पोदरेज स्टिलद्वारा टिचिङ अस्पताललाई स्वास्थ्य सामग्री हस्तान्तरण

A+ A A-

स्टिलका सामग्री उत्पादन गर्ने नेपालको अग्रणी उद्योग पोदरेज स्टिल एण्ड आइरन ईण्डष्ट्रिजले त्रिवि शिक्षण अस्पताल (टिचिङ हस्पिटल) लाई वेड हस्तान्तरण गरेको छ । स्वास्थ्य सामग्रीअन्तर्गत उद्योग आफैँले निर्माण गरेको वेड अस्पतालका कार्यकारी निर्देशक डा. दिनेश काफ्लेको उपस्थितिमा एक कार्यक्रमका बीच हस्तान्तरण गरिएको हो ।

समयको मागअनुसार मेडिकल प्रयोजनका लागि उद्योगले स्वास्थ्य सामग्री निर्माण सुरु गरेको जानकारी दिँदै पोदरेजका प्रबन्ध निर्देशक प्रमोद गौतमले सामाजिक उत्तरदायित्व बहन गर्दै टिचिङ अस्पताललाई वेड हस्तान्तरण गरिएको बताए । ‘हामिले विशुद्ध नेपाली उद्योगको रूपमा स्थापना गरी आफ्नै उद्योगबाट स्वास्थ्य सामग्री उत्पादन गर्न सफल भएका छौँ र अस्पताललाई स्वदेशमै निर्मित वेड हस्तान्तरण गर्न पाउँदा खुसी लागेको छ’ उनले भने ।

त्यस्तै, अस्पतालका कार्यकारी निर्देशक डा. काफ्लेले पोदरेजले अस्पतालको लागि वेड उपलब्ध गराएको खुसी व्यक्त गर्दै उद्योगको सफलताको कामना गरे । डा. काफ्लेले आगामी दिनमा अस्पतालको आवश्यकताअनुसार स्वदेशी उत्पादनलाई प्राथमिकता दिँदै पोदरेजसँग वेडलगायतका सामग्री खरिदमा सहकार्य गरिने बताए । ‘हाम्रो प्राथमिकता पनि स्वदेशमै उत्पादन गरिएका सामग्री प्रयोग गरौं भन्ने हो, यदी पोदरेजले हामीले भनेजस्तो सामग्री उत्पादन र वितरण गर्न सक्ने हो भने सहकार्य गर्न सकिनेछ,’ उनले भने ।

पारिवारिक उद्योगको रूपमा सन् १९७२ मा स्थापना भएको पोदरेज स्टिल एण्ड आइरन ईण्डष्ट्रिजले ४८ वर्षको अवधिमा थुप्रै सामाजिक योगदान गरिसकेको छ । पहिला घरायसी प्रयोजनको लागि दराज लगायतका सामग्री उत्पादन हुँदै आएकोमा हाल अफिसियल, हेभी सेक्युरिटी इक्युपमेन्ट (जसमाः बैंक लकर, फायर प्रुभ सेभ, फायर प्रुफ फायलिङ क्याविनेट लगायत) र सिटिङ सिस्टमका सामग्री उत्पादन तथा बिक्रीवितरण गर्दै आएको प्रबन्ध निर्देशक गौतमले जानकारी दिए । उनले पोदरेजका सामान देशैभर सहजै उपलब्ध रहेको बताए ।

उपत्यकामा ८ वटा बिक्री केन्द्र रहेको पोदरेजले विराटनगर र पोखरामा पनि आफ्नै बिक्री केन्द्र संचालन गरिरहेको छ भने छिट्टै नै चितवन नारायणगढमा पनि बिक्री केन्द्र संचालनमा आउने गौतमले जानकारी दिए ।