प्रदेश तथा जिल्ला पार्टी कार्यालयमा प्रचण्ड–नेपाल समूहको कब्जा

A+ A A-

नेपाल कम्युनिस्ट पार्टीको आन्तरिक विवादका बीच प्रधानमन्त्री केपी शर्मा ओलीले संघीय संसद् विघटन गरेपछि त्यसको असर देशभर परेको छ ।

देशभर नेकपाका कार्यकर्ता ओली पक्ष र दाहाल–नेपाल पक्षमा विभाजित भएका छन् । संसद् विघटनपछि प्रदेश २ मा समेत असर परेको छ । प्रदेश २ मा पछिल्लो समय दुवै पक्ष पार्टी कार्यालय कब्जादेखि कार्यकर्तालाई तान्न हरसम्भव प्रयास गर्न थालेका छन् ।

नेकपाको ओली समूह र प्रचण्ड–माधव समूहबीच पार्टीको सम्पत्ति तथा कार्यालयबारे विवाद चलिरहँदा प्रचण्ड–माधव समूहले धनुषामा अगुवा कार्यकर्ता भेला गर्दै प्रदेशस्तरीय तथा जिल्ला पार्टी कार्यालयमा कब्जा गरेको छ । जिल्ला पार्टी कार्यालय साबिकको नेकपा माओवादी केन्द्रको थियो भने तत्कालीन नेकपा एमालेको जिल्ला कार्यालयलाई प्रदेश कार्यालयमा रूपान्तरण गरिएको थियो ।

सो अगुवा कार्यकर्ता भेलामा सहभागी केन्द्रीय सदस्य श्रवण बरबरिया यादवले ओलीको गैरसंवैधानिक र अलोकतान्त्रिक कदमविरुद्ध कार्यकर्ता भेला कार्यक्रम आयोजना गरिएको बताए । उनका अनुसार जनादेशलाई लत्याएर ओलीले प्रतिनिधिसभा विघटनका लागि चालेको असंवैधानिक र अलोकतान्त्रिक कदमलाई जनतामाझ पुर्‍याउन अगुवा कार्यकर्ता भेला आयोजना गरिएको हो ।

प्रदेश अध्यक्ष प्रभु साह र धनुषा अध्यक्ष राजकिशोर यादव नै ओली समूहमा गइसकेपछि पार्टी कार्यालयमाथि तपाईंको दाबी कसरी हुन्छ ? भन्ने जिज्ञासामा उनले भने, ’पार्टी विधि र विधानसहित नेता कार्यकर्ताले चल्ने हो, पार्टी कार्यालय अध्यक्षको अध्यक्ष होइन सम्पूर्ण नेता कार्यकर्ताको सम्पति हो भएकोले बहुमत हामीसँग रहेको छ ।'

नेता बरबरियाले पार्टीको ७० केन्द्रीय सदस्यमध्ये ४२ जना र धनुषा जिल्लामा मात्रै १५ जनामध्ये ११ जना केन्द्रीय सदस्य आफूहरुसँगै रहेको दाबी गरे । 'केही साथी पदको लोभमा लागेर ओली समूहमा गएका हुन् । तर, पछि हामीसँग आउनेछन्’ उनले भने ।

पार्टी विभाजनपछि नेकपा प्रदेश- २ अध्यक्ष प्रभु साह, इन्चार्ज तथा प्रदेश २ संसदीय दलका नेता सत्यनारायण मण्डल र सचिव सुमन प्याकुरेल ओली समूहमा लागेका छन् । प्रचण्ड समूहमा खुले पनि आन्तरिक विवादपछि प्रभु साह ओली समूहमा पुगेर मन्त्रीसमेत बने ।

प्रदेशमा पार्टीको नाममा रहेको बैंक खाता साह र सचिव प्याकुरेलको नाममा संचालनमा रहेको बुझिएको छ । प्रदेश-२ मा नेकपाका ३२ सांसद छन् । उनीहरूले प्रतिमहिना १० हजार लेबी बुझाउँछन् ।

लेबीबाट मात्रै बैंकमा करोडौँ रुपैयाँ छ । बैंकमा हस्ताक्षर चल्ने सचिव प्याकुरेल भन्छन्, ‘बैंकमा कति रुपैयाँ छ ठ्याक्कै भन्न सक्दिनँ ।’ प्रचण्ड समूहमा रहेका सांसद पनि बैंकमा कति रुपैयाँ रहेको विषयमा अनभिज्ञ छन् । बैंकमा भएको रुपैयाँ कसको हुने विषयमा अहिले केही भन्न नसकिने उनको भनाइ छ ।

प्रकाशित मिति: सोमबार, पुस १३, २०७७ २०:५४