कुमारी बैंकः सञ्चित कोष रित्तो

A+ A A-

कुमारी बैंकले चालू आर्थिक वर्षको तेस्रो त्रयमास (चैत मसान्त) सम्मको आयव्यय विवरण सार्वजनिक गरेको छ । बैंकले चालू अवधि (चैत मसान्त)सम्ममा ६८ अर्ब ८५ करोड निक्षेप संकलन गरेर ६९ अर्ब ५९ करोड रुपैयाँ कर्जा लगानी गरेको छ । निक्षेप र कर्जा क्रमशः १६ र १५ प्रतिशत बढेको छ ।

कर्जा लगानीबाट ६ अर्ब ७३ करोड रुपैयाँ ब्याज आम्दानी गरेको छ । निक्षेपको ब्याज खर्च रकम ४ अर्ब ५० करोड रुपैयाँ छ । खुद ब्याज आम्दानी २ अर्ब २३ करोड रुपैयाँ छ । ब्याज आम्दानी ४२ प्रतिशत, ब्याज खर्च ३४ प्रतिशत र खुद ब्याज आम्दानी ६१ प्रतिशत बढेको छ ।

शुल्क र कमिसनबाट ३० करोड ४० लाख रुपैयाँसमेत गर्दा र अन्य सञ्चालन आम्दानीसहित २ अर्ब ५३ करोड रुपैयाँ कुल सञ्चालन आम्दानी गरेको छ । कुल सञ्चालन आम्दानी अघिल्लो वर्षको यही अवधिको तुलनामा ६१ प्रतिशत बढेको छ ।

अन्य आम्दानी (नोक्सानी) र नोक्सानी व्यवस्थापछिको खुद सञ्चालन आम्दानी २ अर्ब ५२ करोड रुपैयाँ छ, जुन अघिल्लो वर्षभन्दा ३८ प्रतिशत बढी हो ।

कर्मचारी खर्च, सञ्चालन खर्च र ह्रास कट्टी व्यवस्थापछिको सञ्चालन आम्दानी १ अर्ब ४२ करोड रुपैयाँ छ । यस्तो आम्दानी अघिल्लो वर्षभन्दा ३९ प्रतिशत बढी हो ।

गैरसञ्चालन आम्दानी तथा खर्च र आयकरपछि १ अर्ब ३२ लाख रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा ३७ प्रतिशत बढेको छ ।

चालू अवधि (चैत मसान्त)सम्मको खुद नाफाअनुसार विभिन्न कोषमा नियमकीय प्रावधानअनुसार रकम व्यवस्था गरेपछि बैंकको सञ्चित नाफा रकम ६१ करोड ६० लाख रुपैयाँ कायम हुनेछ । यो रकम पूर्ण रुपमा लाभांश बाँडफाँट हुन सक्दैन । हुनलाई यो रकम सम्पूर्ण खर्च, कर दायित्व र नियमकीय प्रबन्धपछिको भए पनि सबै रकम लाभांशमा बाँडिने सुनिश्चित हुन्न ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम ८२ करोड १३ लाख रुपैयाँ हुने अनुमान गर्न सकिन्छ ।

हाल बैंकको चुक्ता पुँजी ७ अर्ब १६ करोड रुपैयाँ भए पनि बैंकले आव २०७३÷७४ देखिको साधारणसभा नगरेको हुँदा चुक्ता पुँजी बढ्न बाँकी रहेको छ । बैंकले आव २०७३÷७४ र २०७४÷७५ को साधारणसभा आव्हान गरिसकेको र सभामा २१.२५ प्रतिशत बोनस सेयर प्रस्ताव गरेको छ । बोनस सेयरपछि बैंकको चुक्ता पुँजी ८ अर्ब ६८ करोड रुपैयाँ पुग्नेछ । यसलाई आधार मान्दा बैंकको देखाएको चालू अवधिको सञ्चित नाफाअनुसार ९ प्रतिशत हुन आए पनि यति नै लाभांश वितरण गर्छ भन्ने यकिन गर्न सकिन्न । यो भनेको अधिकतम हद हो । यसलाई नै निरपेक्ष आधार मान्न सकिन्न ।

बैंकसँग ५ करोड ४८ लाख रुपैयाँ प्रिमियम रकम देखिएको छ । चैत मसान्तसम्मको सञ्चित आम्दानीसहित २ अर्ब १५ करोड रुपैयाँ सञ्चित नाफा देखिन्छ । वैधानिक जगेडा, अन्य जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत जोड्दा बैंकको जगेडा कोष २ अर्ब १६ करोड रुपैयाँ देखिन्छ । सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न ।

बैंकको चुक्ता पुँजी ७ अर्ब १६ करोड, पुँजी कोष अनुपात १२.७३ प्रतिशत, खराब कर्जा १.४१ प्रतिशत, कोषको लागत ८.२९ प्रतिशत (पुस, माघ र चैतको), कर्जा निक्षेप अनुपात ७८ प्रतिशत, आधार दर ११.०२ प्रतिशत (पुस, माघ र चैतको), ब्याज अन्तर ४.६३ प्रतिशत (पुस, माघ र चैतको), प्रतिसेयर आम्दानी १८ रुपैयाँ ६७ पैसा (वार्षिकीकरण गरिएको) र नेटवर्थ १४७ रुपैयाँ छ । यसकाे वास्तविक नेटवर्थ १६० रूपैयाँ छ । तर बैंकले गलत विवरण दिएकाे छ ।

विशेष टिप्पणी

बैंकले वित्तीय प्रतिवेदन सार्वजनिक गर्दा चैतसम्मको आधार लिएको छ । अन्य कुरामा तात्त्विक फरक नपरे पनि आगामी साधारणसभापछि चुक्ता पुँजी, नेटवर्थ र प्रतिसेयर आम्दानीमा भने परिवर्तन हुनेछ ।

चुक्ता पुँजी ८ अर्ब ६४ करोड रुपैयाँ हुनेछ । सञ्चितीमा देखिएको रकम पुँजीमा जानेछ र यसले नेटवर्थमा कमि ल्याउँछ । प्रस्ताव गरिएको बोनस सेयरबापत सञ्चितीबाट १ अर्ब ५२ करोड रुपैयाँ घट्नेछ । यस हिसाबले बैंकको नेटवर्थ १३२ रुपैयाँ कायम हुनेछ । त्यस्तै, प्रतिसेयर आम्दानी पनि १५ रुपैयाँ कायम हुनेछ ।

सञ्चित नाफामा रहेको २ अर्ब १५ करोड रुपैयाँ प्रस्तावित बोनस सेयर वितरण गर्दा पुँजीमा सर्ने हुँदा यस्तो सञ्चित कोष (नाफा) घटेर ६२ करोड ८३ लाख रुपैयाँमा झर्नेछ । सेयर प्रिमियम रकमलाई बोनस सेयरमा उपयोग गरिएको भएमा यस्तो कोषमा थप ५ करोड ४८ लाख रुपैयाँ बढ्नेछ । बैंकले ५ करोड ४८ लाख रुपैयाँ प्रिमियम रकम देखाएको छ । बैंकले बाँड्न मिल्ने जति सबै रकम बाँडेर सञ्चित कोष पूरै रित्त्याएको देखिन्छ ।

प्रकाशित मिति: शुक्रबार, वैशाख २०, २०७६ ००:२३