संसद् विघटनबारे संविधानमा स्पष्ट प्रावधान छैन, प्रदेशसभा विघटन हुन सक्छ : मन्त्री तुम्बाहाङ्फे

संसद् विघटनबारे संविधानमा स्पष्ट प्रावधान छैन, प्रदेशसभा विघटन हुन सक्छ : मन्त्री तुम्बाहाङ्फे

A+ A A-

भूमि व्यवस्था सहकारी तथा गरिबी निवारणमन्त्री शिवमाया तुम्बाहाङ्फेले संविधानमा संसद् विघटनसम्बन्धी स्पष्ट प्रावधान नरहेको बताएकी छिन् ।

विराटनगरमा आयोजित कार्यक्रममा बाेल्दै मन्त्री तुम्बाहाङ्फेले संसद् विघटनबारे संविधानमा स्पष्ट रूपमा नलेखिएको बताएकी हुन् । यो विषय संवैधानिक वा असंवैधानिक भन्ने कुरा सर्वोच्चले व्याख्या गर्ने उनले बताइन् । ‘संविधानमा संसद् विघटनबारे स्पष्ट प्रावधान छैन । यो विषय अब अदालतमा प्रवेश गरेकाले उसैले प्रष्ट पार्छ । अदालतमा विचाराधीन मुद्दामा धेरै टिप्पणी गर्न मिल्दैन,’ उनले भनिन् ।

तुम्बाहाङ्फेले प्रदेशसभा पनि विघटन हुने सम्भावना औँल्याएकी छिन् । राष्ट्रिय राजनीतिक घटनाक्रमको प्रभाव प्रदेशसभामा समेत परेकाले संविधान, प्रदेशको ऐन, नियमावलीअनुसार प्रदेशसभा विघटन हुन सक्ने उनको भनाइ थियो । दुईतिहाइ मत प्राप्त गर्दासमेत प्रधानमन्त्री ओलीले विभिन्न कारणले काम गर्न नसक्दा संसद् विघटन गर्दै ताजा जनादेशमा जानुपरेको उनको भनाइ छ।

‘विभिन्न कारणले प्रधानमन्त्रीले काम गर्न सक्नुभएन । त्यसैले ताजा जनादेश लिने निर्णय लिनुभएको हो,’ उनले भनिन् । उनले समयमै निर्वाचन हुने दाबीसमेत गरेकी छिन् । ‘निर्वाचनका लागि आयोगलाई सरकारले आर्थिक व्यवस्थापनका साथै आवश्यक सहायताका लागि तयारी गरिरहेकाले समयमै निर्वाचन हुनेमा कसैले पनि शंका नगर्न मेरो आग्रह छ,’ उनले भनिन् ।

मन्त्री तुम्बाहाङ्फेले भूमिसम्बन्धी समस्या समाधानका लागि सुकुम्बासी आयोगले काम अघि बढाएको बताइन् । ‘सुकुम्बासीलाई जग्गा वितरणका लागि अभिलेखीकरण र प्रमाणीकरण स्थानीय तहकै अधिकार क्षेत्रमा भएकाले त्यसमा गम्भीरतापूर्वक ध्यान दिनुपर्छ,’ उनले भनिन् । अभिलेखीकरणमा त्रुटि भए मन्त्रालयको कामकाज नै प्रभावित हुने भएकाले त्रुटि गर्नेलाई कानुनी कारबाही गर्ने उनको भनाइ छ ।