प्रदेश १ नेकपा : विभाजनको पूर्वतयारीझैँ तीव्र पारिए गुटगत भेला

A+ A A-

सत्तारुढ नेकपाको नेतृत्वको विवाद चुलिँदै जाँदा जुनसुकै बेला पार्टी फुट्न सक्ने भन्दै दुवै गुटले प्रदेश- १ मा भेला तीव्र पारेका छन् ।

पार्टी विभाजन भएको खण्डमा पार्टी संगठनमा आफ्नो पकड कायम राख्न दुवै समूहले सक्रियता देखाएका हुन् । प्रदेश- १ का प्रदेश र जिल्लादेखि वडास्तरसम्म गोप्य तथा सार्वजनिक भेला, बैठक र छलफल भइरहेका छन् । ती गतिविधिले सत्तारुढ नेकपा विभाजनको पूर्वतयारीमा रहेको संकेत गरेको छ ।

प्रधानमन्त्री तथा पार्टी अध्यक्ष केपी ओली र कार्यकारी अध्यक्ष पुष्पकमल दाहाल 'प्रचण्ड'-माधव नेपाल समूहले पार्टी विभाजनको पूर्वतयारीझैँ छुट्टाछुट्टै गुटगत भेलालाई तीव्रता दिएका छन् । प्रदेश १ मा आफू बलियो रहेको सन्देश दिन दुवैले शक्ति प्रदर्शन गरिरहेका छन् । प्रदेश, जिल्ला र स्थानीय तहमा आ-आफ्नो स्थितिको जोडघटाउ गर्न थालेका छन् ।

केही दिनअघि मोरङमा ओलीपक्षीय विद्यार्थीको गुट भेला भयाे । ओलीपक्षमा खुलेर लाग्दै आएका अनेरास्ववियुका केन्द्रीय अध्यक्ष ऐन महरको उपस्थितिमा सो भेला गरिएको थियो । भेलालाई प्रदेश- १ का आन्तरिक मामिला तथा कानुनमन्त्री हिक्मतकुमार कार्कीले पनि सम्बोधन गरेका थिए ।

लगत्तै २७ मंसिरमा ओलीपक्षीय युवाको भेला मोरङको सुन्दरहरैँचामा गरियो । भेलामा प्रदेश- १ बाट प्रतिनिधित्व गर्ने ओलीपक्षीय केन्द्रीय सदस्य सहभागी भएनन् । एकताका लागि युवा अभियानको नामबाट आयोजना गरिएको भेला सुरु हुनुअघि मोटरसाइकल र्‍याली निकालिएको थियो । उक्त भेलामा प्रमुख अतिथि थिए, नेकपा केन्द्रीय सदस्य तथा पूर्वमन्त्री गोकुल बाँस्कोटा ।

नेता बाँस्कोटाले ओलीकै कारण प्रचण्डको राजनीति बचेको र उद्धार भएको टिप्पणी गर्दै भनेका थिए, ‘स्थानीय निर्वाचनमा सत्यनाश भएपछि मात्र प्रचण्ड पार्टी एकतामा आउनुभएको हो ।’ उनले प्रचण्ड-नेपाल समूह शक्ति र सत्ताको खेलमा लागेको आरोप लगाउँदै त्यो रोकेर पार्टी एकता जोगाउन युवा कार्यकर्तालाई आह्वान गरे ।

सो भेलामा युवा संघका सह-संयोजक रमेश पौडेल, पूर्वउपाध्यक्ष पर्शुराम बस्नेत, पूर्वसचिव वचनबहादुर सिंह, मदन भण्डारी फाउन्डेसन प्रदेश- १ संयोजक गोपाल गुरागाईं, युवानेता रवीन थापा, राजु कार्की, उर्मिला सुनार, रोशन बस्नेतलगायतको सहभागिता थियो । भेलामा ओलीपक्षका मोरङ, झापा, सुनसरीसहित प्रदेश- १ का विभिन्न जिल्लाबाट युवाको सहभागिता थियो ।

‘पार्टी एकता जोगाउन र नेतृत्वको विवादका कारण युवा विद्यार्थीलाई जानकारी गराउन यो भेला राखिएको हो’, अनेरास्ववियु स्थायी कमिटी सदस्य तथा निर्वाचन आयोग अध्यक्ष भाष्कर खनालले भने ।

शक्ति प्रदर्शनसहित ओली समर्थित युवाको भेला सकिएलगत्तै २८ मंसिरमा प्रचण्ड-माधव समूहले प्रधानमन्त्री ओलीको गृहजिल्ला झापामै आफ्नो गुटको विद्यार्थी भेला राखेर 'काउण्टर' दिए । ओलीको गृहनगर दमकमा सो भेला गरिएको थियो ।

सो भेलामा नेकपा केन्द्रीय सदस्य, पूर्वमन्त्री तथा प्रतिनिधिसभा सदस्य शिवकुमार मण्डल, प्रदेश- १ का आर्थिक मामिला तथा योजनामन्त्री ईन्द्रबहादुर आङ्बो, नेकपाका केन्द्रीय सदस्य महेश रेग्मी, अनेरास्ववियुका केन्द्रीय सहसंयोजक रन्जित तामाङ, पूर्वकेन्द्रीय सचिव वसिम आलम, केन्द्रीय सदस्य सुदेश पराजुलीलगायतको सहभागिता थियो ।

प्रचण्ड-नेपाल समूहका नेताहरूले ओली नै पार्टीभित्रको मुख्य समस्या रहेको भन्दै चर्को विरोध गरे । उनीहरूले ओलीको राजीनामा माग्नेदेखि उनले नै पार्टी विभाजन गर्न खोजेको आरोप मात्र लगाएनन्, सडकमा राजावादी आउनुमा प्रधानमन्त्री ओलीकै हात रहेको समेत दाबी गर्न भ्याए ।

यो समूहले आउँदो मंगलबार आफूनिकट मोरङ जिल्लाका युवा र विद्यार्थी संयुक्त भेला गर्न लागेको अनेरास्ववियुका पूर्वकेन्द्रीय सचिव वसिम आलमले बताए ।

केन्द्रीय तहका नेताकै सहभागितामा गुटगत भेला र गुटको बचाउमा दुवै समूहले प्रशिक्षणसमेत दिन थालेका छन् । गुटगत भेला तथा बैठकहरू तीव्र भएसँगै प्रदेश- १ मा नेकपाको दुवै समूह समर्थित भ्रातृ संगठनका नेता/कार्यकर्ताको होडबाजी देखिएको हो । भ्रातृ संगठनमा पनि आफ्नो समूह बलियो स्थितिमा रहेको देखाउन गुटगत भेलाको होडबाजी सुरु भएको हो ।

दुवै पक्ष भन्छन् : पार्टी एकताका लागि भेला

गुटगत भेलामा आरोप-प्रत्यारोपमा उत्रिए पनि दुवै समूहले आफ्नो भेला पार्टी एकताका लागि भएको दाबी गरेका छन् । दुवै समूहको भेलामा एकले अर्को समूहलाई पार्टी फुटाउन लागेको आरोप लगाउँदै त्यसको खबरदारीका लागि भेला आयोजना गरिएको बताउँदै आएका छन् ।

प्रचण्ड–माधवनिकट विद्यार्थी नेता वसिम आलमले आफूहरूको भेला पार्टीभित्रको बेथिति हटाउनका लागि भएको बताए । ‘पार्टी फुट्ने र फुटाउने कुरा गर्नु हुँदैन, हाम्रो भेला पार्टीभित्रको बेथिति हटाउने भेला हो, पार्टी फुटाउनेविरुद्धको भेला हो’, उनले भने, ‘पार्टीमा विधानभन्दा व्यक्ति ठूलो हुन सक्दैन । पार्टी विधि र विधानअनुसार चल्नुपर्‍यो, हाम्रो भेला त्यसैको लडाइँ हो ।’

ओलीपक्षीय युवा नेताहरूले पनि आफूहरूले गुटगत भेला नगरेको दाबी गरेका छन् । उक्त समूहले पनि पार्टी एकताका लागि र अन्तरिम विधानअनुसार चल्न नेताहरूलाई खबरदारी गरिएको अनेरास्ववियु निर्वाचन आयोग अध्यक्ष भाष्कर खनालको दाबी छ ।

‘हामीले अहिलेसम्म त्यसरी गुटगत भेला गरेका छैनौँ । हामीले पार्टी एकजुट हुनुपर्‍यो र त्यसका लागि नेताहरूलाई एक ठाउँमा उभ्याउनका निम्ति खबरदारीसभा गरिएको हो’, उनले भने, ‘युवा विद्यार्थीमाझ गएर पार्टीका नेताहरूले गर्ने आरोपप्रत्यारोपकाे कार्य अन्त्य गर्नुपर्‍यो, पार्टीको विधानले व्यवस्था गरेको सहमतिअनुसार पार्टी नेतृत्व चल्नुपर्‍यो र पार्टीले निर्णय गरेको महाधिवेशनको मितिमा महाधिवेशन हुनुपर्‍यो भन्ने हाम्रो खबरदारी हो ।’

प्रधानमन्त्री तथा पार्टी अध्यक्ष ओलीले विवाद उत्कर्षमा पुगेको बेला गत १९ कात्तिकमा ‘भर्चुअल’मार्फत आफूपक्षीय नेताहरूसँग छलफल गरे । सो छलफलमा उनले जस्तोसुकै परिस्थितिको पनि सामना गर्न तयार रहन निर्देशन दिएका थिए । ओलीले नै त्यसरी गुटगत छलफल गरेको सावर्जनिक भएपछि त्यसको काउण्टर स्वरूप प्रचण्ड–माधव नेपाल समूहले पनि भौतिक रूपमै आफूपक्षीय नेता कार्यकर्ताको गोप्य भेला आयोजना गर्न थाल्यो ।

अध्यक्ष प्रचण्डनिकट केन्द्रीय सदस्य तथा पूर्वमन्त्री मण्डल र वरिष्ठ नेता नेपालनिकट केन्द्रीय सदस्य महेश रेग्मीको अगुवाइमा सो भेलाको आयोजना गरिएको थियो । भेलामा पूर्वराज्यमन्त्री तथा राष्ट्रियसभाका सांसद गोपीबहादुर अछामीसहित प्रचण्ड-नेपाल पक्षका ५० जना नेता/कार्यकर्ता सहभागी थिए । त्यसयता पार्टीभित्र शक्तिशाली मानिएका युवा र विद्यार्थी संगठनको गुट भेला तीव्र पारिएका छन् ।

विश्लेषक डा. भेषप्रसाद धमला दुवै समूह आफ्नो समूहलाई बलियो बनाउन आ-आफ्नो तयारीमा लागेको भए पनि पार्टी विभाज नै हुने स्थिति भने आफूले नै देखेको बताउँछन् । उनी भन्छन्, ‘पार्टी नै विभाजन हुन्छ जस्तोचाहिँ मलाई लाग्दैन, तैपनि गुटगत भेला गरेर आफ्नो पकड बलियो बनाउन लागेको देखिन्छ ।’ दुईतिहाइ बहुमत प्राप्त एउटा बलियो पार्टीमा यो स्तरको गुटगत भेला हुनु पार्टीका लागि मात्र नभई राष्ट्रकै लागि दुर्भाग्यपूर्ण भएको धमला बताउँछन् ।