हाम्राे मुख्य लक्ष्य २ अंकको आर्थिक वृद्धि हाे : गाेल्छा

A+ A A-

नेपाल उद्योग वाणिज्य महासंघका अध्यक्ष शेखर गोल्छाले अब प्राथमिकता तोकेर कार्य सम्पन्न गर्ने परिपाटी बसालिने बताएका छन् । उनले भने, 'हाम्रो मुख्य लक्ष्य दुई अंकको आर्थिक वृद्धि गर्नु हाे ।'

उनले महासंघमा आवद्ध सबै संघसंस्थाको करिब ९० प्रतिशत विषयमा एकरुपता कायम गर्न सकिने भएकाले सो लक्ष्य हासिल गर्न एक जुट भई कार्यगत एकता गर्नुपर्ने आवश्यकता रहेको धारणा राखे ।

अध्यक्ष गोल्छाले नेपाल जग्गा तथा आवास विकास संघले नेपाल उद्योग वाणिज्य महासंघको केन्द्रीय कार्यकारिणी समितिले महासंघका नवनिर्वाचित पदाधिकारी तथा सदस्यहरूको स्वागत तथा सम्मानका लागि हालै काठमाडौंमा आयाेजना गरेकाे एक कार्यक्रममा त्यस्ताे धारणा राखेका हुन् ।

गोल्छाले महासंघ सबैको विश्वासको आशाको केन्द्रको रूपमा रहेकोे बताउँदै चुनावपछि महासंघको एउटै आवाज र प्राथमिकता रहेको बताए । सकारात्मक परिणाम देखाउन सके मात्र यस्ता स्वागत र सम्मानको सार्थकता रहन जाने उनकाे भनाइ थियाे ।

त्यसैगरी, महासंघका वरिष्ठ उपाध्यक्ष चन्द्रप्रसाद ढकालले निर्वाचनपछि सबै व्यवसायीहरू एकै ठाउँमा उभिएकाे बताए । सबैकाे प्राथमिकता भनेकै ओझेलमा परेका व्यावसायिक क्षेत्रलाई उकास्न सक्रिय रूपमा पहल गर्नु रहेकाे उनकाे भनाइ थियाे ।

वरिष्ठ उपाध्यक्ष ढकालले भने, 'महासंघमा आवद्ध व्यवसायीहरूले नाफा आर्जन मात्र गर्ने नभई मुलुकको राजस्व वृद्धि तथा पूर्वाधारको विकासमा समेत योगदान पुर्‍याउने भएकाले निजीक्षेत्रलाई सरकारले साझेदारको रूपमा हेर्नुपर्छ ।'

महासंघमा वस्तुगततर्फबाट नवनिर्वाचित उपाध्यक्ष अञ्जन श्रेष्ठले व्यवसायीहरूलाई हेर्ने दृष्टिकोणमा परिवर्तन आउनुपर्ने बताए । उनले भने, 'देशको नीति नियमलाई लगानीयोग्य तथा व्यापारमैत्री बनाइनुपर्छ । रियल इस्टेट क्षेत्रका व्यवसायीहरूको सरोकारका विषयलाई सम्बोधन गर्न महासंघबाट सक्दो पहल हुन्छ ।'

श्रेष्ठले भवन संहितामा समयसापेक्ष संशोधन गरी शहर निर्माण तथा सुधारको कार्यमा हाउजिङक्षेत्रलाई सहभागी गराउनुपर्ने बताउँदै देश संघीयतामा गएको वर्तमान परिप्रेक्ष्यमा दोहोरो कर नलाग्ने व्यवस्था गरी व्यापारिक कारोबारको लागत बढ्न दिन नहुनेमा जोड दिए ।

संघका अध्यक्ष एवं महासंघको कार्यकारिणी समितिको वस्तुगततर्फको नवनिर्वाचित सदस्य मीनमान श्रेष्ठले १०३ वटा वस्तुगत संघले समूह-समूहको निर्माण गरी कार्य योजना बनाएर कार्य गर्नुपर्ने बताए । भवन संहितामा सेटब्याकलगायतका विषयमा संशोधन गर्नुपर्ने, देशमा व्यवस्थित बसोबासलाई सहयोग पुर्‍याउँदै आएको संस्थागत रियल इस्टेट क्षेत्रलाई प्रोत्साहित गर्नुपर्ने, संयुक्त आवासको सामूहिक उपयोगको क्षेत्रको स्वामित्व इकाइधनीहरूलाई नै हस्तान्तरण गर्न पहल गरिदिनुपर्ने, संघमा आवद्ध सबै व्यवसायी महासंघसँग सहयात्रा, सहयोग र सहकार्य गर्न सदा तत्पर एवं प्रतिवद्ध रहेको धारणा राखे ।

संघका महासचिव भेषराज लोहनीले नेपालमा व्यवस्थित बसोबासलाई प्रवर्द्धन गर्नका लागि ल्याण्ड पुलिङ्ग आयोजनाहरूमा मान्यताप्राप्त रियल इस्टेट कम्पनीहरूलाई सहभागी गराउनुपर्ने, ब्रोकर लाइसेन्सिङ प्रणाली लागू गर्नुपर्ने, बैंकहरूले मान्यता प्राप्त रियल इस्टेट कम्पनीलाई कर्जा लगानी गर्दा कर्जा र धितोको मूल्यबीचको अनुपात विद्यमान ४० प्रतिशतबाट ८० प्रतिशतसम्म पुर्‍याउन नेपाल राष्ट्र बैंकमा पहल गर्नुपर्ने धारणा राखे ।

कार्यक्रममा नेपाल उद्योग वाणिज्य महासंघको केन्द्रीय कार्यकारिणी समितिका नवनिर्वाचित पदाधिकारी तथा सदस्यहरू, महासंघमा आवद्ध वस्तुसंघहरूका अध्यक्षहरू, कार्यक्रम आयोजक संघका पदाधिकारी तथा सदस्यहरूसमेत गरी करिब १ सय जनाकाे उपस्थिति थियाे ।

प्रकाशित मिति: शुक्रबार, पुस ३, २०७७ १३:३८