शिलापत्र फलोअप : लली बलात्कारका अभियुक्त पक्राउ, भेष बदलेर जबर्जस्ती गरेकाे स्वीकार

शिलापत्र फलोअप : लली बलात्कारका अभियुक्त पक्राउ, भेष बदलेर जबर्जस्ती गरेकाे स्वीकार

A+ A A-

कहिले चिटिक्क परेर केटीको रूपमा, त कहिले केटाको । तेस्रो लिङ्गी सागर केसीले काठमाडौंका गल्लीहरूमा आफू अनुकूल भेष बदलेर आपराधिक धन्दा गर्दै आएको प्रहरी अनुसन्धानमा खुलेको छ ।

गत १२ मंसिरकाे राति २६ वर्षीया लली तामाङ (नाम परिवर्तन) लाई सडकमै बलात्कार गरेको आरोपमा उनलाई प्रहरीले पक्राउ गरेको छ । सो घटनाबारे शिलापत्र ले १७ मंसिरमा समाचार प्रकाशन गरेको थियो ।

पीडित महिलाले दिएको उजुरी र हुलियाका आधारमा प्रहरीले सागरलाई पक्राउ गरेको महानगरीय प्रहरी वृत्त जनसेवा न्युरोडले जनाएको छ । पक्राउ परेका सागरले आफू अनकूल रूप रङ नै बदल्ने गरेको पाइएको छ । ‘पक्राउ परेका व्यक्ति दिउँसो केटा, राति केटी बन्ने गरेको पाइयो’, जनसेवाका प्रहरी नायब उपरीक्षक (डीएसपी) सुनिलजंग शाहले भने, ‘तेस्रो लिङ्गी भन्दै आफू अनुकूल भेष फेरेर विभिन्न गतिविधिमा संलग्न हुने गरेको रहेछ ।’

काठमाडाैंकाे सडकमै बलात्कृत भइन् लली

डीएसपी शाहका अनुसार पक्राउ परेका सागरले ललीलाई जबर्जस्ती करणी गरेको स्वीकार गरेका छन् । ‘सागरले कोठामा लगेर जबर्जस्ती करणी गरेको स्वीकार गरेका छन्’, उनले भने, ‘महिलाले मन्दिरमा पनि आफूमाथि जबर्जस्ती गरिएको आरोप लगाएकी छिन् । अनुसन्धानमा दुवै ठाउँमा जबर्जस्ती गर्ने व्यक्ति एउटै देखिन्छ ।’

पक्राउ परेका सागरलाई हिरासतमा राखेर प्रहरीले अनुसन्धान गरिरहेको छ । ‘अन्य गतिविधिमा पनि संलग्न रहेको देखिन्छ । हामी अझै अनुसन्धान गर्दै छौँ’, उनले भने, ‘दोषीलाई कानुनी कारबाही हुन्छ ।’

उजुरी परेको साताैँ दिनमै प्रहरीले सागरलाई पक्राउ गरेको हो । ‘पक्राउ गर्न धेरै समय खर्चनुपर्‍यो । हुलियाका आधारमा धेरैलाई बोलाएर पत्ता लगाएका हौँ’, उनले भने ।

समाजसेवी इन्दिरा रानामगरले सडक किनारामा बसेकाहरूका लागि खाना लिएर जाँदा ललीलाई कमलादी मन्दिरमा विक्षिप्त अवस्थामा भेट्टाएकी थिइन् ।

इन्दिराले सडकबाट उद्धार गरेर उनलाई उपचार गराई सोह्रखुट्टेस्थित बन्दी सहायता नेपालमा राखेकी छिन् । इन्दिराकै पहलमा ललीले प्रहरीमा उजुरी दिएकी हुन् ।

तर, अझै पनि ललीको मन स्थिरमा आउन सकेको छैन । ‘ललीलाई अहिले मानसिक समस्या देखिएको छ । कन्ट्रोल गर्न नै गाह्रो भएर मेन्टल अस्पतालमा उपचार गराएर ल्याएको छु’, इन्दिराले भनिन्, ‘सडकमा अहिले पनि कति केटी सुतिरहेका हुन्छन् । सरकारले सडकलाई सुरक्षित बनाउनुपर्छ । गल्लीगल्लीमा सीसी क्यामेरा राखेर निगरानी गर्नुपर्छ ।’

सात वर्षअघि ललीको प्रेमविवाह भएको थियो । उनले छोरी पनि जन्माइन् । तर, श्रीमान्‌ले अर्को विवाह गरेपछि उनी एक्लिएकी थिइन् । श्रीमान्‌ले अर्को विवाह गरेपछि परिवारका अन्य सदस्यले पनि दुर्व्यवहार गर्न थालेपछि आफू सडकमा आइपुगेको ललीले बताएकी छिन् । सडकमै बलात्कृत भएकी लली न्यायको प्रतीक्षामा छिन् ।

प्रकाशित मिति: मंगलबार, मंसिर ३०, २०७७ १३:४४