उद्योग व्यवसायको विकासमार्फत रोजगारी सिर्जनामा लाग्न महासंघलाई राष्ट्रपतिकाे सुझाव

उद्योग व्यवसायको विकासमार्फत रोजगारी सिर्जनामा लाग्न महासंघलाई राष्ट्रपतिकाे सुझाव

A+ A A-

नेपाल उद्योग वाणिज्य महासंघका नवनिर्वाचित पदाधिकारीले आइतबार राष्ट्रपति विद्यादेवी भण्डारीसमक्ष राष्ट्रपति भवन शीतलनिवासमा औपचारिक भेटवार्ता गरे । भेटमा राष्ट्रपतिले महासंघका नवनिर्वाचित पदाधिकारीहरूलाई बधाईसहित कार्यकालको सफलताका लागि शुभकामना दिइन् ।

महासंघका अध्यक्ष शेखर गोल्छाको नेतृत्वमा निवर्तमान अध्यक्ष भवानी राणा, वरिष्ठ उपाध्यक्ष चन्द्रप्रसाद ढकाल, उपाध्यक्षहरू दिनेश श्रेष्ठ, अञ्जन श्रेष्ठ, रामचन्द्र संघई र कोषाध्यक्ष सुकुन्तलाल हिराचनसहितको प्रतिनिधिमण्डलले राष्ट्रपतिसमक्ष महासंघको नयाँ नेतृत्वले सम्मानित निजीक्षेत्र र समुन्नत मुलुक निर्माणका लागि महासंघ विशेष लक्ष्यसहितको भिजन पेपर तयारीमा लागेको जानकारी गरायो ।

सो अवसरमा अध्यक्ष गोल्छाले साना तथा मझौला उद्यम (एसएमईज)लाई कोभिडको प्रभावबाट बाहिर ल्याउन सबैभन्दा बढी सहयोग आवश्यक हुने भन्दै यसका लागि कोभिड पुनरुत्थान (Covid Recovery) विशेष कार्यक्रम आवश्यक भएकोमा पनि जोड दिए ।

साना मझौला व्यवसाय चल्न सके भने ठूला उद्योग स्वत: चल्न सक्ने हुँदा सरकार तथा राष्ट्र बैंकले ल्याएका राहतका कार्यक्रमको प्रभावकारी कार्यान्वयन निजीक्षेत्रले खोजेको बताए । साथै, उनले महासंघले ल्याउने भिजन पेपरमा एसएमईजको पुनरुत्थानका लागि विशेष सुझाव समेटिने जानकारी गराए ।

लाखौँ युवा बेरोजगार रहेको र उनीहरूको व्यवस्थापन यतिखेर मुलुककै लागि चुनौती रहेको सन्दर्भमा महासंघको भिजन पेपरले वार्षिक ४ लाख युवाका लागि रोजगारी सृजना गर्ने र दोहोरो अंकको आर्थिक वृद्धिको लक्ष्य लिएको अध्यक्ष गोल्छाले स्पष्ट पारे । उनले महासंघले विज्ञहरूसमेतको सहयोगमा आम सरोकारवाला पक्षहरूसँग छलफल गरी उक्त पेपर सार्वजनिक गरिने र सरकारबाट स्वीकृति लिएर सहकार्यमा लगिने योजना रहेको जानकारी गराए ।

अध्यक्ष गोल्छाले कोभिडका कारण मुलुकको आर्थिक वृद्धिदर १ प्रतिशतभन्दा कम हुने प्रक्षेपण भइरहेको सन्दर्भमा समग्र अर्थतन्त्रलाई थप बिग्रन नदिन सरकार र निजीक्षेत्रबीचको सहकार्य अपरिहार्य रहेकोमा जोड दिए ।

भेटवार्तामा महासंघका पदाधिकारीहरूले अहिलेको संकटको अवस्थामा तुलनात्मक लाभका क्षेत्रहरू जस्तो कृषि, पर्यटन, पूर्वाधार निर्माण, ऊर्जाजस्ता क्षेत्रसँग जोडिएका राष्ट्रिय गौरवका आयोजनाहरू छिटो सम्पन्न गर्न पहल हुनुपर्ने, मुलुकभित्र उपलब्ध प्राकृतिक स्रोत-साधनको समुचित विकासमार्फत आर्थिक विकास, रोजगारी सिर्जनामा सरकारको ध्यान जानुपर्ने, संस्थागत सोच अनुरुप विकासका कार्यक्रम अगाडि बढाइनुपर्ने, लगानी सुरक्षा र नीतिगत स्थायित्वलगायतका विषयमा जोड दिए ।

महासंघका पदाधिकारीहरूबाट व्यक्त धारणापश्चात् राष्ट्रपति भण्डारीले महासंघको वर्तमान युवा नेतृत्वलाई उद्योग व्यवसायको विकासमार्फत रोजगारी सिर्जना, आत्मनिर्भर अर्थतन्त्र निर्माणमा लाग्न सुझाव दिइन् । उनले भनिन्, 'हामीसँग पर्याप्त सम्भाव्यता भएर पनि हामी पछि परेका छौँ, प्राकृतिक स्रोत साधनमा हामी धनी छौँ, बजारका लागि कुनै समस्या छैन । तैपनि पर्याप्त लगानी आउन सकेको छैन, अहिले पनि हामी अरुकै भर पर्नुपर्ने परिस्थिति छ ।'

रोजगारीका लागि बाध्य भएर विदेश नै जानुपर्ने परिस्थितिलाई कसरी अन्त्य गर्न सकिन्छ, यसमा गम्भीर भएर लाग्न राष्ट्रपति भण्डारीले सुझाव दिइन् । चुलिँदो व्यापारघाटाप्रति चिन्ता व्यक्त गर्दै उनले हर कुरामा बाह्य देशसँग निर्भर रहनुपर्ने अवस्थालाई कसरी ब्रेक गरी आफ्ना लागि आवश्यक वस्तु आफैँ उत्पादन गर्न सकिन्छ, त्यसमा सिंगो मुलुक नै गम्भीर हुन जरूरी रहेकाे उनले बताइन् ।

स्वदेशी लगानी आकर्षण राज्यको प्रमुख प्राथमिकता हुनुपर्ने र स्वदेशी लगानी आकर्षण हुन सके मात्र बाह्य लगानीसमेत आकर्षित हुने हुँदा कृषि, ऊर्जा, पर्यटन क्षेत्रको विकासमार्फत आत्मनिर्भर अर्थतन्त्र निर्माणमा सरकार-निजीक्षेत्र सहकार्यमा राष्ट्रपतिले जोड दिइन् ।

प्रकाशित मिति: आइतबार, पुस १२, २०७७ २०:२२