उपप्राध्यापक चलाउनेको न्यायका लागि त्रिवि परिक्रमा गरिने

A+ A A-

त्रिविका उपप्राध्यापक प्रेम चलाउनेमाथि विश्वविद्यालय परिसरमै आक्रमण भएको दुई महिनाभन्दा बढी भइसक्दा पनि न्याय नपाएको भन्दै सरकारलाई दबाब दिन विश्वविद्यालय परिक्रमा गरिने भएको छ । त्रिभुवन विश्वविद्यालयका न्यायप्रेमी विद्यार्थी समूहले उक्त घटनाको विरोधस्वरूप विश्वविद्याय परिक्रममा गर्न लागेको हो ।

२८ मंसिर दिउँसो १२ बजे हुन लागेको विश्वविद्यालय परिक्रमा कार्यक्रममा सहमागी हुन उक्त समूहले विद्यार्थी, प्राध्यापक, कर्मचारी, लेखक, रंगकर्मीलगायतलाई उपस्थित हुन आग्रह गरेको छ ।

अभियुक्तले अदालतमै अपराध स्वीकार गरिसक्दासमेत बद्नियतपूर्ण ढंगले शक्तिको दुरुपयोग गरी उपप्राध्यापक चलाउनेलाई न्याय पाउनबाट बञ्चित गरिएको भन्दै विरोध कार्यक्रम आयोजना गरिएको उक्त समूहले अपिल पत्र जारी गर्दै जनाएको छ ।

अपिल

आदरणीय प्राज्ञिक व्यक्तित्व, सञ्चारकर्मी, विद्यार्थी, सुरक्षाकर्मी लगायत विभिन्न पेसा÷व्यवसायमा आवद्ध न्यायप्रेमी समुदाय !

त्रिभुवन विश्वविद्यालयका उपप्राध्यापक प्रेम चलाउनेमाथि विश्वविद्यालय परिसरमै योजनावद्ध र अपराधिक हमला भएको दुई महिनाभन्दा बढि भइसक्यो । अभियुक्तहरुले अदालतमै अपराध स्विकार गरिसक्दासमेत बद्नियतपूर्ण ढंगले शक्तिको दुरुपयोग गरी प्रेम चलाउने सरलाई न्याय पाउनबाट बन्चित गरिएको छ । अपराधीहरु खुलेआम विश्वविद्यालयभित्र घुमिरहेका छन् भने विद्यार्थी र शिक्षक आतंकित छन् । विश्वविद्यालयभित्र यतिबेला भय र त्रासको वातावरण छ ।

गत असोज २० गते चलाउने सरमाथि आक्रमण हुनुभन्दा केहि दिन अगाडि नै समाजशास्त्र केन्द्रीय विभागका विद्यार्थीले विश्वविद्यालयमा दण्डहिनता र भयको वातावरण व्याप्त रहेको भन्दै सम्बन्धित क्षेत्रको ध्यानाकर्षण गराएका थिए । तर, विद्यार्थीको चासो र चिन्तालाई नजरअन्दाज गरिँदा विश्वविद्यालय परिसरभित्रै क्रुर, आपराधिक र जघन्य घटना घट्न पुग्यो । विश्वविद्यालय चिन्तन र बहसको थलो हो, यसले जीवन्त संवादको माग गर्छ । सार्वजनिक वृत्तमध्ये सबैभन्दा महत्वपूर्ण रहेको देशकै प्रतिष्ठित त्रिभुवन विश्वविद्यालय यतिबेला सम्पूर्ण रुपले आपराधिकरणको सिकार भएको छ । विश्वविद्यालयभित्र कोहिपनि मारिन सक्छ, जोकोहि माथि वैचारिक मतभिन्नताकै कारण हमला हुन सक्छ ।

पीडितले न्याय पाउने सम्भावनामाथि समेत प्रश्न गर्नुपर्ने अवस्था उत्पन्न भएको छ । अभियुक्तहरु अपराध स्विकार्ने र काठमाडौँ जिल्ला अदालत दोषी उम्काउने दृश्य लोकतन्त्रकै लागि लज्जास्पद परिघटना हो, यसले न्यायालयको स्वतन्त्र भुमिकामाथि गम्भीर प्रश्न उठाएको छ । विश्वविद्यालयभित्र लोकतान्त्रिक स्पेस खुम्चिँदै गएको यस्तो विकराल परिस्थितीमा हामी यहाँहरु समक्ष विनम्रतापूर्वक अनुरोध गर्न चाहन्छौँ — कृपया विश्वविद्यालय जोगाउन यहाँहरुले विद्यार्थीको अपिललाई गम्भीरतापूर्वक लिइदिनुस् । विश्वविद्यालय यतिबेला विश्वविद्यालयजस्तो छैन, विश्वविद्यालयका कक्षा कोठाहरुमा त्रास र भयको डरलाग्दो आवाज मडारिएको छ ।

विश्वविद्यालयलाई जोगाउन सके वौद्धिक जागरणको सम्भावना रहन्छ, विश्वविद्यालय नै मृत्युशैयामा पुगे त्यसको क्षती अकल्पनीय हुनेवाला छ । त्यसैले हामी विद्यार्थीहरु त्रिभुवन विश्वविद्यालयलाई विश्वविद्यालयकै स्वरुपमा फर्काउन चाहन्छौँ । हाम्रो यो पवित्र उद्धेश्यका लागि यहाँहरुको साथ र सहयोगको खाँचो छ ।

विश्वविद्यालयको गरिमा र स्वत्व जोगाउन चाहने सम्पूर्ण प्राज्ञिक व्यक्तित्व, सञ्चारकर्मी, विद्यार्थी, उद्योगी लगायत विभिन्न पेसा र व्यवसायमा रहनुभएका प्रतिष्ठित महानुभावहरुलाई यहि मंसिर २८ गते दिउँसो १२ बजे विद्यार्थी, प्राध्यापक, कर्मचारी, लेखक, रंगकर्मी, स्तम्भकारको अपराधविरुद्ध विश्वविद्यालय परिक्रमा कार्यक्रममा यहाँहरुको गरिमामय उपस्थितीका लागि हार्दिक अनुरोध गर्दछौँ ।

त्रिभुवन विश्वविद्यालयका न्यायप्रेमी विद्यार्थीको

प्रकाशित मिति: शुक्रबार, मंसिर २६, २०७७ २१:१७