प्रधानमन्त्रीलाई नारायण वाग्लेको प्रश्न : सार्वभौमसत्ता जनताबाट सरेर बालुवाटार-शीतलनिवास पुगेको हो ?

प्रधानमन्त्रीलाई नारायण वाग्लेको प्रश्न : सार्वभौमसत्ता जनताबाट सरेर बालुवाटार-शीतलनिवास पुगेको हो ?

A+ A A-

आज म यहाँ माइतीघरमा किन आएँ ? घर नआई त कहाँ आउनु ? त्यसकारण घर आएको हो भन्ने ठानेर यहाँ उपस्थित भएको छुँ ।

उनीहरूले आफ्नाे षडयन्त्रकाे सबैभन्दा पहिलो सुरुवात नै यही माइतीघर मण्डलालाई निषेधित क्षेत्र बनाएर गरेका थिए । त्यतिबेला हामीले विरोध गरेका थियौँ ।

त्यसपछि गुठियारहरू विरोधमा निस्कनुभयो । अहिलेको संक्रमणकालको विरोध गर्ने, जनताको ठूलो तागत प्रदर्शन गर्ने ठाउँ भएको हुनाले हामी यहाँ (माइतीघर) आउनु एकदमै स्वभाविक छ ।

म अघि सर्वनाम नाट्यघरको बाटो आउँदै थिएँ । त्यहाँको भित्तामा ‘सब ठीक छ’ लेखिएको रहेछ । त्यो त नाटक कुरा थियाे । तर, सब ठीक छ भन्नु आजको समयमा देशका लागि सबैभन्दा ठूलो ब्यंग्य भएको छ ।

केपी शर्मा ओलीले चुनाव गर्छु भनेर घोषणा गरे । अनि जनता सोझै भनिरहेका छन् ‘तिमीले चुनाव गर्न लागेकै होइन ।’

जनता किन यस्ताे भनिरहेका छन् त ? किनभने यो सरकारले जे बोलिरहेको छ, त्यसको उल्टो गर्दैछ भन्ने उनीहरूलाइ थाहा छ । अहिले हामीले यहाँ प्रस्तुत गरिएको नाटकमा पनि देख्यौँ । त्यसैले यो प्रतिगमनलाई बलियोसँग प्रतिकार गर्न जरुरी छ भनेर आज म यहाँ उपस्थित भएको हुँ ।

अहिले यहाँ उपस्थित हुँदा मैले विगतका मैले दुइटा जनआन्दोलन सम्झिएँ । ०४६ सालको पहिलो जनआन्दोलन । त्यो जनआन्दोलन राजालाई सुधार्ने आन्दोलन थियो । त्यो आन्दोलनले राजामा निहित सार्वभौमसत्तालाई प्रधानमन्त्री वा मन्त्रिपरिषद्सँग साझा गर्ने गरेर ०४७ सालको संविधानको प्रबन्ध गर्‍यो ।

तर, राजाले मानेनन् । त्यसपछि दोस्रो जनआन्दोलन भयो । उनले ‘सार्वभौमसत्ता मसँग छ’ भने । त्यसपछि राजालाई फाल्ने दोस्रो जनआन्दोलन भयो ।

तर, अहिले फेरि किन अर्को आन्दोलनको आँधीबेहरी निकाल्नु परिरहेको छ ? राजाबाट खोसिएको त्यो सर्वाभौमसत्ता कहाँ छ ? त्यो सार्वभौमसत्ता हामीले संसद्‍मा छ भनेर व्यवस्था गरेको हो कि होइन ?

त्यो सार्वभौमसत्ता अहिले कसले प्रयोग गर्‍यो भन्ने कुरा त बाटो हिँड्दा थाहा हुन्छ । पहिला नारायणहिटीमा सार्वभौमसत्ता थियो । अहिले नारायणहिटीबाट १५ मिनेट हिँडेपछि बालुवाटार पुगिन्छ । २० मिनेट हिँडेपछि शीतलनिवास पुगिन्छ । के सार्वभौमसत्ता त्यता सरेको हो ?

वास्तवमा हाेइन । सार्वभौमसत्ता त जनतामा सरेको हो । जनताको प्रतिनिधित्व गर्ने सांसदमा सरेको हो । संसद्‍मा सरेको हो । प्रधानमन्त्रीलाई संकट आयो भने मलाई विश्वासको मत देऊ भनेर त्यही संसद्‍मा सामना गर्ने हो । त्यही भएरै हामीले पाँच वर्षका लागि जनप्रतिनिधि चुनेका हौँ ।

कोभिडको भ्याक्सिनका लागि बजेट निकाल्नु पर्ने बेलामा ढुकुटीमा पैसा छैन भन्ने कुरा सुनाइयाे नागरिकलाई । आज अचानक मत पेटिकाको बजेट कहाँबाट व्यवस्था हुन्छ ?

त्यही भएर गलत समयमा गलत प्रपञ्चद्वारा याे भइरहेकाे छ भन्ने बुझ्न सकिन्छ । यस्तो प्रपन्च गरिएको भएर नै हामी घर फर्केका हौँ । नागरिकले यस्ताे निर्णय गर्नुपर्ने बेला भएकाे छ । त्यसैले आफ्नै आश्रममा आएको हो भन्ने अनुभूति गरेर म शिर ठाडो बनाएर यहाँ उभिएको छु ।

यहीँ नजिकै अदालत छ । एकदमै सुन्दर कुरा हो, किनभने यो विषयलाई अदालतले हेर्न थालिसकेको छ । तर, हामीलाई के डर छ भने, अदालतलाई पनि धम्क्याइन सक्छ । त्यसकारण बलियो आड भरोसा माइतीघरमा छ भनेर देखाउनलाई कलाकार लेखक यहाँ जम्मा भएका हुन् ।

प्रतिनिधिसभाकाे असंवैधानिक विघटनविरुद्ध माइतीघर मण्डलामा शनिबार दिउँसो 'बृहत् नागरिक आन्दोलन'ले गरेको विरोध प्रदर्शनमा लेखक तथा पत्रकार नारायण वाग्लेले राखेको धारणा ।

प्रकाशित मिति: शनिबार, पुस ११, २०७७ १७:४७