चीनकाे सन्देश सुनेपछि प्रचण्डको जवाफ, 'ओली सच्चिए नेकपा फुट्दैन, नत्र भन्‍न सकिन्‍न'

चीनकाे सन्देश सुनेपछि प्रचण्डको जवाफ, 'ओली सच्चिए नेकपा फुट्दैन, नत्र भन्‍न सकिन्‍न'

नेकपा अध्यक्ष पुष्पकमल दाहाल 'प्रचण्ड' । तस्वीरः प्रचण्डकाे सचिवालय ।

A+ A A-

चिनियाँ कम्युनिस्ट पार्टी (सीपीसी)को अन्तर्राष्ट्रिय विभागका उपप्रमुख कुओ येचौले साेमबार नेकपाका अध्यक्ष प्रचण्डसँग झन्डै डेढ घण्टा संवाद गरे । बिहान ९ बजे प्रचण्डनिवास खुमलटार पुगेकाे येचौको टोलीले संवादका क्रममा नेकपा विभाजनको कारण र मिलनबिन्दुको खोजीबारे विमर्श गरेकाे बताइएकाे छ ।

अध्यक्ष प्रचण्डलाई पनि येचौले आफ्ना राष्ट्रपति एवं सीपीसीका महासचिव सी चिनफिङकाे सन्देश सुनाएका छन्, 'नेकपा फुट्न हुँदैन । मिलेरै अघि बढ्नुपर्छ ।'

प्रचण्ड सचिवालय स्रोतका अनुसार येचौले नेकपा विभाजित नहोस्, त्यसमा चिनियाँ कम्युनिस्ट पार्टीले के सहयोग गर्नुपर्ने हो गर्छ पनि भनेका थिए । प्रचण्डसमक्ष येचौकाे भनाइ उद्धृत गर्दै स्रोतले भन्यो, ‘हामी आन्तरिक मामिलामा हस्तक्षेप गर्दैनौँ । नेकपा मिलाेस्, नफुटाेस् । मिल्नबिन्दु खोजेर अघि बढ्नाेस् भन्ने हाम्रो सुझाव हो ।’

स्थिर सरकार र बलियो नेकपा चिनियाँ कम्युनिस्ट पार्टीको चाहना भएको उल्लेख गर्दै येचौले यसले नेपाल र चीन दुवैलाई हित गर्ने पनि बताएका थिए ।

साथै, येचौले 'मिल्न सक्ने अवस्था कस्तो छ' भनेर पनि प्रचण्डसँग जिज्ञासा राखेका थिए । त्यसको जवाफमा प्रचण्डले नेकपा मिल्न सक्ने सम्भावना रहेको तर सबै केपी ओलीको हातमा रहेको बताएका थिए । स्रोतका अनुसार प्रचण्डले येचौसँगको छलफलमा ओलीले जुन बिन्दुमा गल्ती गरेका छन्, त्यही बिन्दुबाट सच्चिने हो भने नेकपा विभाजनबाट रोकिन सक्ने उल्लेख गरेका थिए ।

प्रचण्डको भनाइ उद्धृत गर्दै स्रोतले भन्यो, ‘ओलीले प्रतिनिधिसभा विघटन गरेर जनमतको अपमान गरेका छन्, यो गैरसंवैधानिक कदमकै कारण पार्टी फुटको बाटोमा लागेको हो, ओली यो कदमबाट सच्चिन जरुरी छ ।’ चीनकाे सन्देश सुनेपछि प्रचण्डले स्पष्टसँग भनेका छन्, 'ओली सच्चिए नेकपा फुट्दैन, नत्र भन्न सकिन्न ।'

यसअघि राष्ट्रपति विद्या भण्डारी, प्रधानमन्त्री केपी ओलीसँग भेट गरी येचौकाे टाेलीले नेकपा विभाजन राेक्न चिनियाँ राष्ट्रपति सीकाे सन्देश सुनाएकाे थियाे ।

प्रकाशित मिति: सोमबार, पुस १३, २०७७ १३:०४