नेपालमा लगानी गर्न उपयुक्त वातावरण छः अर्थमन्त्री

A+ A A-

अर्थमन्त्री डा. युवराज खतिवडाले साउदी अरेवियालाई नेपालमा लगानी गर्न उपयुक्त वातावरण भएको बताएका छन् । सोमबार अर्थ मन्त्रालयमा साउदी अरेबियाका राजदूत मुसैदविनसुलेइमन आइ मारवानबीचको शिष्टाचार भेटवार्तामा अर्थ मन्त्री डा. खतिवडाले नेपालमा लगानीको उचित अवसर भएको बताएका हुन् ।

भेटका अवसरमा अर्थमन्त्री खतिवडाले साउदी अरेवियासँग भएको स्रोत नेपालमा लगानीको लागि राम्रो अवसर भएकाले समयमै पूर्वाधार तथा औद्योगिक क्षेत्रमा लगानी गर्न आग्रह गरे । नेपालको सिंचाई, ऊर्जा, भौतिक संरचना विकासका लागि साउदी कोषले सहयोग गरेकोमा उनले साउदी सरकारलाई धन्यवाद पनि दिए ।

करिव ४ लाख नेपाली कामदार साउदी अरेबियामा कार्यरत भएको भन्दै साउदी अरेविया नेपालीका लागि दोस्रो घर भएको अर्थमन्त्रीले स्मरण गराए । साउदी सरकारले नेपालीलाई रोजगारी दिएर केही हदसम्म नेपालको गरिबी न्यूुनिकरण, शिक्षा, स्वास्थ्य र जनजीवनको सुधारमा महत्वपूर्ण भूमिका खेल्नुका साथै नेपालको अर्थतन्त्रमा समेत सहयोग पुगेको उनको भनाइ छ ।

मन्त्री खतिवडाले आगामी चैत १५ र १६ गते नेपालमा हुन लागेको लगानी सम्मेलनमा साउदी अरेबियाका लगानीकर्ताहरुलाई बढीभन्दा बढी सहभागी गराउन दूतावास मार्फत सन्देश प्रवाह गर्नुपर्ने बताएका अर्थमन्त्रालयले जारी गरेको विज्ञप्तिमा उल्लेख छ ।

नेपालमा गौतमबुद्ध अन्र्तराष्ट्रिय विमानस्थल छिट्टै सञ्चालनमा आउन लागेको जानकारी गराउदैं साउदी नागरिकलाई पर्यटकको रुपमा नेपाल भित्र्याउने र नेपाली कामदारलाई सिधै आवतजात गर्न सहज हुने मन्त्री डा. खतिवडाले जानकारी दिए । जलवायु परिवर्तनको विश्वव्यापी मुद्दामा साउदी अरेबियाले नेतृत्वदायी भूमिका खेल्न अर्थमन्त्री खतिवडाले साउदी अरेबियालाई शुभकामना समेत दिए ।

भेटमा साउदी अरेबियाका राजदूत मुसैदविन सुलेइमन आइ मारवानले साउदी अरेबिया फण्ड मार्फत नेपालमा भूकम्पपछिको पुर्ननिर्माण, शिक्षा, स्वास्थ्य र निजीआवास निर्माणमा सहयोग गर्न विभिन्न चरणका छलफल र वार्ता अघि बढेको जानकारी दिए । नेपालमा लगानी र सहयोग गर्न साउदी अरेबिया तयार रहेको भन्दै राजदूतले दुबै देशबीच उच्चस्तरीय भ्रमण गरी सम्बन्धलाई थप उचाईमा पु¥याउने विश्वास व्यक्त गरे ।

दुई देशको कूटनीतिक तथा राजनीतिक सम्बन्ध अझैं प्रगाढ र बलियो बनाउन साउदी सरकार तयार भएको भन्दै राजदूतले श्रमिकहरुका सम्बन्धमा हुन लागेका सम्झौता छिट्टै निष्र्कषमा पुग्ने बताए । नेपाल–साउदी अरेबियाको कुटनीतिक सम्बन्ध चार दशक अघिदेखि नै रहेको बताउदै साउदी अरेबियाको विकास निर्माणका काममा नेपाली कामदारहरुको महत्वपूर्ण भूमिका भएकोमा राजदूतले खुशी व्यक्त गरे ।

प्रकाशित मिति: सोमबार, माघ २१, २०७५ १८:००