भारतीय स्टक एक्सचेन्जलाई सवा ६ अर्ब जरिमाना

A+ A A-

भारतीय प्रतिभूति विनिमय बोर्ड अर्थात् सेक्युरिटिज एक्सचेन्ज बोर्ड अफ इन्डिया (सेबी) ले ३० अप्रिल २०१९ (नेपाली मितिअनुसार १७ वैशाख) मा नेसनल स्टक एक्सचेन्जलाई ६ अर्ब २५ करोड भारतीय रुपैयाँ जरिमाना लगाएको छ । नेसनल स्टक एक्सचेन्जले मुख्य सर्भरको सट्टा वैकल्पिक सर्भरबाट दलालमार्फत केही विशेष व्यक्ति (कारोबारी समूह) लाई अवाञ्छित लाभ दिलाएको आरोपमा यस्तो आदेश दिएको हो । यसलाई कोलोकेसन काण्ड भनिन्छ ।

जरिमाना रकममा ५ वर्षको १२ प्रतिशतका दरले ब्याजसमेत जोडेर ४५ दिनभित्र सेबीलाई बुझाउन आदेश दिएको छ । यस्तो रकम सेबीद्वारा स्थापित लगानीकर्ता सुरक्षा एवं शिक्षा कोष (आईपीईएफ)मा जम्मा हुनेछ । यसको अतिरिक्त नेसनल स्टकलाई ६ महिनासम्म पुँजी बजारबाट अलग गरेको छ । सेबीको यस्तो आदेशपछि नेसनल स्टकले जारी गर्न लागेको १ अर्ब बराबरको प्राथमिक सेयर पनि ६ महिनाका लागि पर सरेको छ ।

नेसनल स्टकका साथसाथै यसका दुईजना पूर्वप्रमुख रवि नारायण र चित्रारामकृष्णलाई पनि कारबाही गरेको छ । रवि नारायणलाई सन् २०११ देखि २०१३ सम्मको तलबबाट र रामकृष्णलाई सन् २०१४ को तलबबाट २५ प्रतिशत रकम आईपीईएफमा जम्मा गर्न भनेको छ । सेबीले यी दुई अधिकारीलाई तीन वर्षसम्म कुनै पनि सूचीकृत कम्पनी वा पुँजी बजारसँग सम्बन्धित निकायमा कामकाज गर्न समेत रोक लगाएको छ । दलालहरु अजय शाह, सुनिता थोमस र कृष्ण डागलीलाई २ वर्षका लागि रोक लगाएको छ ।

सन् २०१५ मा यससम्बन्धी सेबीमा उजुरी परेपछि नियमकीय जाँचको घेरामा आएको थियो ।