प्रोग्रेसिभ फाइनान्सः अहिलेसम्म पाइएन, यसपटक देला नाफा?

A+ A A-

प्रोग्रेसिभ फाइनान्सले चालू अवधि (चैत मसान्त) सम्ममा ८२ करोड ७२ लाख रुपैयाँ निक्षेप संकलन गरेर ८८ करोड ४४ लाख रुपैयाँ कर्जा लगानी गरेको छ । निक्षेप र कर्जा क्रमशः ६९ र ९० प्रतिशत वृद्धि भएको छ ।

कर्जा लगानीबाट ९ करोड ४१ लाख रुपैयाँ ब्याज आम्दानी गरेको छ । निक्षेपको लागि ५ करोड ८२ लाख रुपैयाँ ब्याज खर्च गरेको छ । खुद ब्याज आम्दानी ४ करोड १२ लाख रुपैयाँ छ । निक्षेप र कर्जामा भएको वृद्धिले खुद ब्याज आम्दानी १२० प्रतिशत बढेको छ ।

शुल्क, कमिसन र अन्य सञ्चालन आम्दानीसहित ४ करोड ८४ लाख रुपैयाँ कुल सञ्चालन आम्दानी गरेको छ । कुल सञ्चालन आम्दानी अघिल्लो वर्षको यही अवधिको तुलनामा १३२ प्रतिशत बढेको छ ।

कर्मचारी तथा सञ्चालन खर्च, नोक्सानी व्यवस्था, गैरसञ्चालन आम्दानी (नोक्सान), नोक्सानी व्यवस्थाबाट फिर्ता र असामान्य गतिविधिबाट आम्दानी (नोक्सानी)पछिको सञ्चालन आम्दानी ३ करोड ८१ लाख रुपैयाँ छ । गत वर्षको यही अवधिमा फाइनान्स ९८ लाख रुपैयाँ सञ्चालन घाटामा थियो ।

कर्मचारी बोनस र आयकरपछि खुद नाफा २ करोड ९१ लाख रुपैयाँ छ । गत वर्षको यही अवधिमा फाइनान्स ९७ लाख रुपैयाँ खुद घाटामा थियो ।

चालू अवधि (चैत मसान्त)सम्मको वासलातअनुसार जगेडा तथा कोषमा ४ करोड २२ लाख रुपैयाँ छ । जगेडा र कोष गत वर्षको यही अवधिको तुलनामा १५ सय प्रतिशत बढेको छ । चालू अवधिको खुद नाफा र सम्भवतः नबिकेको हकप्रद सेयर लिलामी गर्दा प्राप्त प्रिमियम रकमले जगेडा तथा कोष बढेको अनुमान गर्न सकिन्छ ।

फाइनान्सको चुक्ता पुँजी ७१ करोड २१ लाख रुपैयाँ, निक्षेप ८२ करोड ७२ लाख रुपैयाँ, कर्जा लगानी ८८ करोड ४४ लाख रुपैयाँ, पुँजीकोष अनुपात ६८.८३ प्रतिशत, खराब कर्जा ३.३९ प्रतिशत, कोषको लागत ९।४० प्रतिशत, कर्जा निक्षेप अनुपात ५५ प्रतिशत, आधार दर १२.४७ प्रतिशत, प्रतिसेयर आम्दानी ४ रुपैयाँ १० पैसा (वार्षिकीकरण गरिएको) र नेटवर्थ १०५ रुपैयाँ छ ।

केन्द्रीय बैंकले तोकेको ८० करोड रुपैयाँ पूँजी पुर्याउन बाँकी रहेको छ । कम्पनीले जारी गरेको हकप्रद सेयर बिक्री नभएपछि लिलामीमार्फत बिक्री गरेको छ । लिलामीपछि पुँजी बढ्दा प्रतिसेयर आम्दानी र नेटवर्थमा कमी आउनेछ ।

प्रकाशित मिति: शुक्रबार, वैशाख २०, २०७६ ००:५८