पर्यटकको अभावमा ठूला होटल अझै केही समय बन्द रहने

A+ A A-

कोभिड–१९ का कारण नाै महिना थलिएका ठूला होटल व्यवसायी अझै पनि तंग्रिन नसक्दा व्यवसाय खोल्नुको साटो अझै केही समय बन्द राख्ने निर्णयमा पुगेका छन् ।

अधिकांश बन्दकै अवस्थामा रहेको र पुसकाे अन्तिमतिर खोल्ने योजना बनाए पनि पर्यटक अभावमा बन्दलाई यथावत् नै राख्ने निर्णय गरेका हुन् ।

जसमा अन्नपूर्ण होटल, याक एण्ड यती, ह्यातजस्ता पाँचतारे होटल बन्द भएका हुन् । यीबाहेक संचालनमा भर्खरै आएका नयाँ होटल मेरियटलगायत नयाँ होटल संचालनमा रहेका छन् भने सोल्टी होटल पनि फाट्टफुट्ट रूपमा संचालनमा छ ।

फाट्टफुट्ट संचालनमा आए पनि सोल्टीले गोल्डेन ह्याण्ड चेक दिएर कर्मचारी बिदा गर्ने निर्णयमा पुगेको छ । होटलले कर्मचारीअनुसार न्यूनतम १ लाखदेखि २५ लाखसम्म दिएर कर्मचारीलाई बिदा गर्ने निर्णय गरेको हो ।

लामो समय बन्दको अवस्थामा पुगेका होटलमा कर्मचारी व्यवस्थापन गर्नका लागि यसअगाडि होटल एसाेसिएसन अफ नेपाल र कर्मचारी ट्रेड युनियनबीचको सहमतिमा बन्दको समयमा पनि श्रमिकलाई मासिक रूपमा तलब दिने व्यवस्था गरिएको थियो ।

जसमा पाँचतारे होटलहरूले प्रतिकर्मचारी १० हजार र चार तारेका कर्मचारीलाई ८ हजार र एक, दुई र तीन तारे होटलका कर्मचारीले क्रमशः ४ हजार ५ सयदेखि ५ हजार रुपैयाँसम्म मासिक पारिश्रमिक दिँदै आएका छन् ।

तर, निरन्तरको बन्दले थलिएका होटल व्यवसायी कोभिड–१९ को संक्रमण यथावतसँगै बजार चहपहल भए पनि पर्यटक शून्यजस्तै बन्दा पुन: संचालन गर्ने अवस्थामा नपुगेको बताउँछन् ।

होटल एसाेसिएसन (हान) का प्रथम उपाध्यक्ष विनायक साहले पर्यटक नआउने आकलनसहित खर्च धान्न नसक्ने भनेर अधिकांश पुराना पाँचतारे होटल २०२१ सम्मका लागि बन्द नै राख्ने निर्णय गरेको बताए ।

उनले भने, ‘अब पर्यटक आउने छाँटकाँट छैन,संक्रमण सकिएला र खोलौँला भनेर बसेका व्यवसायीहरू पर्यटकबिना संचालनमा ल्याउँदा खर्च धान्नै नसक्ने अवस्थामा पुग्ने स्वतः देखिन्छ । त्यसैले अल्पकालीन रूपमा बन्द नै राख्ने निर्णय भएको हो ।’

पर्यटक अभावमा बन्द रहेका ठूला होटलहरू कोरोनाको धङधङी नहटेसम्म संचालन गर्दा घाटा मात्रै बेहोर्नुपर्ने निस्कर्ष निकाल्दै धमाधम बन्द गर्दै आएका छन् भने केही होटलले एक वर्षसम्मका लागि पूर्ण रूपमा बन्द गर्ने निर्णय गरिसकेका छन् ।

प्रकाशित मिति: मंगलबार, पुस ७, २०७७ ११:५२