प्रचण्डले किन राखे पार्टी फुट्ने १२ दिनको भाका ?

फाइल तस्वीर

A+ A A-

नेकपाका अध्यक्ष प्रचण्डले शुक्रबार दिउँसो पेरिसडाँडामा प्रदेश १ का नेताकार्यकतालाई दुई कुरा प्रष्ट भनेका छन्- नेकपाका लागि अबको १०/१२ दिन निर्णायक दिन हुन् । प्रचण्डले त्यो प्रसंगलाई व्याख्या गर्ने क्रममा भनेका थिए, ‘यो अवधीमा कि पार्टी फुट्छ कि सहमति हुन्छ ।’

अलिक कडा र प्रष्ट रूपमा प्रस्तुत भएका प्रचण्डले अबको संसद अधिवेशनमा प्रधानमन्त्री ओलीले अविश्वासको प्रस्तावको सामना गर्ने पनि बताएका थिए । त्यति कुरा बताएपछि प्रचण्डले झन् प्रष्टै भने- ओली संसदमा अविश्वासको प्रस्ताव फेस गर्न सक्ने अवस्थामा छैनन् । त्यसकारण उनले पार्टी विभाजन गर्न सक्छन् । त्यसको सामना हामीले गर्नुपर्ने हुनसक्छ ।

स्मरण छ सचिवालय सदस्य नारायणकाजी श्रेष्ठलाई ओलीनिकट नेता शंकर पोखरेलले पनि केही दिनअघि पार्टी एक नहुने बताइसकेका थिए ।

दिउँसो पेरिसडाँडामा दुई पूर्वप्रधानमन्त्री तथा नेकपाका वरिष्ठ नेता माधव नेपाल र झलनाथ खनाललाई दायाँबाँया राखेर प्रचण्डले निर्णायक १०/१२ दिनको व्याख्या गरेलगत्तै प्रचण्ड र ओलीबीच संवाद भयो । त्यो संवादमा अरू दिनजस्तै भनाभन त भयो नै । त्योबाहेक थप अर्को कुरा पनि भने प्रचण्डले भने, ‘तपाईको मात्रै म कति आइरहने, भोलि (शनिबार) बिहान ब्रेकफास्टसँगै गरौँला मेरोमा आउनुहोस् ।’

दिउँसो पेरिसडाँडामा अबका दुई साता नेकपाको निर्णायक दिन भनेर व्याख्या गरेर बालुवाटार पुगेर प्रधानमन्त्री ओलीलाई खुमलटार निम्ता गरेपछि ओली झन् सकसमा परेको विश्लेषण नेकपाका नेताहरूको छ । ओलीसँग भेटपछि प्रचण्ड र माधव ले कांग्रेस वरिष्ठ नेता रामचन्द्र पौडेलसँग संवाद गरे । नेकपा एक नेताका अनुसार त्यो संवादमा दुई कुरा प्रष्ट थिए- प्रधानमन्त्री ओली र शेरबहादुर देउवाको सम्बन्ध । अनि आउने दिनमा सहकार्य गर्ने ।

त्यसपछि झनै आत्तिएका ओली आज बिहान ब्रेकफास्ट भेटका लागि तयार भएका हुन् । सितिमिति अरूको निवासमा नजाने ओली वैशाख २०७७ यता दोस्रोपटक बाहिर निस्केका हुन् । ओली डिनरका लागि २०७७ वैशाखमा पनि सत्ता संकटमा परेपछि एक्कासी वामदेव गौतमको निवासमा पुगेका थिए ।

त्यही भेटले त्यतिबेला ओलीको संकटमोचन गर्‍याे । आजको ब्रेकफास्टले सजिलै सत्ता संकटलाई पार लगाउने अवस्था भने छैन । र, अबको सहमति प्रचण्ड र ओलीबीच मात्र भएर पुग्दैन् । नेकपा एक सचिवालय सदस्यको भनाइमा अब २६ भदौ, २० वैशाख वा ४ मंसिरका ‘कट अफ डेट’ डेट एक्स्पाएर भइसक्यो । ती सदस्यले भने ‘अब कि नयाँ सहमति हुन्छ कि पार्टी विभाजन हुन्छ ।’

खासमा ओलीले १ पुसको बिहान नै प्रचण्ड र माधव नेपाललाई ठूलै झड्का दिन लागेका थिए । ३० मंसिरमा अध्यादेश ल्याएर ओलीले नेकपाभित्र बबण्डर त मच्चाइसकेका थिए । १ पुसको दिउँसो मन्त्रिपरिषद् पुनर्गठन गरेर प्रचण्ड-माधव नेपाल समूहलाई अर्को झड्का दिन लागेका थिए ।

बिहान प्रचण्ड निवासमा माधव नेपालसहितका नेताहरू दिउँसोको स्थायी समिति बैठकमा कसरी प्रस्तुत हुने भन्ने रणनीति बनाइरहेका थिए । त्यतिबेला ओली चाहिँ बालुवाटारमा पूर्वमाओवादीका नेताहरू रामबहादुर थापासहित टोपबहादुर रायमाझी, हरिबोल गजुरेल, लेखराज भट्ट, मणि थापा, प्रभु साहसँग संवादमा थिए । र, उनीहरूमध्ये केहीलाई मन्त्री बनाउने आश्वसन दिएका थिए । मन्त्री हुनलाई तयारी हालतमा बस्न ओलीले उनीहरूलाई भनेका थिए ।

बादलनिकट स्रोतका अनुसार त्यसरी उनीहरूलाई मन्त्रीमा थप्दा वर्षमान पुन, शक्ति बस्नेत, बिना मगरसहितको टोलीलाई बर्खास्त गर्ने थिए । ओलीले बालुवाटारमा त्यो योजना बनाइरहेका बेला प्रचण्ड-माधव नेपाल समूहले विशेष अधिवेशनका लागि ८३ जना सांसदको हस्ताक्षरसहित भीम रावल र पम्फा भुसाललाई राष्ट्रपति कार्यालयमा पठाए ।

प्रचण्डले जनार्दन शर्मालाई पनि राष्ट्रपति कार्यालय पठाउन चाहेका थिए र भुसालसँगै निवासमा बोलाएका थिए । तर, शर्माले बहानाबाजी बनाएर राष्ट्रपति कार्यालयमा नगएको स्रोतको दाबी छ ।

नेकपाका एक सचिवालय सदस्यको दाबीमा रावल र भुसाल राष्ट्रपति कार्यालय पुगेपछि ओली एक्कासि मन्त्रिपरिषद् पुनगर्ठनको प्रयासबाट पछि हटेका हुन् । र, अध्यादेश फिर्ता लिन सहमति जनाएका हुन् । यद्यपि अध्यादेश अहिलेसम्म फिर्ता भएको छैन ।

अध्यादेश ल्याएर बबण्डर मच्चाएका ओलीले पत्तो नदिई मन्त्रिपरिषद् पुनगर्ठन गर्न खोजेपछि प्रचण्ड-नेपाल समूह थप चिढिएको थियो । र, १ पुसमा यो समूह उस्तै परे राष्ट्रपतिलाई महाअभियोग लगाउन सक्ने रणनीतिमा समेत जुटेको खुमलटार स्रोतको दाबी छ ।

काउन्टर अट्याकमा आएको प्रचण्ड-माधव नेपाल समूहबाट आत्तिएका ओली प्रचण्डलाई सहमतिमा ल्याउने प्रयासमा भने छन् । त्यही प्रयासमा पर्छ आजको खुमलटार भेटवार्ता ।

प्रकाशित मिति: शनिबार, पुस ४, २०७७ ११:४४