काठमाडौंमा देश–विदेशका ३ हजार स्वास्थ्यकर्मी भेला हुँदै

A+ A A-

राष्ट्रिय मिडवाइफ्री तेस्रो सम्मेलन काठमाडौंमा २१ र २२ वैशाखमा हुने भएको छ । मिडवाइफ्री सोसाइटी अफ नेपाल (मिडसन)ले बिहीबार थापाथलीमा पत्रकार सम्मेलन गरी सम्मेलनबारे जानकारी दिएको हो ।

‘मिडवाइफहरुः सुरक्षित मातृत्व तथा प्रजनन स्वास्थ्य अधिकारको पैरवीकर्ता’ भन्ने नाराका साथ मनाउन लागिएको मिडसनकी अध्यक्ष डा. लक्ष्मी तामाङले जानकारी दिइन् ।

‘राष्ट्रिय तथा अन्तर्राष्ट्रिय नर्स मिडवाइफ, प्रसूति विशेषज्ञ चिकित्सक, विद्यार्थी मिडवाइफ, महिला अधिकारकर्मी, नीति निर्माता, सुरक्षित मातृत्व सेवासँग सम्बन्धित सम्पूर्ण सरोकारवालालाई यौन, प्रजनन स्वास्थ्य, मातृशिशु तथा किशोरीको स्वास्थ्य क्षेत्रमा ज्ञान, सिप तथा अनुसन्धामूलक प्रस्तुति आदानप्रदान गरी राष्ट्रिय तथा अन्तर्राष्ट्रिय स्तरमा मिडवाफ्री व्यवसायलाई सुदृढीकरण गर्ने सम्मेलनको मुख्य उद्देश्य हो,’ डा. तामाङले भनिन् ।

सम्मेलनमा ३ हजार बढी नर्स, नर्स मिडवाइफ, चिकित्सक, स्वास्थ्यकर्मी, स्वास्थ्य शिक्षाविद्, नीति निमार्णकर्ता तथा विदेशी प्रतिनिधिको सहभागिता रहने उनले बताइन् ।

सम्मेलन आयोजक प्रमुख प्राध्यापक किरण बज्राचार्यले राष्ट्रिय तथा अन्तर्राष्ट्रिय स्तरमा मिडवाइफ्री व्यवसायलाई सुदृढीकरण गर्ने उद्देश्यले सम्मेलन गर्न लागिएको जानकारी दिइन् ।

योग्य मिडवाइफ उत्पादन गर्नुपर्नेमा जोड

मिडसनकी अध्यक्ष तामाङले मातृ तथा शिशु मृत्युदर घटाउन योग्य मिडवाइफ (प्रसूतिकर्मी) उत्पादन गर्नुपर्नेमा जोड दिइन् । ‘अहिले दक्ष र योग्य मिडवाइफ अभाव रहेकाले अपेक्षाअनुसार मातृ तथा शिशु मृत्यदुर घटाउन सकिएको छैन,’ उनले भनिन् ।

नेपालमा ९ हजार मिडवाइफ्री आवश्यकता रहेको उनको भनाइ छ । तीन वर्षअघि मात्र काठमाडौं विश्वविद्यालय, चिकित्सा विज्ञान राष्ट्रिय प्रतिष्ठान र वीर अस्पतालले मिडवाइफ्री शैक्षिक कार्यक्रम सुरु गरेका छन् । जसमा जम्मा ५७ जना विद्यार्थीले अध्ययन गरिरहेका छन् ।

गाम्रीण क्षेत्रमा अझै पनि पर्याप्त मात्रामा दक्ष जनशक्तिको अभाव रहेकाले मातृ शिशु मृत्युदर घट्न नसकेको उनको भनाइ छ ।

मिडवाइफ सेवालाई गुणस्तरीय बनाउन सके सन् २०३० सम्ममा मातृ तथा शिशु मृत्युदर कम गर्न सकिने डा. तामाङले बताइन् । नेपालमा ठूलो संख्यामा मातृ तथा शिशु मृत्युदर रहेको भन्दै त्यसलाई घटाउन मिडवाइफ्री अत्यावश्यक भएको बज्राचार्यको भनाइ छ ।

प्रकाशित मिति: शुक्रबार, वैशाख २०, २०७६ ०३:०७