वामदेवसँगकाे अन्तर्वार्ता : विवादका मसला थप्दै जानु प्रधानमन्त्रीकै लागि राम्रो हुँदैन

वामदेवसँगकाे अन्तर्वार्ता : विवादका मसला थप्दै जानु प्रधानमन्त्रीकै लागि राम्रो हुँदैन

A+ A A-

सरकारले संवैधानिक परिषद्सम्बन्धी अध्यादेश जारी गरेपछि सत्तारुढ दलभित्रै तीव्र विरोध भएको छ । पार्टीमा छलफल नै नगरी एक्कासि अध्यादेश आएपछि त्यसबारे छलफल गर्न खुमलटारस्थित प्रचण्ड निवासमा सचिवालयका पाँच सदस्य भेला भएका थिए । भेलाबाट फर्किएका उपाध्यक्ष वामदेव गौतमसँग शिलापत्रकर्मी योगेश ढकालले संक्षिप्त संवाद गरेका छन् । अध्यादेशबारे उनको टिप्पणी र स्थायी कमिटी बैठकमा अपनाइने आगामी रणनीतिबारे कुराकानीको अंश :

० प्रधानमन्त्रीले संवैधानिक परिषद्को अध्यादेश एक्कासि ल्याउनुभयो । तपाईंहरूको टिप्पणी के छ ?

अध्यादेश सरकारले ल्याउनै हुँदैन भन्नु हुँदैन । संसद् नभएको बेलामा अध्यादेश आउने हो । त्यो अध्यादेशको विषयवस्तु र पार्टीलाई छलेर ल्याउनुको अन्तर्य के हो ? योचाहिँ महत्त्वपूर्ण हो । अहिले अध्यादेश ल्याउने कुरामा प्रधानमन्त्री केपी शर्मा ओलीको कार्यशैली त्रुटिपूर्ण देखियो । स्थायी कमिटी बैठक बसिरहेको बेला पार्टीलाई थाहै नदिई, नेताहरूबीच छलफल नै नगरी अध्यादेश ल्याउन हुन्छ ? अनि उहाँले त्रुटिपूर्ण काम गर्दै जाने अरुले समर्थन गर्दै जाने पनि हुन्छ र ? यस्तो कुरा कम्युनिस्ट पार्टीमा कसैले मान्दैन ।

० कतिपयले त यसलाई पार्टी विभाजनको पूर्वाभ्यास पनि भनेका छन् नि ?

यसमा धेरै शंका उपशंका छन् । त्यस कारण यो त्रुटिपूर्ण छ । र, त्यस्तो काम गर्न हुँदैन भनेर अघिल्लो पटक अध्यादेश ल्याउँदा पनि हामीले फिर्ता लिन लगाएका हौँ ।

० अध्यादेशमार्फत बस्ने संवैधानिक परिषद्को बैठकबाट हुने सिफारिसमा तपाईंहरूको प्रतिक्रिया के हुन्छ ?

संवैधानिक परिषद्को बैठक बस्न सक्ने अवस्था छैन । संवैधानिक परिषद्को बैठक दिउँसो अध्यादेश जारी गरेर अहिले सहज बाटो खोलिएको हो । परिषद्को व्यवस्थाअनुसार छ जनाको अनिवार्य उपस्थिति चाहिन्छ । यस पटक अध्यादेशमार्फत ल्याएको भनेको छ जनाको बहुमत संख्या उपस्थित हुनुपर्छ । छ जनाको बहुमत भनेको चार जना हुनुपर्छ । चार जनाले बैठकको कोरम पुग्छ र त्यसले निर्णय गर्ने भनेको छ । त्यो अत्यन्त गलत हो । याे संस्थालाई सञ्चालन गर्ने सर्वमान्य सिद्धान्तको विरुद्धमा छ । त्यस्तो पनि गर्न पाइन्छ ?

तीन जनाको उपस्थितिमा बैठक बस्न पाइँदैन । आज ल्याएको अध्यादेशअनुसार पनि छ जनाको बहुमत चार जना हुन्छ, तीन जना हुँदैन । त्यसैले तीन जनाको उपस्थितिमा बैठक हुनु गलत हुन्छ । चार जनाको उपस्थितिले बैठकलाई कोरम पुग्छ । कोरम पुगेको बैठकको बहुमतले निर्णय गर्ने हो । तीन जना बसेको संवैधानिक परिषद्को बैठक गलत हुन्छ, गलत अभ्यासबाट भएको सिफारिस गलत नै हुन्छ ।

० भोलिको स्थायी कमिटी बैठकमा अध्यादेश प्रकरण कसरी उठ्छ ?

पार्टीलाई गुमराहमा राखेर किन यस्तो काम गर्नुपर्‍यो ? के कारणले त्यसो गरेको ? यो अध्यादेशले हाम्रो संवैधानिक बाध्यतालाई के असर गर्छ ? संवैधानिक परिषद्को बैठकमा प्रमुख प्रतिपक्षी दलको नेताको उपस्थिति अनिवार्य गरेको छ । यसो गर्नुको अर्थ परिषद् सरकार चलाउने पार्टीको मात्र हुन सक्दैन भन्ने हो । र, यसमा सकेसम्म सर्वसम्मत गर्ने हो । र, संविधान अक्षर र भावनामा चल्छ । अक्षरअनुसार त काम गर्नुपर्छ नै । अक्षरले भन्न खोजेको भावनालाई पनि ध्यान दिनुपर्छ । अहिले त्यसो भएको छैन ।

० स्थायी कमिटी बैठकमा प्रधानमन्त्रीको राजीनामा माग हुने सम्भावना कति छ ?

स्थायी कमिटीको बैठकका एजेण्डामा पार्टीका समस्या के के हुन् भन्ने विषयवस्तु छन् । अब दुई अध्यक्षले छलफल गर्नुपर्‍यो । अनि सल्लाह गरेर एजेण्डा ल्याउनुहोला । यत्रो ठूलो संर्घष भइरहेको छ । त्यसमा विधि, पद्धति, विषय गम्भीर रूपमा उठेको छ । पार्टीको निर्णय उल्लंघन गर्ने प्रश्न उठेको छ । यस्तो बेलामा सबै उल्लंघन गर्दै जाने अनि विवादका मसला पनि थप्दै जानु त प्रधानमन्त्रीकै लागि राम्रो होइन ।

प्रकाशित मिति: मंगलबार, मंसिर ३०, २०७७ १८:४६