राजनीतिक विश्लेषक भन्छन् : कांग्रेस बल्ल ब्युँझियो

कांग्रेसले उपत्यकामा गरेको विरोध र्‍याली । तस्वीर : सुशील श्रेष्ठ/शिलापत्र

A+ A A-

प्रमुख प्रतिपक्षी नेपाली कांग्रेसले देशव्यापी सडक प्रदर्शन गरिरहेको छ । सरकारविरुद्ध सदनमा बलियो उपस्थिति जनाउन नसकेको आरोप ब्यहोर्दै आएको कांग्रेसले सडकमा आफ्नो उपस्थितिलाई सशक्त दाबी गरेको छ । सरकारविरुद्ध कांग्रेसले सडकमा गरेको प्रदर्शनलाई राजनीतिक विश्लेषकहरूले भने कांग्रेस निन्द्राबाट ब्युँझिएको टिप्पणी गरेका छन् ।

सदनमा प्रतिपक्षीको खोजी भइरहेको अवस्थामा उसले सडकबाट आफ्नो उपस्थिति जनाउन खोजेको जानकारहरूको मत छ । राजनीतिशास्त्रकी प्राध्यापक मीना वैद्य मल्ल कांग्रेसको उपस्थितिबारे प्रश्न उठिरहेको बेला उसले सडकमार्फत समाजमा उपस्थिति जनाउन खोजेको बताइन् ।

‘कांग्रेस हरायो भनेर आलोचना भइरहेका बेला हामी पनि छौँ भन्ने सन्देश दिनका लागि उसले सडकमा प्रदर्शन गरेको हो । कांग्रेस अहिले ब्युँझिएको हुन सक्छ तर कहिलेसम्म ब्युँझिन्छ यो प्रतीक्षित छ,’ मल्लले भनिन् ।

सडकमा उसको शक्ति प्रदर्शनमा सरकारविरुद्ध आक्रोश आफ्नो निरीहताविरुद्धको निराशा मिश्रित भएको मल्लको भनाइ छ । ‘यो प्रदर्शनको शक्ति त हेर्न बाँकी नै छ । तर, कांग्रेसले आफ्नो निरीह भूमिकालाई पुनरावलोकन गर्न खोजेको छ,’ मल्लले भनिन् ।

अर्का विश्लेषक सुरेन्द्र लाभ कांग्रेसले आफ्नो अस्तित्व देखाउनका लागि शक्ति प्रदर्शन गरेको बताउँछन् । आफ्नो आन्तरिक समीकरण मिलाउन र कांग्रेस हराएको छैन भन्ने सन्देश दिनका लागि सडकमा उत्रिएको लाभको तर्क छ ।

सरकारसँग सभापति शेरबहादुर देउवाको साँठगाँठ रहेको भन्दै पार्टीभित्रै विरोध भएको अवस्था र प्रतिपक्षी भूमिकामा कमजोर देखिएको आरोपलाई जवाफ दिन प्रदर्शनमा उत्रिएको उनको भनाइ छ । ‘कक्षा कोठामा पढाइ हुन्जेल हराउने र हाजिरीमा 'एस सर' भन्ने विद्यार्थीजस्तै भएको उसलाई आफ्नो उपस्थिति जनाउनुपर्ने आवश्यकता र बाध्यताका कारण मात्रै सडकमा आएको हो,’ लाभले भने ।

प्रतिपक्षी भूमिकामा आएको सुरुवातदेखि नै सशक्त हुनुपर्नेमा कांग्रेस बल्ल ब्युँझिएको विश्लेषक लाभ बताउँछन् । ‘सदनमा प्रतिपक्षीको भूमिका सुरुवातदेखि नै सशक्त बनाउन कांग्रेस चुक्यो । ढिलै भए पनि कांग्रेस ब्युँझिएको छ । साँच्चिकै ब्युँझियो वा ब्युँझिएको नाटक गर्‍यो हेर्न बाँकी छ,’ उनले भने ।

राजनीतिक विश्लेषक भीम भुर्तेल भने कांग्रेसले सदन छोडेर सडक तनाउनु गलत निर्णय भएको बताउँछन् । सुधारिएको संसदको वकालत गर्ने कांग्रेसले सदनलाई प्रभावशाली बनाउनुको सट्टा सडकलाई रोज्नु जायज नभएको उनको तर्क छ ।

‘अरु पार्टी राष्ट्रपतीय प्रणालीमा लाग्दा कांग्रेसकै जोडबलमा सुधारिएको संसदीय व्यवस्था लागू भयो । अहिले त्यसैलाई कांग्रेसले प्रभावकारी बनाउन सकेन', भुर्तेलले भने, ’अहिले सदन खुलाउने समय हो, सडकमा प्रदर्शन गर्ने समय होइन ।’

आफैँले स्थापना गरेको विधि र विधानप्रति कांग्रेसको वितृष्णा देखिएको उनको भनाइ छ । ‘संसदीय व्यवस्थालाई बलियो बनाउनुपर्ने कांग्रेसलाई सडकमा जानुपर्ने बाध्यता के आइलाग्यो ? सडक अब कांग्रेसका लागि प्रयोग गर्ने थलो होइन, गुमनाम नहुनका लागि सडक रोज्नुपर्ने अवस्थामा कांग्रेस पुगिसकेको छैन,’ उनले भने ।

कांग्रेसको शक्ति प्रदर्शन आफ्नो आन्तरिक समीकरण मिलाउनका लागि भएको उनको पनि तर्क छ । सभापति देउवालाई सत्तासँग नजिकिएको आरोप लागेकाले त्यसको बचाउ गर्न कांग्रेस सडकमा आएको उनको भनाइ छ ।

कांग्रेसले भने सरकारको सर्वसत्तावादी शैली, भ्रष्टाचारविरोधी गतिविधिको भण्डाफोरका लागि प्रदर्शन गरेको दाबी गरेको छ । सदनमार्फत नै यस्ता विषयमा प्रश्न उठाउनका लागि जानकारहरूले कांग्रेसलाई सुझाव दिएका छन् ।

प्रकाशित मिति: सोमबार, मंसिर २९, २०७७ १५:०३