विद्यालयमा पानी नहुँदा पढाइ छोडेर घर फर्किन्छन् विद्यार्थी

A+ A A-

डडेल्धुराको भागेश्वर गाउँपालिका- २ मा रहेको भागेश्वर आधारभूत विद्यालयमा खानेपानीको चरम अभाव भएको छ । धारामा पानी नआउँदा विद्यार्थी खानेपानीबाट वञ्चित भएका छन् । खानेपानीको समस्याले विद्यार्थी आफ्नो घरबाटै कितावसँगै बोतल झोलामा बोकेर विद्यालय जान बाध्य छन् ।

धारामा खानेपानी नआउँदा पानी खोज्दै भौतारिने गरेको विद्यार्थी बताउँछन् । पढाइभन्दा पनि पानीको प्यास मेटाउनकै लागि पिरलो हुने गरेको विद्यार्थी भावना भट्टले बताइन् । तिर्खा लाग्दा समयमै पानी नपाउँदा पढाइमासमेत असर पुगिरहेको विद्यार्थीले बताएका छन् ।

‘छुट्टी भएको समयमा घरमा गएर पानी खानुपर्छ । शौचालयमा पानी नहुँदा खुला दिसा गर्नुपर्ने अवस्था छ,’ विद्यार्थी भट्टले भनिन्, ‘धारामा रहेको पानी थोरै समयमा सकिने भएकोले खोलाबाट बोकेर ल्याउनुपर्छ ।’

गत चैतदेखि बन्द रहेको विद्यालयमा पठनपाठन सुरु भएको छ । विद्यालयमा आउँदा सुरक्षा सावधानी अपनाएर आउनु भन्ने विद्यालयको निर्देशन छ । तर, पानी अभावले धारामा मुख लगाएर खाँदा कोरोनाको जोखिम बढेको छ ।

गाउँपालिका तथा सरोकारवाला पक्षले ध्यान नदिँदा खानेपानीको चरम अभाव देखिएको विद्यालयले जनाएको छ । खानेपानी उपभोक्ता समिति र गाउँपालिकाको लापरवाहीका कारण विद्यालयमा खानेपानीको समस्या समाधान गर्न नसकिएको हो ।

विद्यालयमा एउटा मात्रै धारा भएको अभिभावक रामदत्त जोशी बताउँछन् । ‘एउटा मात्रै धारा छ बालमैत्री छैन । स-साना बालबालिका धारामा झुण्डियर पानी पिउने गर्दा दुर्घटनाको जोखिमसमेत बढेको छ,’ उनले भने, ‘धारामा पानी कम आउँछ । कक्षाकोठामा पठनपाठन भइरहेको हुन्छ । पानी प्यासले बालबालिका धारामा मुख लगाएर बसेका हुन्छन् ।’

पानी अभावमा विद्यालयमा रहेका शौचालयसमेत प्रयोगमा आउन नसकेको प्रधानाध्यापक राजेन्द्रप्रसाद पाण्डेयले बताए । विद्यार्थी शौचालयमा पानी नभएपछि सौच गर्न कोही घर तथा कोही नजिकै रहेको झाडीमा पस्ने गरेको उनको भनाइ छ ।

‘धेरै पटक गाउँपालिकालाई आग्रह गर्दा पनि सुनुवाइ भएन । धारा निर्माण भएको ५ वर्ष भइसकेको छ । पानीको मुहान धेरै टाढा छ । पानीका ट्यांकीसमेत चुहिन थालिसके,’ उनले भने, ‘भोगोलिक हिसाबले दुर्गम भएका कारण सरकार र दाताको नजर विद्यालयसम्म पर्न सकेन । जसको असर विद्यालय र विद्यार्थीमा परेको छ ।’

प्रधानाध्यापक पाण्डेयले तिर्खा लागेका बेला विद्यार्थीले पानी खान नजिकैको गाउँ जाने गरेकाले पढाइमा समेत समस्या हुने गरेको बताए । पानी खान गएका विद्यार्थी कक्षामा ढिलो आउने गरेकाले पुनः कक्षा सञ्चालन गर्न विद्यार्थी पर्खनुपर्ने बाध्यता रहेको उनी बताउँछन् । विद्यालयमा १५० भन्दा बढी विद्यार्थी अध्ययनरत रहेका छन् ।

गाउँपालिका उपाध्यक्ष पदम बोहराले भने विद्यालयमा खानेपानीको अभाव भएको विषयमा बोल्न चाहेनन् । ‘यस बारेमा भोलि बिहान ११ बजे मात्रै बोल्छु । अहिले म सुतेको छु । तपाइलाई सूचना माग्ने अधिकार छैन,’ उनले भने ।

प्रकाशित मिति: शुक्रबार, पुस ३, २०७७ १३:५०