लगानीमैत्री वातावरणका लागि निजीक्षेत्रलाई हेर्ने दृष्टिकोणमा परिवर्तन आवश्यक छ : वरिष्ठ उपाध्यक्ष ढकाल

लगानीमैत्री वातावरणका लागि निजीक्षेत्रलाई हेर्ने दृष्टिकोणमा परिवर्तन आवश्यक छ : वरिष्ठ उपाध्यक्ष ढकाल

A+ A A-

नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले सरकारले निजीक्षेत्रलाई आफ्नो व्यावसायिक पार्टनरको रूपमा नहेर्दासम्म मुलुकमा व्यावसायिक वातावरण बन्न नसक्ने बताएका छन् ।

आइतबार बागलुङ बजारमा आयोजित बागलुङ उद्योग वाणिज्य संघको साधारणसभालाई सम्बोधन गर्दै ढकालले मलेसियाले निजीक्षेत्रलाई आफ्नाे व्यावसायिक पार्टनरको रूपमा अपनाउनाले छोटै समयमा गरेकाे विकासका उदाहरण प्रस्तुत गरे । उनले भने, 'जबसम्म राज्यले निजीक्षेत्रलाई व्यावसायिक पार्टनरको रूपमा लिँदैन, तबसम्म निजी क्षेत्रको लगानी विस्तार र अर्थतन्त्रकाे विकास हुन सक्दैन ।'

आईएमई ग्रुपका अध्यक्षसमेत रहेका वरिष्ठ उपाध्यक्ष ढकालले देशमा लगानीमैत्री वातावरण बनाउन, निजीक्षेत्रलाई लगानीका लागि सहजीकरण गर्न र समृद्ध नेपाल निर्माण गर्न राज्यले निजीक्षेत्रलाई हेर्ने परम्परावादी दृष्टिकोणमा परिवर्तन गर्नुपर्ने बताए ।

राज्यले निजीक्षेत्रलाई पुरानै दृष्टिकोणले हेर्ने हो भने जति नै धेरै लगानीका सम्भावनाहरू भए पनि निजीक्षेत्रको लगानी आउन नसक्ने उनले बताए । उनले भने, 'राज्यको परम्परागत नियम, कानुन र दृष्टिकोणले व्यवसायीहरूलाई सहजीकरणभन्दा पनि निरुत्साहित गरेको देखिएको छ ।'

व्यवसायी जति सबै नाफाखोर मात्र हुन् भन्ने तथा व्यवसायीले राज्यसँग लगानी या व्यवसायमैत्री वातावरण या आफ्नो व्यावसायिक सुरक्षा आदिको माग गर्दा कुनै व्यक्तिका लागि मागेजस्तो व्यवहार राज्यले गर्ने र परम्परागत दृष्टिकोणहरू अहिले पनि कायमै रहँदा देशमा उद्योग तथा व्यवसायका क्षेत्रमा सहज वातावरण बन्न नसकेको उनको धारणा थियो ।

हाल देशमा पुँजीका कारण अर्थात् पैसाका कारण कुनै व्यवसाय गर्न नसक्ने अवस्था नरहेको उनले बताए । उनले थपे, 'जस्तो कि अहिले कुनै एक सानो कम्पनीको आईपीओ खुल्दा पनि १० गुणा, २० गुणासम्म बढी आवेदन पर्छ, यसैबाट देखिन्छ कि जनतासँग छरिएर रहेको पुँजी धेरै छ, मात्र त्यसलाई एकत्रित गरेर लगानी गर्नुपर्छ ।

नेपालमा पुँजीको अभाव मात्र नभएर वातावरण र अग्रसरताको अभावमा लगानी बढ्न नसकेकाले नै नेपाल उद्योग वाणिज्य महासंघको वर्तमान नेतृत्वले देशमा सानादेखि कर्पोरेट तहमा लगानीको वातावरण बनाउन र वैदेशिक लगानी भित्र्याउने काममा सहजीकरण गरिने उनले बताए ।

उनले नेपालउद्योग वाणिज्य महासंघका देशैभरिका जिल्ला/नगरका समस्याहरू एकै खालका रहेका र आफूले देशको पूर्व मेचीदेखि पश्चिम महाकालीसम्मको यात्राका क्रममा यस्तै गुनासा र समस्याहरू सुन्ने गरेकाले ती समस्याको समाधानका लागि देशका स्थानीयदेखि प्रदेश सरकारले ध्यान दिनुपर्ने उनकाे सुझाव थियाे ।

ढकालले भने, 'कतै गृह प्रशासन, कतै राजस्व प्रशासन आदिका समस्या छन्, जिल्ला/नगरस्तरका साना व्यवसायीहरूमा परेका यी समस्याको समाधानमा महासंघले स्थानीयस्तरमा समन्वयात्मक रूपमा लाग्नेछ ।

प्रकाशित मिति: आइतबार, पुस १९, २०७७ १६:३४