुन्छ ।'

आफूहरूले गाउँपालिकाको बेथितिबारे पटक-पटक कुरा उठाउँदा पनि पालिकाका अध्यक्षले ध्यान नदिएको उनको गुनासो छ । गाउँपालिकामा व्यापक अनियमिता भएका कारण आफूहरूलाई आयव्यय विवरण हेर्नसमेत नदिएको बताउँदै वडा अध्यक्ष यादव थप्छन्, ‘गाउँपालिकाका पदाधिकारीहरूको मिलोमतोमा कागज मिलाएर करोडौं रकम हिनामिना भएकाे छ, कमसेकम एकपटक अख्तियारको टोली आएर हेरिदिए सबै कुरा छर्लङ्ग हुन्छ ।’

बजेट कहिले ?

स्थानीय सरकार सञ्चालन ऐन, ०७४ र अन्तर सरकारी वित्तीय व्यवस्थापन ऐन, ०७४ को व्यवस्थाअनुसार स्थानीय तहले १० असारभित्र सभामा बजेट पेस गर्नुपर्छ । सभामा पेस भएको बजेटमाथि १५ दिनभित्र छलफल गरी पास गर्ने वा चित्त नबुझे संशोधन गर्न कार्यपालिकामै फर्काउने प्रावधान छ । त्यही बजेटबाट १ साउनदेखि खर्च सुरु हुन्छ । तर, छिन्नमस्ता गाउँपालिकाले ६ महिना बित्न लाग्दासमेत आर्थिक वर्ष २०७७/०७८ काे बजेट ल्याएकाे छैन ।

गाउँसभा नबस्दा सात महिनादेखि सामाजिक सुरक्षा भत्ता वितरण र कर्मचारीले तलब राेकिएकाे छ ।

प्रकाशित मिति: सोमबार, पुस २०, २०७७ १३:१३