जनकपुरबाट सीआइबीको नक्कली परिचयपत्रसहित कीर्ते कागजात बनाउने गिरोह पक्राउ

जनकपुरबाट सीआइबीको नक्कली परिचयपत्रसहित कीर्ते कागजात बनाउने गिरोह पक्राउ

A+ A A-

जनकपुरबाट कीर्ते कागजात बनाउने गिरोह पक्राउ परेको छ । ठूलो संख्यामा कीर्ते कागज, नेपाल प्रहरी, केन्द्रीय अनुसन्धान ब्युरो (सीआइबी)को नक्कली परिचयपत्र, स्टाम्प, बैंकका चेक, प्रहरीको ब्याचलगायतका समानसहित प्रहरीले ६ जनालाई नियन्त्रणमा लिएको हो ।

तीमध्ये पक्राउ गरिएको चार जनालाई प्रहरीले जिल्ला प्रहरी कार्यालयमा पत्रकार सम्मेलन गरी शुक्रबार सार्वजनिक गरेको छ । पक्राउ परेका अन्य दुई जनामाथि थप अनुसन्धान भइरहेको प्रहरीको भनाइ छ । जनकपुर उपमहानगरपालिका–९ स्थित सिटी प्यालेस गेस्ट हाउस एण्ड फ्याम्ली रेष्टुरेन्टमा बिहीबार साँझ सरकारी कागज दस्तखत छाप कीर्ते गरी नक्कली कागजातहरू तयार गरिरहेको अवस्थामा प्रहरीले उक्त गिरोहलाई पक्राउ गरेको हो ।

गेस्ट हाउसमा खानतलासीका क्रममा भारत बिहार अररिया जिल्लाका फबिसगंज घर भई विराटनगर उपमहानगरपालिका- १ बस्ने २७ वर्षीय समिर साहको कपडाको सुटकेसमा नेपाल प्रहरी, केन्द्रीय अनुसन्धान ब्युरोबाट जारी भएको भनिएको नक्कली प्रमाणपत्र परिचयपत्र, सोही कार्यालयको छापलगायत विभिन्न कार्यालयको छापहरूसमेत फेला परेपछि प्रहरीले उनलाई नियन्त्रणमा लिई अनुसन्धान गर्दैजाँदा गिरोहका अन्य सदस्य पनि पक्राउ परेका हुन् ।

प्रहरीले साहलाई सोधपुछ गर्दैजाँदा अन्य पाँच जनालाई समेत पक्राउ गरिएको धनुषाका प्रहरी उपरिक्षक रमेश बस्नेतले जानकारी दिए । उनका अनुसार पक्राउ पर्नेमा महोत्तरीको भंगहा नगरपालिका ९ बस्ने २१ वर्षीय आदित्य कुमार यादव, जनकपुरधाम उपमहानगरपालिका–४ बस्ने ३० वर्षीय चन्दन साह र वडा नम्बर २ बस्ने ५० वर्षीय रामचन्द्र साह रहेका छन् । अन्य दुई जनाको भने परिचय खुलाइएको छैन ।

उनीहरूबाट विभिन्न बैंक तथा कार्यालयको स्टाम्प ४० थान बरामद भएको छ । यस्तै, नेपाल प्रहरी र केन्द्रीय अनुशन्धान ब्युरो (सिआइबी ज्वाइनिङ लेटर) लेखिएको पमाणपत्र, प्रभु बैंकको खाली भौचर, सिदार्थ बैंक, गरिमा विकास बैंक, मेगा बैंक, प्रभु बैंकमा समिर साहको नाममा नगद जम्मा गरेको भौचर, नबिल बैंकको क्यास डिपोजिट स्लिप र नेपाल रेल्वे कम्पनी लिमिटेड जनकपुरधाम धनुषा आवेदन फारम बरामद भएको एसपी बस्नेतले जनाए ।

उनका अनुसार सुनिल राउतको नाममा जारी भएको सवारी चालक अनुमतिपत्रको प्रतिलिपि, मेगा बैंकमा समिर साहको नाममा जारी खाली चेकबुक, सिद्धार्थ बैंकको चेकबुक गरिमा विकास बैंकको चेक बुक, प्रभु बैंकको चेक बुक, प्रभु बैंकबाट समिर साहको नाममा जारी भएका चेक र लेटरसमेत बरामद भएको छ ।

त्यसैगरी, सीबीआईबाट अनिकेत रमणको नाममा जारी भएको बधाई लेटर, सादा कागजमा आदित्य साहको नाममा समिर साहले हस्ताक्षर गरेको कागज, माछापुच्छ्रे बैंकको उमेशकुमार चौधरीको नाममा नगद चेक जम्मा भौचर, मेगा, प्रभु, र सिदार्थ बैंकका एटिएम, इ–सेवा माछापुच्छ्रे बैंकको पेमेन्टर रिसिप्ट, रातो रंगको स्टाम्प प्याड र नक्कली (पलास्टि) को तीनवटा पेस्तोल बरामद गरी थप अनुसन्धान गरिरहेको प्रहरी उपरीक्षक बस्नेतले बताए ।

पक्राउ परेका समिर साहको साथबाट भारतीय आधार कार्ड र नेपाली नागरिकतासमेत बरामद भएको छ । प्रहरीले सार्वजनिक गरिएको चारै जनाविरुद्ध संगठित अपराध शीर्षकमा मुद्दा चलाइएको बताइएको छ ।

प्रकाशित मिति: शुक्रबार, पुस १७, २०७७ १८:२८