प्रदेश १ मा नेकपाको गुट भेला झाँगिँदै, प्रचण्ड-माधव भेलामा ओलीविरुद्ध मुर्दावादको नारा

प्रदेश १ मा नेकपाको गुट भेला झाँगिँदै, प्रचण्ड-माधव भेलामा ओलीविरुद्ध मुर्दावादको नारा

A+ A A-

नेपाल कम्युनिस्ट पार्टी (नेकपा) को विवाद थप चुलिँदै गएको बेला प्रदेश- १ मा पनि गुट भेला झाँगिँदै गएको छ । प्रदेश- १ मा आफू बलियो स्थितिमा रहेका पुष्टि गर्न दुवै समूहले गुटगत भेला तीव्र पारिएका छन् ।

पार्टी विभाजन भइहाले प्रदेशमा आफ्नो पकड बलियो बनाउन भ्रातृ संगठन, जनवर्गीय संगठन तथा पार्टी कमिटी बहुमतका आधारमा कब्जा गर्ने रणनीतिअनुरूप प्रधानमन्त्री तथा पार्टी अध्यक्ष केपी शर्मा ओली र कार्यकारी अध्यक्ष पुष्पकमल दाहाल 'प्रचण्ड' र नेता माधव नेपाल पक्षीय समूह शक्ति प्रदर्शनमै उत्रिएका छन् ।

पार्टीको विवादको असर तल्लो तहसम्मै देखापर्दा गुटगत आन्तरिक भेलामा एकले अर्को पक्षीय नेता विशेष जिन्दावाद र मुर्दावादको नारा नै लाग्न थालेका छन् । पार्टी एकताका लागि खबरदारी भेला भनिए पनि एकले अर्को समूहका नेता कार्यकर्तालाई निषेध गर्दै गुटगत भेला गरेर एकले अर्को समूहको पक्ष विपक्षमा जिन्दावाद र मुर्दावादको नारा लाग्न थालेपछि पार्टी फुटकै चरण पुगेको आभाष हुन थालेको नेकपाकै नेताहरू बताउँछन् ।

शनिबार मोरङको शुन्दरहरैँचामा ओली पक्षीय भेलामा ओलीको पक्षमा जिन्दावादको नारा लाग्यो । भेलामा सम्बोधन गर्दै नेताहरूले पार्टी एकता, स्थिरता, केपी ओली र जबजको पक्षमा समय खचिँदै पार्टीभित्रकै ‘विपक्षी’ नेताविरुद्ध चर्को अभिव्यक्ति दिए । यसअघि ओली पक्षीय भेलामा ओलीको बचाउ गर्दै प्रचण्ड र माधव नेपाललगायतलाई भारतीय दलालको संज्ञा दिँदै प्रदर्शन भएको थियो ।

त्यसलगतै आइतबार प्रचण्ड-माधव नेपाल समूहले प्रधानमन्त्री ओलीकै गृहजिल्ला झापामा भेला आयोजना गर्‍यो । मंगलबार पुनः प्रदेश राजधानी विराटनगरमा आफ्नो शक्ति प्रदर्शन गर्न प्रचण्ड-माधव नेपाल समूहले आफू पक्षीय विद्यार्थी र युवाको गुट भेलाको आयोजना गरेको छ ।

यसअघि दुवै समूहको भेलामा ‘मुर्दावाद’ को नारा नलागे पनि विराटनगरमा मंगलबार भएको प्रचण्ड-नेपाल पक्षीय भेलामा आफ्नै पार्टी अध्यक्षविरुद्ध ‘ओली मुर्दावाद’ को नारा लागेको छ, त्यो पनि सत्तारुढ नेकपाकै प्रदेश- १ का सांसद कुलप्रसाद साम्बाबाट ।

ओलीविरुद्ध निकै आक्रोशित देखिएका उनले ‘ओली मुर्दावाद’ को नारा नै लगाए । नेकपाको आन्तरिक जीवनमा आरोपप्रत्यारोप भए पनि प्रचण्ड-माधव पक्षीय नेताबाट ओलीविरुद्धमा मुर्दावादको नारा लागाएको सायदै यो पहिलो होला ।

उक्त भेलामा राष्ट्रिय युवा संघका संयोजक रामप्रसाद सापकोटा ‘दीपशिखा’ले सरकारले ल्याएको अध्यादेशविरुद्ध सडक संघर्ष गर्ने चेतावनी दिए । पार्टी ओली नेतृत्वको सरकारले ल्याएको संवैधानिक परिषद्सम्बन्धी अध्यादेश तुरुन्त फिर्ता नभए आन्दोलन गर्ने उनको चेतावनी थियो ।

‘जनताको म्यान्डेड संसदबाट कानुन बनाउने हो, अध्यादेशबाट देश चलाउने होइन,’ उनले भने, ‘अध्यादेश फिर्ता नभए सडकमा आगो बल्छ, दुई जना चरि ढुक्कुर मिलेर जे पनि गर्न मिल्छ ?’

कार्यक्रममा नेकपाका केन्द्रीय सदस्य महेश रेग्मीले अर्काको कुरा नसुन्ने, आलोचना नसहने, आफूलाई देउता ठान्ने प्रवृत्ति अन्त्य गर्नुपर्नेमा जोड दिँदै ओलीप्रति लक्षित गर्दै नेकपालाई सरकारमा नेतृत्व गर्नेहरूले मण्डलले जस्तो बनाएको बताए ।

उनले कुनै पनि हालतमा पार्टी नफुट्ने र फुट्न पनि नदिने दाबी गरे । ‘पार्टी फुट्न हामी दिँदैनौँ, ५ गतेको केन्द्रीय समितिको बैठकमा नेताहरूको कसको के चाहना छ हामी बुझ्दैछौँ, त्यहीअनुसार निर्णय गर्छौं,’ रेग्मीले भने, ‘समुद्रबाट २/४ ट्यांकर पानी कसैले लैजाँदैमा सकिँदैन ।’

सोही कार्यक्रममा बोल्दै पूर्वमन्त्री तथा नेकपाका केन्द्रीय सदस्य शिवकुमार मण्डलले सरकार ठीक ढंगले हिँडाउने प्रयासस्वरूप अहिले अन्तरसंघर्ष चलिरहेको दावी गरे । ‘ओम्नी, सेक्युरिटी प्रिन्टिङ प्रेसको अनियमितता छानबिन हुनुपर्छ कि पर्दैन ?, पार्टी फोर्ने अध्यादेश किन आयो ?, सरकारले गरेको कामको जवाफदेहिता लाखौँ कार्यकर्ताले दिनुपर्छ भने सरकार राम्रो चलाउनु पर्छ कि पर्दैन ?’ उनले भने, ‘भारतीय एजेन्सी ‘रअ’सँग गोप्य भेट किन भयो ?’

कार्यक्रममा युवा संघका नेता नरेन्द्र शाही, इश्वरी आचार्य, विद्यार्थी नेता वसिम आलम, नरेन्द्र बस्नेत, ताजिम अन्सारी, अनिल कार्कीलगायतले ओलीविरुद्ध चर्को अभिव्यक्ति दिएका थिए ।

प्रकाशित मिति: मंगलबार, मंसिर ३०, २०७७ २०:३२