एक सातादेखि विद्युत् अवरुद्ध हुँदा अन्धकारमा चिरकिट्टेबासी

तस्वीर : शेर भण्डारी/शिलापत्र

A+ A A-

डडेल्धुराको अमरगढी नगरपालिका- ३ चिरकिट्टेमा करिब एक सातादेखि विद्युत् अवरुद्ध भएको छ । अमरगढी- ३ कै लरडामा ट्रान्सफर्मरमा फ्युज जाँदा विद्युत् अवरुद्ध भएको हो ।

गाउँमा पोल पुर्‍याएको चार वर्षपछि बिजुली बालेर दंग भएका स्थानीय विद्युत् सामान्य हावाहुरी र पानी पर्दा अवरुद्ध हुन थालेपछि निराश बनेका छन् । झरो बालेर अध्याँरोमा रात बिताउन बाध्य स्थानीय बिजुली बलेपछि हर्षित भएका थिए ।

तर, दुई महिना नपुग्दै विद्युतमा बारम्बार समस्या आउन थालेपछि स्थानीय निराश भएका हुन् । सूर्यास्तसँगै सुनसान बन्ने यहाँका बस्ती बिजुली बलेसँगै झिलिमिली बनेकोमा फेरी विद्युत् नहुँदा अन्धाकारमय बनेको स्थानीय भीम पाण्डेयले बताए ।

उनले गाउँमा बिजुली पुग्दा सोलार र झुरो फाले पनि फेरि त्यही खोजेर बाल्नुपर्ने बाध्यता आएको बताए । पटकपटक विद्युत् प्राधिकरणमा सम्पर्क गर्न खोज्दासमेत मर्मतमा चाँसो नदेखाइदिएको उनको भनाइ छ ।

‘कोरोनाले बन्द विद्यालय सुरु भइसकेका छन् । तर, गाउँमा विद्युत् आउने जाने समस्या छ,’ उनले भने, ‘विद्यालय पढ्ने बालबालिकालाई रातिमा किताब पढ्न र गृहकार्य गर्न समस्या हुन थालेको छ ।’

विद्युत् अवरुद्ध भएपछि टेलिफोन सेवा, इन्टरनेट, टेलिभिजनलगायत विद्युतीय उपकरणसमेत सञ्चालनमा कठिनाइ हुँदै आएको स्थानीय यज्ञराज गिरीले बताए । उनले एक हप्तादेखि अवरुद्ध विद्युत् मंगलबार एकछिन आए पनि फेरि नआएको बताए ।

हावाहुरी चल्दा लरडामामा ट्रान्सफर्मरमा फ्युज जाँदा विद्युत् अवरुद्ध भए पनि मंगलबार जिल्लाबाट विद्युत् बनाउन कर्मचारी पठाएको तर, बनेनबनेको आफूलाई जानकारी नआएको नेपाल विद्युत् प्राधिकरण वितरण केन्द्र डडेल्धुराका प्रमुख इश्वर श्रेष्ठले जानकारी दिए ।

उनले विद्युत् नबनेको भए भोलिसम्म बन्ने जिकिर गरे । ‘हावाहुरी जाँदा, केहिले छुँदा फ्युज जाने सिस्टम नै हुन्छ । त्यही भएर पटकपटक फ्युज जान्छ,’ उनले भने ।

अमरगढी नगरपालिकाको चिरकिट्टे, ढोल पोखरा, सतकाटा, रोडङा र भागेश्वर गाउँपालिकाका खाल्टा, चौडलगायतका बस्तीमा समेत बिजुली पुगेको छ । अमरगढी नगरपालिकाको पहल र विद्युत प्राधिकरण वितरण केन्द्र डडेल्धुराको सहयोगमा गत कात्तिकमा चिरकिट्टेमा बिजुली बलेको थियो ।

प्रकाशित मिति: बिहीबार, पुस २, २०७७ १३:३१