देशमा एउटै सरकार छः नेपाल सरकार !

A+ A A-

गत शनिबार १४ वैशाख जनकपुर पुगेका गृहमन्त्री राम बहादुर थापा (वादल)ले प्रदेशले प्रमुख जिल्ला अधिकारी (सिडिओ) राख्न नपाउने सुनाए । प्रदेश २ का मुख्यमन्त्री लालबाबु राउतसँग एउटै मञ्चमा बसेर गृहमन्त्रीले संघीय सरकार बाहेक अरु सरकारलाई सिडिओ राख्ने अधिकार नभएको सुनाए ।

प्रदेश २ ले सिडिओ राख्ने तयारी गरिरहेको बेला गृहमन्त्रीले संविधानको व्यवस्था सुनाउँदै प्रदेश २ लाई सचेत गराएका थिए । गृहमन्त्री जनकुपर पुगेको ३ दिनपछि सत्तारुढ दलका एक अध्ययक्ष पुष्पकमल दाहाल (प्रचण्ड)ले प्रदेश २ को सरकार ढाल्ने चेतावनी दिए ।

खुमलटार स्थित आफ्नै निवासबाट दाहालले प्रदेश २ मा पनि नेपाल कम्युनिष्ट पार्टी(नेकपा) नेतृत्वमा सरकार बनाउने चेतावनी दिए ।

गृहमन्त्री र सत्तारुढ दलका यी दुई अभिव्यक्तिले संघीय सरकार प्रदेश २ सरकारसँग रुष्ट देखिएको संकेत गर्यो । संघीय सरकारले यसअघि पनि प्रदेश २ ले आफ्नो संसदमा पेश गरेको प्रहरी कानून रोकेको थियो । मुख्यमन्त्री लालबाबु राउतको अमेरिका भ्रमण पनि संघ सरकारले रोकेको थियो ।

संघीय सरकारसँग सधैँ घम्मासघम्सीमा रहने प्रदेश २ सरकारका मुख्यमन्त्री राउतले गत वर्ष फागनुमा ‘प्रदेशलाई अधिकार नदिएमा संघ सरकारलाई मुद्धा हाल्ने’ अभिव्यक्ति दिएका थिए ।

प्रदेश सरकारको अधिकारको कुरा उठेपछि सधैँ शंकाको दृष्टिले हेर्ने संघ सरकार प्रदेश २ अधिकारको कुरा गरेपछि कडा तवरमा प्रस्तुत हुन्छ ।
यही विषयमा शिलापत्रले सरकारका प्रवक्तालाई प्रश्न गरेको थियो । सरकारले प्रदेश २ को प्रसंगमा मात्रै नभई सरकार संवैधानिक व्यवस्था अनुसार काम गरिहेको बताएको छ ।

सरकारका प्रवक्ता एवं सञ्चार तथा सूचना प्रविधि मन्त्री गोकुलप्रसाद बाँस्कोटा भन्छन, ‘हाउगुजीको रुपमा दुई नम्बर प्रदेशलाई बुझ्नुपर्ने हामीले महसुुस गरेका छैनौ ।’ बाँस्कोटा थप प्रष्ट पार्दैै भन्छन, ‘प्रदेश दूई को कुरा आउँदासाथ यस्तो होइन । दुई, तीन जहाँको कुरा आएपनि सरकारले आफ्नो मुल नीति संविधानले व्यवस्थान गरेका जे जति मूल्य पद्धती सिस्टमहरु छन् यसलाई कार्यान्वयन गर्ने हो ।’
बदलिएला प्रदेश २ मा सरकार ?

राजनीतिमा जसले पनि सरकार बनाउन पाउने सुनाउँछन बाँस्कोटा । प्रदेश सरकार कम्युनिष्टले बनाउन नपाउने हुँदै भन्दै उनी भन्छन, ‘राजनीति हो, सरकार कम्युनिष्ट पार्टीले बनाउने पाउँदैन भन्ने कुरा त छैन् ।’ सरकार परिवर्तन हुनु सामान्य कुरा भएको बताउँदै उनले भने, ‘त्यो त भईहाल्छ नि, जे पनि हुन सक्छ ।’

देशमा एउटा मात्रै सरकार छ

संघीयतामा तीन तहका सरकार भनिएपनि नेपालमा एउटै मात्रै सरकार भएको बताउँछन् बाँस्कोटा । केन्द्रीकृत देशलाई तीन तहका प्रशासनिक ईकाईमा बाँडिएको बताउँदै बाँस्कोटा भन्छन, ‘एउटा सग्लो देशबाट प्रशासनिक फरक ईकाईको हिसाबले, काम काज वितरण गरिएको हो’, उनी थप्छन्, ‘केन्द्रीकृत देशलाई हामीले विभिन्न तीन तहको सरकारमा मान्यता दियौँ । सरकार त नेपालमा एउटै छ नि त्यो हो नेपाल सरकार ।’

संघीयतालाई जनताको आँगनमा सिँहदरबार भन्ने नारा पनि दिईएको थियो । तर, संघीयताको प्रयोग जनताको आँगनमा सिँहदरबार देखाउन मात्रै गरिएको बताए बाँस्कोटाले । उनी भन्छन, ‘यो सबै जनताको आँगनमा सिहँदरबार देखाउनलाई गरेको कुरा हो ।’