सुरुङ्गामा जंगली हात्तीकाे आतंक, स्थानीय सरकार भन्छ : नियन्त्रण गर्ने अधिकार छैन

सुरुङ्गामा जंगली हात्तीकाे आतंक, स्थानीय सरकार भन्छ : नियन्त्रण गर्ने अधिकार छैन

A+ A A-

कोसी टप्पु वन्यजन्तु आरक्षबाट गाउँ पसेका हात्तीको बथानले गत आइतबार राति सप्तरीको सुरुङ्गा नगरपालिका-४ की श्यामादेवी चौधरीको भान्सा घर पूर्णरूपमा भत्काइदियो । हात्तीले घरभित्र रहेको अन्नपात खाइदिए । चौधरी परिवार अहिले समस्यामा छ ।

अन्नपात हात्तीले खाएपछि उनीहरूले छाक टार्न पनि छिमेकीको सहारा लिनुपर्‍यो । जङ्गली हात्तीले चौधरीको घरमा ४० हजार रुपैयाँ बराबरको क्षति पुर्‍याएको प्रहरी नायव उपरीक्षक (डिएसपी) भुपेन्द्र साहले बताए । हात्ती मानव बस्तीमा पसेको जानकारी पाएलगत्तै पुगेको प्रहरी टोलीले स्थानीयको सहयोगमा हात्तीलाई जंगलतर्फ लखेटेको थियो ।

आरक्षबाट बस्ती पस्ने गरेको हात्तीको आतंकले त्रसित भएकी श्यामादेवी भन्छिन्, ‘हामी साह्रै समस्यामा छौँ । त्रास र भयमा कहिलेसम्म बस्ने ? हात्ती नियन्त्रण गर्न केही न केही गर्नुपर्छ ।’

सो नगरपालिका आसपासका क्षेत्रमा यो मौसममा वर्षेनी जङ्गली हात्तीको आतंक हुने गरेको छ । दुई दिनयता सुरुङ्गा नगरपालिका-४ मा मात्रै हात्तीले एक दर्जन बढी घरमा क्षति पुर्‍यायो । १० परिवारलाई घरविहीन बनाएर छाक टार्न मुस्किल परेको छ ।

सप्तकोसी, कञ्चनरूप, खड्ग, शम्भुनाथ र सुरुङ्गा नगरपालिका तथा रूपनी, तिरहुत, महादेवा र अग्निसाइर कृष्णासवरण गाउँपालिकावासीका लागि अभिसाप नै बन्न थालेको छ, कोसी टप्पु वन्यजन्तु आरक्षका जङ्गली हात्ती । वर्षौदेखि आफ्नै गाउँ-ठाउँमा त्रास र भयपूर्ण वातावरणमा बसोवास गर्दै आए पनि हात्ती नियन्त्रण गर्नेतर्फ भने कसैको ध्यान नगएको स्थानीयको गुनासो छ । ‘साँझ पर्ने बित्तिकै हात्तीको उत्पात सुरु हुन्छ’ स्थानीय जीवन चौधरीले भनिन्, ‘ज्यान जोगाउन गाउँभरि होहल्ला गर्दै जाग्राम बस्नुपर्ने बध्यता छ ।’

अग्निसाइर कृष्णासवरन गाउँपालिका अध्यक्ष परशुराम चौधरीले उत्तरी क्षेत्रका बासिन्दालाई जङ्गली हात्तीले धेरै दुःख दिएको बताउँछन् । अस्थायी समाधान गर्न स्थानीय प्रशासनसँग समन्वय गरेर पहल गरे पनि दिर्घकालीन समाधान गर्न नसकिएको उल्लेख गर्दै उनी भन्छन्, ‘अस्थायी समाधान खोजेर मात्र भएन् । दीर्घकालीन समाधानका लागि स्थानीय सरकारलाई कानुनी अधिकार छैन ।’

आरक्षको जङ्गली हात्ती नियन्त्रण गर्न प्रदेश सरकार समक्ष कुरा राखेको तथा समाधानतर्फ पहल गर्ने आश्वासन पाए पनि कुनै पहल नभएको अध्यक्ष चौधरीले बताए ।

प्रकाशित मिति: बिहीबार, पुस २, २०७७ १८:०३