राष्ट्र बैंकले गर्‍याे शेयरकर्जामा कडाइ, ८ प्रकारका संस्थामा शेयरकर्जा प्रवाह गर्न रोक

राष्ट्र बैंकले गर्‍याे शेयरकर्जामा कडाइ, ८ प्रकारका संस्थामा शेयरकर्जा प्रवाह गर्न रोक

A+ A A-

राष्ट्र बैंकले बुधबार ‘एकीकृत निर्देशन २०७७’ संशाेधन गर्दै शेयरकर्जामा थप कडाइ गरेकोे छ । बैंकले जारी गरेको निर्देशनमा अब बैंक तथा वित्तीय संस्थाबाट शेयरलगानीकर्ताले ८ प्रकारका संस्थामा शेयर धितोकर्जा नपाउने भएका छन् ।

जसमा राष्ट्र बैंकले बैंक तथा वित्तीय संस्थाहरूलाई शेयरकर्जा प्रवाह गर्दा २ सय ५० दिनको कारोबार मूल्य नभएका, व्यावसायिक रूपमा सञ्चालनमा आई एक वर्ष पूरा नभएका, तीन वर्षदेखि साधारणसभा नगरेका, समस्याग्रस्त घोषणा भएका वा पुँजीकोष अनुपात कायम नगरेका संस्थालाई शेयरकर्जा प्रवाह नगर्न निर्देशन जारी गरेको हो ।

योबाहेक नेटवर्थ ऋणात्मक भएका संस्था, नेप्सेले सूचीकरणबाट हटाएका, आर्थिक वर्ष समाप्त भएको १ वर्ष कटिसक्दा पनि अन्तिम लेखा परीक्षण नगरेका संस्थाहरूलाई शेयरकर्जा उपलब्ध नगराउन निर्देशन जारी गरेको हो ।

योसँगै बैंकले विभिन्न बैंक तथा वित्तीय संस्थाबाट प्रयोजन नखुलेका कुल व्यक्तिगत अधिविकर्ष कर्जा अधिकतम प्रतिव्यक्ति ५० लाख रुपैयाँसम्म मात्र प्रवाह गर्न व्यवस्था गरेको छ ।

कर्जा प्रवाह गर्ने बैंक तथा वित्तीय संस्थाले कर्जा प्रवाह गर्दाका बखत उक्त सीमा ननाघेको यकिन गरेर मात्र कर्जा प्रवाह गर्नुपर्नेछ । यसअघि बहुबैंकिङ कारोबार गरी उक्त सीमाभन्दा बढी कर्जा लिएका ऋणीले २०७८ असार मसान्तसम्म कुल व्यक्तिगत अधिविकर्ष कर्जा ५० लाख रुपैयाँसम्म कायम गर्नुपर्नेछ ।

तोकिएको सीमा नाघी कर्जा प्रवाह गरेमा बैंक तथा वित्तीय संस्थाले उक्त कर्जामा शतप्रतिशत कर्जा नोक्सानी व्यवस्था कायम गर्नुपर्नेछ ।

उदाहरणका लागि कुनै एक व्यक्तिले कुनै एक बैंक वा वित्तीय संस्थाबाट २० लाख रुपैयाँ व्यक्तिगत अधिविकर्ष कर्जा लिएमा सोही वा अन्य कुनै बैंक वा वित्तीय संस्थाबाट थप ३० लाख रुपैयाँसम्म मात्र व्यक्तिगत अधिविकर्ष कर्जा लिन पाइनेछ ।

प्रकाशित मिति: बुधबार, पुस १, २०७७ १७:३६